बधान 18

प्रोहत अर लेबी गोत्रा लै भाग

1 मोसा खोज़अ इज़राईली का इहअ, "प्रोहत अर सोभी लेबी गोत्रा निं होरी इज़राईली संघै ज़िम्मीं दी किछ़ै हेस्सअ भेटणअ। तेते बदल़ै आसा तिन्‍नां लै तिंयां भैंट अर बल़ीदान ज़ेता इज़राईली बिधाता लै अर्पण करे। 2 तिन्‍नें ज़ैदात आसा बिधाता आप्पै, तेऊ आसा तिन्‍नां लै एऊ साबै दैणें ज़बान दैनी दी।

3 "ज़ेभै बी तम्हैं बिधाता लै बाछ़ू या भेड़ बल़ी करे, तेता का दैऐ प्रोहता लै गुल़छ़ू, मूंड अर भितरो मास्स। 4 एता का लाऊआ दैऐ तम्हैं तिन्‍नां लै नऊंईं साल-फसला का नाज़, दाखो रस, जैतूनो तेल अर भेडा-बाकरीए हेल़्ही मांझ़ै दैऐ तिन्‍नां चैणें ऊन अर शेली बी हर साल ज़ुंण पैहली बारी मुनै। 5 इना च़िज़ा लऐ प्रोहता लै दैई, किल्हैकि तिंयां अर लेबी गोत्रे आद-लुआद आसा होरी इज़राईली मांझ़ै सारी सदा लै बिधाता आपणीं पबित्र ज़ैगे च़ाकरी करदै छ़ांटै दै।

6 "ज़ै कुंण लेबी आपणीं नगरी छ़ाडी, बिधाते पबित्र ज़ैगा लै डेऊणअ च़ाहे, 7 सह बी सका तिधी बिधाते पबित्र ज़ैगा तिहअ ई प्रोहतो काम करी, ज़िहै तिधी होर लेबी च़ाकरी करदै आसा लागै दै। 8 तेऊ बी भेटणअ इज़राईलीए भैंट अर बल़ीदाना का खाणैं-पिणैंओ तिहअ ई भाग ज़िहअ तिधी होरी प्रोहता भेटा, च़ाऐ तेऊ लै आपणैं टबरा का बी ज़ैदात बेच़ी ढब्बे मज़त बी किल्है निं भेटा होए।

हर बगत रहै पबित्र

9 "ऐबै जाणै तम्हैं छ़ेक्‍कै तैहा ज़ैगा पुजी ज़ुंण तम्हां लै बिधाता आसा लाई दी दैई। ज़िहै च़िल़्हखरै काम तिंयां तेऊ देशै बस्सै दै लोग करा, तिहअ करदै निं तम्हैं लागी। 10,11 तम्हैं निं हेरे किधी आपणैं शोहरू-शोहरी बेदीए आगी दी बल़ीदान करी। नां तम्हैं ज़ादू-मत्र करी, नां मणशाण झ़ैऊंणै आल़ै सेटा पुछ़दै डेऊई, नां कहा डांऊं-च़ेल्‍लै सेटा च़लैई डेऊई।✝18:10-11 लेब. 19:26,31; लुआ. 22:18

12 "किल्हैकि बिधाता करा इना इहै कामां करनै आल़ै का नफरत। तैही करनै बिधाता तिंयां इहै च़िल़्हखरै कामां करनै आल़ै ज़ातीए लोग तम्हां करै खतम ज़ुंण तेऊ देशै आसा बस्सै दै। 13 तम्हैं लोल़ी इना इहै च़िल़्हखरै कामां का दूर रही बिधाता लै नर्दोश रहै।✝18:13 मोत्त. 5:48

मोसा ज़िहअ गूर

14 "ज़हा ज़ैगा पुजी तम्हैं तेते मालक हणैं आल़ै आसा, तेऊ देशै बस्सै दै लोग डेओआ डांऊं-च़ेल्‍लै अर जोतषी पुछ़दै। पर थारअ परमेशर बिधाता निं तम्हां लै इना एही गल्‍ला करने ज़ाज़त दैंदअ। 15 पर बिधाता काढणअ थारै ई भाई-बंधा मांझ़ा का मुंह ज़िहअ एक गूर। ज़िहअ सह गूर तम्हां का खोज़े, तम्हैं करै तिहअ ई।✝18:15 शधा. 3:22; 7:37 16 अह हणीं थारी सह गल्‍ल पूरी ज़ुंण तम्हैं तधू बिधाता का अरज़ किई ती, ज़धू थारअ झाल़अ होरेब धारा गोधै त हुअ द। तधू बोलअ त तम्हैं इहअ, ‘हाम्हैं निं एही डरैऊंणी आग अर बिधातो बोल शूणीं सकदै, इहअ निं हआ कि हाम्हैं मरे!’

17 "तेखअ बोलअ बिधाता मुखा इहअ, ‘ईंयां आसा ठीक लागै दै बोल्दै। 18 ऐबै आजू ज़ेभै बी मुंह तिन्‍नां संघै गल्‍ला करनी होए, तेता लै छ़ांटणअ मुंह तिन्‍नां ई मांझ़ा का ताह ज़िहअ एक गूर। मुंह खोज़णअ आपणअ समाद तेऊ गूरा का अर तेऊ खोज़णअ ज़िहअ मंऐं बोलअ तिहअ ई इना लोगा का। 19 सह खोज़णअ तेऊ गूरा मेरअ समाद, अर ज़ुंण तेऊ समादा नांईं मने, तेऊ लै निं हुंह सज़ा दैणैं का पिछ़ू हटदअ।✝18:19 शधा. 3:23

20 "‘पर ज़ै कुंण गूर आपणीं बाखा लोगा का एही गल्‍ला खोज़े ज़ुंण मंऐं तेऊ लै बोलअ ई निं आथी, तेऊ गूरा पाऐ तम्हैं मारी। इहै गूरा बी पाऐ मारी ज़ुंण मुंह बिधाता छ़ाडी होरी देअ-देबी बाखा लोगा संघै गल्‍ला करे।’

21 "तम्हैं सका आपणैं मन्‍नैं इहअ सोठी, ‘हाम्हां का किहअ करै च़ाल्‍लअ थोघ लागी कि ज़ुंण गूरै बोलअ सह बिधातो समाद आसा, कि होरीओ?’ 22 तेतो जाणअ तम्हां का थोघ लागी, किल्हैकि बिधाता ज़हा च़िज़ा लै बोले कि अह हणअ, सह रहा तेखअ हई। ज़ै सह तिहअ ई नांईं होए तै ज़ाणैं तम्हैं इहअ कि सह गूर त आपणीं बाखा लागअ द बोल्दअ। पर तम्हैं निं इहै गूरा का डरदै लागी।"