ज़ैहसू 5

1 ज़ांऊं जरदण नदीए पछ़मा बाखा राज़ करनै आल़ै अमोरी लोगे सोभी राज़ै अर मांझ़ समुंदरा नेल़ बस्सै दै सोभी कनानी राज़ै एही गल्‍ला शूणीं कि बिधाता डाही सोभी इज़राईली जरदण नदी आर एछणैं तैणीं जरदण एकी बाखा रोक्‍की शकेऊई! तिन्‍नें दिलै पल़ी इज़राईलीए डअर अर तिन्‍नां निं इज़राईलीए मकाबलै करने हिम्मत ई पल़ी।

खलेफ़ल़ी नाओंए ज़ैगा इज़राईलीओ खतैर

2 तेखअ बोलअ बिधाता ज़ैहसू लै इहअ, "चैडे बणाऐं तिछी छ़ूरी संघा करै तिन्‍नां सोभी इज़राईलीओ खतैर ज़सरअ नांईं आथी हुअ द। 3 ज़िहअ बिधाता हुकम किअ त, ज़ैहसू किअ तिहअ ई अर तेऊ किअ सोभी इज़राईली मांझ़ै सोभी मर्ध अर शोहरूओ खतैर तैही पल़अ तेखअ तैहा ज़ैगा नाअं खलेफ़ल़ीए धारठी। 4-6 अह खतैर पल़अ एते तैणीं करनअ कि ज़धू इज़राईली मिसर देशा का निखल़ै तै, तधू त सोभी इज़राईलीओ खतैर करी हेरअ द। तेखअ ज़ुंण च़ाल़्ही साला रेगीस्तानै हांढदी आजू तिन्‍नें लुआद हुई, तिन्‍नां मांझ़ै निं कोहिओ खतैर हुअ आथी त। ज़ुंण जुध करनै जोगी मर्ध मिसर देशा का निखल़दी बारी इज़राईली मांझ़ै थिऐ, तिंयां बी गऐ तै मरी किल्हैकि तिन्‍नैं निं ज़िहअ बिधाता बोलअ तिहअ हुकम मनअ त, तैही खाऐ तै बिधाता सोह कि तिंयां निं तेऊ रज़दी-पज़दी ज़ैगा आल़ै देशै पुजणैं ज़ेता दैणें करार मंऐं तिन्‍नें दादा-बाबा संघै आसा किई दी।"✝5:4-6 गण. 14:28-35 7 ज़ैहसू बझ़ैल़अ आजू नऊंईं पोस्ती दी हुऐ दै तिन्‍नां शोहरूओ खतैर करनै ज़सरअ खतैर निं आथी त हुअ द।

8 ज़ांऊं सोभी इज़राईली मणछो खतैर हई मुक्‍कअ, तेखअ रहै तिंयां तिधी खिम्भे डेरै पाई, ज़ेभै तैणीं तिन्‍नें ज़खम निं ताझ़ुऐ। 9 बिधाता बोलअ तेखअ ज़ैहसू लै इहअ, "मिसर देशे गलामी दी रही ज़ुंण थारअ अदर घटअ, सह किअ मंऐं तम्हां का आझ़ दूर।" तैही पल़अ तैहा ज़ैगा नाअं गिलगाल अर अह नाअं आसा आझ़ तैणीं बी इहअ ई।

10 इज़राईली तै जेरिहो नगरी नेल़ अराबा रेगीस्तानै गिलगाल नाओंए ज़ैगा आपणैं डेरै पाऐ दै, तिधी मनाऊंअ तिन्‍नैं च़ौदा च़ैत्रै पुनूंईए धैल़ै उडै ऊवार्णैओ थैर।✝5:10 लुआ. 12:6 11 दुजै धैल़ै खाई तिन्‍नें कनान देशे पज़ैआ मांझ़ै पैहली बार ज़ौए आखरी रोटी अर भोश। 12 तधा बाद निं तेखअ तिन्‍नां लै सरगा का खाण कधि अल़अ। तैहा साला पोर्ही लागै तिंयां कनान देशै पज़ी दी पज़ैआ मांझ़ै खांदै।✝5:12 लुआ. 16:35

जेरिहो नगरी दी कबज़अ

13 ज़ैहसू त जेरिहो नगरी नेल़, तेऊ का शुझुअ नभैऊशै कि तेऊ आजू आसा तलबार पाई एक मर्ध खल़्हुअ द। ज़ैहसू डेऊअ तेऊ सेटा उझै संघा पुछ़अ इहअ, "तूह हाम्हां बाखो सपाही आसा कि म्हारै दुशमणा बाखो?" ✝5:13 गण. 22:23; 1 इति. 21:16

14 तेऊ मर्धै दैनअ ज़ैहसू लै ज़बाब, "हुंह निं कोही बाखो आथी, हुंह आसा बिधाते सैनो सैनापति।"

ज़ैहसू पल़अ बिधाते सैनापति सेटा उटी बाखा धरनीं संघा टेक्‍कअ माथअ, तेखअ बोलअ इहअ, "मेरै मालक हुंह आसा तेरअ दास, ओर्ही खोज़ तेरअ मुल्है किज़ै हुकम आसा?" ✝5:14 दान. 12:1; प्रका. 19:11-16

15 बिधाते सैने सैनापति बोलअ इहअ, "आपणैं पोलल़ै खोल्ह पोर्ही, तूह आसा पबित्र ज़ैगा खल़्हुअ द।" ज़ैहसू किअ तिहअ ई। ✝5:15 लुआ. 3:5