1 इज़राईली ज़ितणें खबर पुजी जरदण नदीए पछ़मा बाखे सोभी राज़ै सेटा, सराज़ी, निऊल़ी अर सऊंऐं मुल्खै मांझ़ समुंदरै बाढै अर उतरा बाखा लाबानोन तैणीं ज़ेथ हित्ती, अमोरी, कनानी, परिजी, हिब्बी अर जबेशी लोग थिऐ बस्सै दै, 2 तिन्‍नां लोगे सोभी राज़ै किअ इज़राईली अर ज़ैहसू संघै जुध करना लै एक्‍कअ।

3 गबोन बस्सै दै लोग ज़ुंण हिब्बी थिऐ, तिन्‍नैं बी शूणअ कि ज़ैहसू जेरिहो अर एई नगरी दी किहअ-किहअ किअ!✝ 4 तिन्‍नैं सोठी ठगी करै आप्पू बच़णे एक तरकीब! तिन्‍नैं छ़ाडै आपणैं आदमी राज़दूते भेश बणाईं इज़राईली सेटा गाधे पिठी पराणीं बोरी अर पराणीं शाट्टी लाई दी दाखे रसे खाल्हल़ी लादी। 5 खूरै बान्हैं शाट्टी लाई तुन्हैं दै पराणैं पोलल़ै अर घेरी बान्हैं चऐ आल़ै पराणैं झिकल़ै। खाणां लै पाई आप्पू संघै भुफी लागी दी तरोल़ै ज़ेही शुक्‍की रोटी। 6 तेखअ डेऊऐ तिंयां गिलगाल मुल्खै ज़िधी ज़ैहसू अर होरी इज़राईली डेरै तै पाऐ दै। तिधी पुजी बोलअ तिन्‍नैं ज़ैहसू अर होरी इज़राईली सैणैं का, "हाम्हैं आसा इधा का खास्सै दूर देशा का आऐ दै, म्हारी आसा तम्हां का अरज़ कि हाम्हां संघै करा मेल़-ज़ोल़ करने करार।"

7 पर इज़राईली बोलअ तिन्‍नां हिब्बी लै, "हाम्हैं किहअ करै सका तम्हां संघै करार करी? एतो कै थोघ कि तम्हैं इधी ओरी-पोरी का होए आऐ दै?" ✝

8 तिन्‍नैं बोलअ ज़ैहसू लै, "हाम्हैं आसा थारै दास?"

ज़ैहसू किअ सुआल, "तम्हैं आसा कुंण अर तम्हैं किधा का आसा आऐ दै?"

9 तेखअ लागै तिंयां खोज़दै, "माराज़, हाम्हैं आसा खास्सै दूर देशा का थारै परमेशर बिधाते बारै गल्‍ला शूणीं आऐ दै। हाम्हैं आसा तिन्‍नां महान च़मत्कारे बारै शूणअ द ज़ुंण बिधाता मिसर देशै किऐ। 10 जरदण नदी पुर्बा बाखा दूई अमोरी राज़ै: हेशबोन नगरीओ राज़अ सिहोन अर बाशान मुल्खो राज़अ ओग ज़ुंण अशतरोत नगरी रहअ त, तिन्‍नें बारै बी आसा हाम्हैं गल्‍ला शूणीं दी कि बिधाता तिन्‍नां लै किज़ै किअ।✝ 11 तैही छ़ाडै हाम्हैं म्हारै देशे सैणैं अर म्हारै सोभी लोगै इहअ बोली तम्हां सेटा, ‘बाता खाणां लै निंयां आप्पू लै रोटी-पाणीं, संघा डेओआ इज़राईली सेटा मिलदै। तिन्‍नां का बोलै इहअ कि हाम्हैं आसा थारै दास अर म्हारी आसा तम्हां का अरज़ कि तम्हैं करा हाम्हां संघै मेल़-ज़ोल़े करार।’ 12 इधी दैआ म्हारी रोटी भाल़णीं, ज़धू हाम्हैं घअरा का तम्हां सेटा एछणा लै हांढदै लागै तै, तधू ती हाम्हैं ईंयां रोटी ताज़ी अर तात्ती-तात्ती आणी दी। पर ऐबै गई ईंयां भुफुई अर तरोल़ै ज़ेही शुक्‍की हई। 13 ईंयां दाखे रसे खाल्हल़ी बी थिई नऊंईं भरी दी, अर भाल़ा ऐबै गई ईंयां धेल़्हुई! म्हारै झिकल़ै अर पोलल़ै बी गऐ लाम्मै सफरा दी पठी धेल़्हुई!"

