ज़ैहसू 13

कनान देशे इज़राईली गोत्रा मांझ़ै बांड

1 ज़ैहसू गअ त खास्सअ प्रोढअ हई अर बिधाता बोलअ तेऊ लै इहअ, "ऐबै हुअ तूह खास्सअ प्रोढअ, पर अज़ी आसा खास्सै देश रहै दै ज़ुंण अज़ी इज़राईली गिम्मै ई निं आथी। 2 तिंयां देश आसा ईंयां: तिंयां सारै मुल्ख ज़ेथ पलिश्ती अर गशूरी आसा बस्सै दै, 3 दखणा बाखा आबी ज़ातीए मणछो सारअ मुल्ख, मिसर देशे सिऊंआं दी शिहोर गाडा ओर्ही उतरा बाखा अक्रोन सिऊंआं तैणीं ज़ेथ कनानीओ राज़ आसा, अर पलिश्तीए पांज़ राज़ै ज़ुंण गाज़ा, अशदोद, अशकलोन, गात अर अक्रोन नगरी रहा। 4 अज़ी बी आसा कनानीए खास्सै मुल्ख, मारा ज़ुंण सदोनी लोगो आसा, तिधा ओर्ही अपेक अमोरी लोगे सिऊंआं तैणीं, 5 गबाली लोगे ज़ैगा अर पुर्बा बाखा हर्मोन पर्बते गोधै बाल-गाद ओर्ही हमात खागा तैणीं सारअ लाबानोन। 6 एता संघै आसा सदोनी, ज़ुंण धारा बाखे मुल्खै लाबानोन धारा अर मिसरपोतमैम मांझ़ै आसा बस्सै दै। ईंयां सोभ लोग हेरनै मुंह एता का इज़राईली पुजणैं का आजी ई काढी। पर तूह करै सिधअ एतरअ कि इज़राईली लै दैऐ इना ज़ैगा बांडी ज़िहअ मंऐं ताल्है हुकम आसा किअ द कि इहअ करै। 7 पर एऊ देशे सारी ज़ैगा दैऐ इज़राईले नौ गोत्रे हेस्से अर मनिश्शे आधै गोत्रा लै बी दैऐ इधी इना संघै हेस्सअ।"

जरदण पुर्बा बाखा ज़ैगे बांड

8 रूबेन, गाद अर मनिश्शे आधै गोत्रा लै थिअ जरदण नदी पुर्बा बाखा हेस्सअ भेटी गअ द ज़ुंण बिधाते गूर मोसा आपणीं ज़िऊंदी ज़िता तिन्‍नां लै आप्पै ई हेरअ त बांडी दैई।✝13:8 गण. 32:33; बधा. 3:12 9 तिन्‍नें ज़ैगा हुई अर्नोन गाडे बाढा का अरोर ओर्ही अर तेऊ खागे मांझ़ै बस्सी नगरी बाती सारअ मुल्ख दबोन उतरा बाखा सऊंअ च़कोर मुल्ख मेदबा तैणीं। 10 तिन्‍नें बांडै आई तिंयां नगरी बी ज़ेथ हेशबोन नगरीओ अमोरी राज़अ सिहोन राज़ करा त। कोई नगरी ती पुर्बा बाखा अमोरी लोगे सिऊंआं तैणीं। 11 सारअ गलाद मुल्ख, गशूर अर मकाती लोगो मुल्ख, हर्मोन पर्बत, सल्का तैणीं सारअ बाशान देश, 12 बच़ै दै रपाई ज़ातीए राज़ै ओगो सारअ मुल्ख, ज़ुंण अशतरोत अर अद्रोई नगरी का राज़ करा त। ईंयां ज़ितै तै मोसा आपणीं ज़िऊंदी ज़िता आप्पै संघा काढै तै तेऊ मुल्खा का बागै। 13 पर हाँ, इज़राईली निं गशूरी अर मकात नगरीए लोग बागै काढै आथी, तिंयां आसा आझ़ तैणीं बी इज़राईली मांझ़ै बस्सै दै।

14 इज़राईली मांझ़ै निं लेबी गोत्रा लै ज़िम्मीं मांझ़ै किछ़ै बांड भेटी। किल्हैकि परमेशर बिधाता त मोसा का इहअ बोली डाहअ द, "ज़ुंण मेरी बेदी दी हूम बल़ीदान होए, सह भाग हणअ लेबी गोत्रा लै।"✝13:14 गण. 18:20

