14 ዴሬ ኡባስ ማርካ ጊዳና ማላ ሃይሲ ካዎቴ ሚሺራቾ ቃላይ ኩሜ ኣላሜን ዮቴታና፤ ሄሳፌ ጉዬ ዉርሴ ያና።

29 «ሄራካ ሄ ኢታ ሜቶ ጋላሳታፔ ጉዬ

ኣርሼይ ማና፤

ኣጊናይ ባ ፖኦ ዲጋና፤

ጾሊንቴቲ ሳሎፔ ቆቆፌታና፤

ሳሎ ዎልቃማቲካ ቃጻና።✝

30 «ሄ ዎዴ ኣሳ ና ማላታይ ሳሎ ቦላ ቤታና። ቢታ ቦላ ዲዛ ዴሬይ ዉሪ ዬካና፤ ኣሳ ናይካ ሳሎ ሻራ ቦላ ዳሮ ዎልቃራኔ ጊታ ቦንቾራ ዪሺን ኣሳይ ቤያና። 31 ኪታንቻታካ ዳሮ ዎልቃማ ጹሩምባ ጊሪሳራ ዬዳና። ኢስቲካ ዶሬቲዳይታ ኦይዱ ጉላፔ ሳሎስ ሃ ጋጻፔ ሄ ጋጻ ጋካናስ ኡባ ኢሲሶ ሺሻና።

42 «ሂስቲኮ ኢንቴ ጎዳይ ያና ጋላሳ ኢንቴ ኤሮንታ ጊሻስ ቤጊዲ ናጊቴ። 43 ሃይሳ ዎዚናን ዎቴ፤ ካይሶይ ቃማፌ ኣፉን ሳቴ ቦላ ያናኮን ኤሪዛኮ ኢዛ ሚሽ ካይሶይ ኤኮንታ ማላ ኬ ኣዋይ ቤጊዲ ናጋና። 44 ኣሳ ናይካ ኢንቴ ቆፖንታ ሳቴ ቦላ ያና፤ ኢንቴካ ሄሳ ጊጌቲዳይታ ጊዲቴ።

18-20 ዬሱሲካ ባና ካሊዛይታኮ ሺቂዲ፥ «ሳሎኒኔ ሳኣን ጎዳቴ ታስ ኢሜቲዴስ። ሄሳ ጊሻስ ቢዲ ዴሬ ኡባ ኣዋ፥ ናዛኔ ጺሎ ኣያና ሱንን ጻማቂሼ፥ ታና ካሊዛይታ ኦቴ፤ ታ ኢንቴና ኣዛዚዳይሳ ኡባ ናጋና ማላ ታማርሲቴ። ታኒካ ኣላሜ ዉርሴ ጋካናስ ኢንቴናራ ዳይስ» ጊዴስ።✝

32 «ቃሴ ሄ ጋላሳይ ጊሻስ ዎይኮ ሄ ሳቴይ ጊሻስ ታ ኣዋፔ ኣቲን ሳሎ ኪታንቻታ ጊዲንካ ናዛ ጊዲንካ ኦኒካ ኤሬና።

1 ጊዶ ኣቲን ዎዴ ዉርሴን ኣስ ሜቲዛ ዎዴይ ያናይሳ ኔ ኤራ። 2 ኣሳይ ባና ዶሲዛዴ ጊዳና፤ ሚሽ ሲቂዛይታ፥ ባናን ጬቄቲዛይታ፥ ኦቶራንቻታ፥ ጫሻንቻታ፥ ባና ዬሊዳይታስ ኣዛዜቶንታይታ፥ ጋላቶንታይታኔ ጌሻቴ ባይንዳይታ፥ 3 ሲቆይ ባይንዳይታ፥ ኣቶ ጊ ማሮንታይታ፥ ኣሳ ሱን ሞሪዛይታ፥ ባርካ ባና ሃሮንታይታ፥ ሜንጼ ኢታታ፥ ሎኦ ሚሽ ዶሶንታይታ፥ 4 ካዲዛይታ፥ ናጌቶንታይታ፥ ጮ ሜላ ኦቶሬቴን ኩሚዳይታ፥ ጾሳፌ ኣዲ ሎኦ ዴ ዶሲዛይታ ጊዳና። 5 ኣማኒዛ ኣስ ሚሳታና ሺን ኣማኖስ ዲዛ ዎልቃ ካዳና፤ ሄይታ ማላታፔ ኔ ሃካ።

