बधान 2

इज़राईली रहै रेगीस्तानै ठुल़्दै लागी

1 "तेखअ ज़िहअ बिधाता मुल्है हुकम किअ त, हाम्हैं लागै फेरअ दैई लाल समुंदरे बाढा बातीए बाता आजू हांढदै, संघा रहै खास्सी साला तैणीं धारा बाखलै मुल्खै सेईर धारा बागी-बागी तधू तैणीं हांढदै लागी,✝2:1 गण. 21:4 2 ज़धू तैणीं बिधाता इहअ निं बोलअ, ‘मोसा, 3 ऐबै हुअ तम्हां इना धारा फेर ठुल़्दी-ठुल़्दी खास्सअ बगत, ऐबै फिरा तम्हैं उतर दिशा बाखा लै। 4 तूह कर इना लोगा लै इहअ हुकम, "तम्हैं डाहै धैन, किल्हैकि तम्हैं डेऊणैं एदोम देशे सिऊंआं बाती, ज़ेथ थारै भाई-बंध*2:4 भाई-बंध एसाबा लै बोला एदोम बी तैही बोला तेऊए आद-लुआदा लै एदोमी अर सह आसा इज़राईलो ज़ेठअ भाई, एसाबे आद-लुआद आसा बस्सै दै। तिंयां डरनै तम्हां का,✝2:4 मूल. 36:8 5 तिन्‍नां संघै निं जुधा करदै लागी। सेईर धारा बाखो मुल्ख आसा मंऐं तिन्‍नां लै ई दैनअ द, इधी तैणीं कि तम्हां निं तेथ खूरा टकैल़णा जोगी ज़ैगा बी दैंदअ। 6 ज़ेभै तम्हैं तेऊ देशा बाती डेओए, तम्हां लागणअ झुटणा लै पाणीं अर खाणां लै ज़िणस तिन्‍नां का ढब्बै दैई मोलै लणी।"’

7 "बिधाता किई एऊ डरैऊंणै रेगीस्तानै च़ाल़्ही साला म्हारी मज़त अर हेर-सभाल़। तेऊ दैनी हाम्हां लै तिंयां सोभै गल्‍ला ज़ेते हाम्हां ज़रुरत थिई। बिधाता दैनी हाम्हां लै बर्गत अर तेऊ किऐ हाम्हैं हर गल्‍ला लै सफल।

8 "तेखअ डेऊऐ हाम्हैं सेईर मुल्खे बाता, ज़ेथ एसाबे आद-लुआद, म्हारै भाई-बंध आसा बस्सै दै। हाम्हैं लागै खार समुंदरे एलात अर एजोन-गेबर डेऊणे बाता छ़ाडी, मोआब रेगीस्ताने बाता अराबा लै हांढदै।

9 "बिधाता खोज़अ मुखा इहअ, ‘मोआबी लोगा संघै निं लल़ाई-झ़गल़अ करी। तिन्‍नां निं छ़ेल़ी, तिन्‍नां दैऐ तिधी बस्सी रहणैं किल्हैकि एर*2:9 एर मोआब देशे खास नगरी, कई बारी ज़ाणा सारै मोआब देशा आर नगरी बोली नगरीए ज़ैगा आसा मंऐं लूते*2:9 लूते अह त आबरामो भतिज़अ आद-लुआदा लै दैनी दी, तैहा ज़ैगा निं हुंह तम्हां लै दैंदअ।’✝2:9 मूल. 19:37

तिंयां ज़ाती ज़ुंण कनान देशै रहा ती

10 "आर नगरी मोआबी बस्सणै का आजी रहै तै तेऊ मुल्खै एमी ज़ातीए लोग, तिंयां थिऐ अनाक ज़ातीए लोग ज़िहै बडै-बडै दैंत्तर मणछ अर जोधै। 11 अनाक अर एमी इना दुही ज़ाती लै बोला तै रपाई*2:11 रपाई इहै मणछ ज़ुंण लाम्मै दैंत्तर मणछ हआ, पर मोआबी लोग बोला तै तिन्‍नां लै एमी।