14 इना गल्‍ला शूणीं अर तिन्‍नें हाल भाल़ी ढाकी इज़राईली तिन्‍नें हाथा का धख रोटी संघा च़ाखी थोल़ी ज़ेही, पर तेता लै निं तिन्‍नैं बिधाता का सलाह लई आथी कि तिन्‍नां संघै मेल़-ज़ोल़ करनअ कि नांईं! 15 ज़ैहसू किअ तिन्‍नां संघै करार करी मेल़-ज़ोल़ कि तम्हां निं हाम्हैं मारदै आथी। सोभी इज़राईली सैणैं बी दैनी तिन्‍नां लै ज़बान।

16 करार करने चिई धैल़ै बाद लागअ इज़राईली का थोघ कि तिंयां लोग तै तिधी तिन्‍नां नेल़ गबोन नगरी का आऐ दै। 17 इज़राईली लागै तिधा का हांढदै अर चिऐ धैल़ै पुजै तिंयां तिन्‍नें नगरी नेल़ ज़िधी तिंयां लोग बस्सै दै थिऐ। ईंयां नगरी ती गबोन, कपीरा, बरोत अर किर्यात-ज़रीम। 18 पर इज़राईली निं तिन्‍नां मारी सकदै तै! किल्हैकि तिन्‍नें सैणैं थिई बिधाते नाओंऐं तिन्‍नां ज़िऊंदै डाहणें ज़बान दैनी दी। सोभै इज़राईली लागै एता पिछ़ू इज़राईली सैणैं लै बखर्दै कि इहअ किज़ू डाहअ करी। 19 तेखअ दैनअ इज़राईली सैणैं सारी इज़राईली टोली लै ज़बाब, "हाम्हैं आसा म्हारै परमेशर बिधाते नाओंऐं इना लै ज़बान दैनी दी, ऐबै निं हाम्हैं इने किछ़ै हान्‍नी करी सकदै। 20 हाम्हां छ़ाडणैं ईंयां ज़िऊंदै ज़ेही हाम्हैं ज़बान आसा दैनी दी। आपणीं ज़बानी का हुधूई निं हाम्हां आप्पू लै बिधातो कोप पाणअ। 21 इना दैआ ज़िऊंदै रहणैं।" पर इज़राईली सैणैं दैनी एही सलाह कि इना डाहा झ़ुका काटदै, बुल़्हदै अर सोभी इज़राईली लै फणैरू लाई।✝

22 ज़ैहसू शादै गबोनी लोग आप्पू सेटा लै संघा पुछ़अ तिन्‍नां का इहअ, "ज़ै तम्हैं इधी नेल़े थिऐ, तै किल्है ठगै तम्हैं हाम्हैं इहअ बोली कि तम्हैं आसा खास्सै दूर देशा का आऐ दै? 23 एता पिछ़ू लागणअ तम्हां लै बिधाता का इहअ फिटक कि थारी ज़ात रहणीं सदा गलाम। तिंयां हणैं सदा बिधाते पबित्र ज़ैगा लै झ़ुका काटी आणदै अर फणैरू।"

24 तिन्‍नैं दैनअ ज़ैहसू लै ज़बाब, "मेरै मालक, हाम्हां पल़अ इहअ करनअ! किल्हैकि हाम्हां का लागअ थोघ कि ईंयां गल्‍ला आसा शुची कि थारै परमेशर बिधाता आसा आपणैं दास मोसा लै हुकम किअ द कि ऐहा सारी ज़ैगा दैऐ तम्हां लै अर एथ बस्सै दै सोभी मणछा पाऐ मारी! तैही तै हाम्हैं तम्हां का खास्सै डरै दै अर हाम्हां ती आपणीं ज़िन्दगी बच़ाऊंणे शाची दी। 25 ऐबै आसा हाम्हैं थारै हाथै, ज़िहअ थारअ दिल बोले तम्हैं करै हाम्हां संघै तिहअ बभार।" 26 ज़ैहसू किअ इहअ कि तेऊ निं इज़राईली तिन्‍नां मारनै दैनअ। 27 पर ज़ैहसू बणाऐं गबोनी तधा ई पोर्ही गलाम अर तिंयां डाहै इज़राईली अर बिधाते बेदी लै झ़ुका काटी आणदै अर फणैरू लाई। तधा ई पोर्ही आसा आझ़ तैणीं तिंयां एऊ ई कामां करदै लागै दै।