रूबेन गोत्रा लै बांड

15 मोसा दैनी रूबेन गोत्रा लै तिन्‍नें टोलीए साबै तिन्‍नां लै ज़ैगा-ज़िम्मींए बांड। 16 तिन्‍नें हेस्सै आई अर्नोन गाडे बाढा का अरोर ओर्ही अर तेऊ खागे मांझ़ै बस्सी नगरी बाती सारअ मुल्ख दबोन उतरा बाखा सऊंअ च़कोर मुल्ख मेदबा नगरी तैणीं। 17 तेथ संघै आई तिन्‍नें बांडे हेशबोन नगरी अर तेते सोभ गराअं, दबोन, बामोत-बाल, बेथ-बालमोन, 18 जहास, कदमोत, मेपात, 19 किर्यातैम, सिबमा अर धारा बस्सी दी नगरी सेरेत नगरी, 20 बेथ-पोर, पिसगा धारे रेल़ी ज़ैगा अर बेथ-जासमोत नगरी। 21 एथ आई तिन्‍नें बांडै च़कोर सरलै रेगीस्ताने सारी नगरी ज़ेथ हेशबोन नगरीए अमोरी राज़ै सिहोनो राज़ थिअ अर ज़हा मारी मोसा जुध ज़ितअ त। मोसा ज़ितै तै मिद्यान राज़ करनै आल़ै एबी, रकेम, सूर, हूर अर रेबा नाओंए राज़ै बी ज़ुंण सिहोन राज़े मुल्खै थिऐ। 22 होर बी ज़ुंण इज़राईली मारी पाऐ तै, तिन्‍नां मांझ़ै त बोरो शोहरू बलाम जोतषी बी। 23 रूबेन गोत्रे बांडै आई ईंयां ई नगरी अर गराअं अर ज़ुंण मुल्ख तिन्‍नें बांडे आअ तेते सिअं हुई पछ़मा बाखा जरदण नदी।

गाद गोत्रे बांडैओ मुल्ख

24 मोसा त गाद गोत्रा लै बी तिन्‍नें टोलीए साबै तिन्‍नां लै ज़िम्मीं-ज़ैगे बांड डाही दी दैई। 25 तिन्‍नें बांडै तै ज़जार अर गलाद मुल्खे सारी नगरी, अरोर तैणीं अमोनी लोगो आधअ देश ज़ुंण रबाह पुर्बा बाखा आसा। 26 तिन्‍नें ज़ैगा हुई हेशबोन नगरी पोर्ही रामोत मिज़पा बातोनीम तैणीं अर माहानीम पोर्ही दबीर सिऊंआं तैणीं। 27 जरदण खागै सऊंऐं मुल्खा बाखा आअ तिन्‍नें बांडै बेथ-हाराम, बेथ-निम्रा, सक्‍कोत, सापोन नगरी अर हेशबोन नगरीए राज़ै सिहोने मुल्खा का बच़ी दी ज़ैगा। पछ़मा बाखा पल़ी तिन्‍नें सिअं जरदण नदी दी उतरा बाखा गलील समुंदरा तैणीं। 28 गाद गोत्रे बांडै आई ईंयां ई नगरी तेते गराऊंआं संघी।

मनिश्शे आधै गोत्रा लै बांड

29 तेखअ ती मोसा मनिश्शे आधै गोत्रा लै तिन्‍नें टोली साबै ज़ैगा बांडी दैनी दी। 30 तिन्‍नें बांडै ती मोसा माहानीम नगरी पोर्ही बाशान देशो सारअ मुल्ख ज़ेथ राज़अ ओग राज़ करा त अर बाशान मुल्खै ज़िधी याईर टोलीए लोग तै बस्सै दै, तिंयां शाठ गराअं बी आऐ मनिश्शे टोलीए बांडै। 31 एथ आऐ तिन्‍नें बांडै आधअ गलाद मुल्ख, अशतरोत अर अद्रोई नगरी ज़ुंण नगरी बाशाने राज़ै ओगे राज़धानी थिई। ईंयां सोभै दैनी मनिश्शे आधै गोत्रा लै ज़ुंण आजू मनिश्शे शोहरू माकीरे खिंबा का थिऐ।

32 एऊ साबै ती मोसा जेरिहो नगरी नेल़ अर जरदण नदी पुर्बा बाखे ज़ैगा तधू बांडी डाही दी ज़धू सह मोआब अराबा सरलै रेगीस्तानै थिअ। 33 पर लेबी गोत्रा लै निं मोसा ज़ैगा-ज़िम्मीं मांझ़ै किछ़ै बांड दैनी। किल्हैकि इज़राईले परमेशर बिधाता त मोसा का इहअ बोली डाहअ द, कि तिन्‍नों भाग हणअ तेऊए बेदी दी बल़ीदान किई दी भैंट। ✝13:33 गण. 18:20; बधा. 18:2