12 "सेईर मुल्खै थिऐ हूरी ज़ातीए लोग बस्सै दै, पर एदोमी*2:12 एदोमी एसाबा लै बोला एदोम बी अर तेऊए खिंबा दी आजू ज़ुंण लोग हुऐ तिन्‍नां लै बोला एदोमी लोगै किअ तेऊ मुल्खे सारी ज़ैगा कबज़अ। तिन्‍नैं पाऐ कई हूरी लोग मारी अर ज़ुंण ज़िऊंदै रहै तिंयां काढै तेऊ देशा का बागै। सह किअ तिन्‍नैं तिहअ ई ज़िहअ इज़राईली तेऊ देशा का आपणैं दुशमण बागै काढी कबज़अ किअ, ज़ुंण तिन्‍नां लै बिधाता दैनअ त।

इज़राईलीओ जेरेद गाडा टपी पार डेऊणअ

13 "ज़ांऊं हाम्हैं मोआब देशे दखण सिऊंआं दी जेरेद गाडा पुजै, बिधाता बोलअ हाम्हां लै इहअ कि तम्हैं डेओआ गाडा पार, हाम्हैं बी किअ तिहअ ई।

14 "कादेश-बर्ना छ़ाडी जेरेद गाडा पार टपणै तैणीं गई ती हाम्हां ठत्ती साला बिति अर कादेश-बर्ना रहंदी ज़ुंण तैहा पोस्तीए लोग थिऐ, तिंयां बी गऐ तै पठी मरी ज़िहअ बिधाता आप्पै बोलअ त कि इहअ हणअ।✝2:14 गण. 14:28-35 15,16 बिधाता रहअ तेभै तैणीं तिन्‍नां मारदअ*2:15-16 मारदअ तिन्‍नां लै पल़ी नबिज़री बमारी लागी, ज़ेभै तैणीं तिंयां तैहा पोस्तीए लोग सोभ निं मूंऐं।

17 "तेखअ बोलअ बिधाता मुखा इहअ, 18 ‘मोसा, ऐबै डेओआ तम्हैं एर नगरी बाती मोआब देशे उतर दिशा बाखे सिऊंआं तैणीं ज़िधा आजू 19 अमोनी लोग आसा बस्सै दै। तम्हैं निं तिन्‍नां संघै लल़ाई-झ़गल़ै करदै लागी। सह ज़ैगा आसा मंऐं लूते आद-लुआदा लै दैनी दी अर तैहा ज़ैगा निं हुंह इज़राईली लै कबज़ै करने ज़ाज़त दैंदअ।’✝2:19 मूल. 19:38

होर ज़ाती ज़ुंण कनान ओरी-पोरी आसा बस्सी दी

20 "अमोनी लोगे तेऊ देशै बस्सणै का आजी रहा तै रपाई ज़ातीए लोगा मांझ़ै कई तेऊ देशै, अर अमोनी लोग बोला तै तिन्‍नां लै ‘जमजुमी।*2:20 जमजुमी मतलब बडै-बडै दैंत्तर लोग’ 21 जमजुमी लोग थिऐ अनाक ज़ातीए मणछा ज़िहै बडै-बडै दैंत्तर मणछ अर खास्सै। पर बिधाता त अमोनी लोगा बाखा अर तिन्‍नैं पाऐ तिन्‍नां जमजुमी ज़ातीए लोगा मांझ़ै कई मारी अर ज़ुंण ज़िऊंदै बच़ै, तिंयां काढै तिन्‍नैं तेऊ देशा का पोर्ही संघा बस्सै अमोनी तेथ आप्पू।

22 "बिधाता थिअ अमोनी बाखा तिहअ ई ज़िहअ एदोमी बाखा थिअ, एदोमी पाऐ तै कई हूरी ज़ातीए लोग मारी अर ज़ुंण ज़िऊंदै बच़ै, तिंयां काढै तिन्‍नैं तेऊ देशा का बागै अर तेथ बस्सै आप्पू।

23 "तिहै ई थिऐ आबी ज़ातीए लोग, तिंयां थिऐ गाज़ा नगरी दखण बाखा गराऊंऐं बस्सै दै, पर कप्तोरी*2:23 कप्तोरी कप्तोरी लोग मना तै इहअ कि ईंयां लोग आसा पलिश्ती आईत्रू ज़ुंण क्रेतै का थिऐ आऐ दै। लोगै पाऐ तिंयां मारी अर तिन्‍नें ज़ैगा बस्सै आप्पू।✝2:23 आम. 9:7

इज़राईलीओ अर्नोन गाडा पार डेऊणे बारै

24 "ज़ांऊं हाम्हैं अमोन बाती आजू डेऊऐ, बिधाता बोलअ हाम्हां लै इहअ, ‘इज़राईल, ऐबै उझ़िआ, ऐबै डेओआ आपणैं डेरै च़की अर्नोन गाडा पार। तम्हैं छ़ेल़ा हेशबोन नगरीए अमोरी राज़ै सिहोना संघै जुध, हुंह गिम्मू ऐहा ज़ैगा तेऊ संघी तम्हां लै। तम्हैं गिम्मा इधा पोर्ही एऊ देशे सारी ज़ैगा आप्पू लै। 25 ऐबै करनअ मुंह इहअ कि आझ़ा पोर्ही पल़णीं धरती दी सोभी देशे लोगा थारी डअर। थारै बारै गल्‍ला शूणीं छ़ुटणीं सोभी लोगा डरै काम्मणीं।’

राज़ै सिहोने हार

26 "अर्नोन गाडा पार टपी पाऐ हाम्हैं कदमोत रेगीस्तानै आपणैं डेरै, मंऐं दैनअ हेशबोन नगरीए राज़ै सिहोना सेटा दूत छ़ाडी मेल़-ज़ोल़ करना लै इहअ समाद, 27 ‘हे राज़अ, ज़ीबाण, म्हारी आसा ताखा एही अरज़ कि हाम्हां दै तेरै मुल्खा बाती राज़ रसतै हांढी आजू डेऊणैं। 28,29 ज़ै हाम्हां किज़ै खाणअ होए अर पाणीं बी झुटणअ होए, तेते बी ढाकै तूह हाम्हां का ढब्बै। पर हाम्हां दै बातो-बात आजू डेऊणैं। हाम्हां दै जरदण नदी टपी पार तेऊ देशा लै डेऊणैं ज़ुंण बिधाता हाम्हां लै आसा लाअ द दैई। एदोमी अर मोआबी बी दैनअ हाम्हां एर नगरी बाती एछणैं। ज़ीबाण तूह बी दै हाम्हां आपणीं ज़ैगा बाती आजू डेऊणैं।’

30,31 "पर सिहोनै निं हाम्हां इज़राईली लै आपणैं मुल्खा बाती डेऊणे ज़ाज़त दैनी। किल्हैकि बिधाता त तेऊओ मन्‍न काठअ किअ द अर सह हुअ हाम्हां संघै जुधा लै तैर। बिधाता बोलअ तधू मुखा इहअ, ‘मुंह दैणीं सिहोन राज़ै का तम्हां लै ज़ीत अर तेऊए अह ज़ैगा दैणीं मुंह तम्हां लै। तम्हैं छ़ेल़ा तेऊ संघै जुध संघा करा तम्हैं इधा पोर्ही एऊ देशा दी कबज़अ करनअ शुरू।’ आझ़ आसा अह गल्‍ल तम्हां सोभी का शुझदी लागी दी।

32 "सिहोन राज़ै निं हाम्हां इज़राईली लै आपणैं मुल्खा बाती डेऊणे ज़ाज़त दैनी। तेऊ झाल़ी आपणीं सारी सैना, संघा निखल़अ जहास नगरी नेल़ रेगीस्तानै हाम्हां संघै जुधा लै।

33 "पर हाम्हैं इज़राईली पाऐ तिंयां तेऊ जुधा दी हारी किल्हैकि म्हारी मज़त किई बिधाता। हाम्हैं पाअ सिहोन, तेऊओ शोहरू अर तेऊए सैना मारी। 34 संघा किअ अर्नोन गाडा पोर्ही उतर दिशा बाखा ज़बोग गाडा तैणीं अमोरीए मुल्खा दी कबज़अ। तेऊए सारी नगरी पाई हाम्हैं ढोल़ी अर तेथ निं तिन्‍नें बेटल़ी माठै मांझ़ै बी कोहै छ़ुटअ। 35 पर डागै-धअण अर किम्मती ज़ैदात डाही हाम्हैं आप्पू का।

36 "बिधाता किई म्हारी मज़त कि हाम्हैं किअ अर्नोन गाडे बाढा अरोर नगरी पोर्ही उतर दिशा बाखा ज़बोग गाडा गलाद तैणीं अमोरीए मुल्खै कबज़अ। तेथ निं कुंण एही नगरी बच़ी ज़ुंण हाम्हैं बरैबाद निं किई होए। 37 ज़बोग गाडा आजू थिअ अमोनी लोगो मुल्ख, अर तिन्‍नें सिऊंआं भितरी डेऊणैं जोगी बल नांई त इज़राईली का आथी। बिधाता बी किअ त तेथ डेऊणा लै नांईं।"