17 « ‹ጾሲ ዉርሴ ጋላስ

ታ ኣያና

ኣሾ ማይኢዳ ኡባ ቦላ

ታኒ ጉሳና፤

ኢንቴ ማጫ ናይቲኔ

ኢንቴ ኣቱማ ናይቲ

ቲንቢቴ ሃሳያና፤

ዬላጋ ናይቲ ኣጁታ ቤያና፤

ጪማቲ ኣጉሞ ኣጉሜታና።✝

18 ሄ ዎዴ ታ ማጫ ኣሽካራታ ቦላኔ

ታ ኣቱማ ኣሽካራታ ቦላ

ታ ኣያናፔ ታ ጉሳና።

ኢስቲካ ቲንቢቴ ሃሳያና።

19 ቦላ ሳሎን ማላሊሲዛ ሃኖታ

ታ ቤሳና፥

ጋርሳ ሳኣን ማላታታ ታ ቤሳና፤

ሱ፥ ታማይኔ ቱላላይ ሃናና።

20 ጊታኔ ቦንቾ ጊዲዳ

ጎዳ ጋላሲ

ያናፔ ካሴቲዲ

ኣርሼይ ማና፤

ኣጊናይካ ሱ ሚሳታና።

21 ጎዳ ሱን ጼይጊዛይ

ዉሪ ኣታና› ጊዴስ።

28 ጎዳይ፥ «ሃይሳፌ ጉዬ

ታኒ ኣሳ ኡባ ቦላ

ታ ኣያና ጉሳና፤

ኢንቴ ማጫ ናይቲኔ ኣቱማ

ናይቲ ቲንቢቴ ሃሳያና፤

ጪማ ኣሳይካ ኣጉሞ ኣጉሜታና፤

ዬላጋ ናቴቲ ኣጁታ ቤያና።✝

29 ሄሳካ ሄ ጋላሳታን

ታስ ኦዛ ማጫሳ ቦላኔ

ኣቱማሳ ቦላ ታኒ

ታ ኣያና ጉሳና።

1 ካሴ ታስ ኣጁታዛ ቢርሺዛ ኪታንቻዚ ታስ፥ «ኔ ዴሬዛ ናጊዛ ጊታ ኪታንቻስ ሃላቃ ሚካኤሌይ ኢዚ ሄ ዎዴ ቆንጫና፤ ኣሳ ዜሬ ሜቶሶፌ ሄ ዎዴ ጋካናስ ሃኒ ኤሮንታ ዎልቃማ ሜቶይ ሃናና፤ ኢስታ ሱንይ ማጻፋን ጻፌቲዳ ኡባ ኣሳይ ኣታና።✝ 2 ኢስቲ ሃይቂን ቢታይ ሚዳይቲ ዉሪካ ዴንዳና፤ ኢስታ ጋርሳፌ ባጋይቲ ሜርና ዴኦስ፥ ባጋይቲ ሜርና ካዉሻሲኔ ዋዬስ ዴንዳና።✝ 3 ሄ ዎዴ ኣ ኤራንቻቲ ሳሎ ፖኦ ማላ ጶላና፤ ዳሮታ ጺሎቴ ኦጌ ካሌዳይቲ ዉሪ ሜሪፔ ሜርና ጋካናስ ሳሎ ጾሊንቴታ ማላ ጾልቃና።

15 ኑ ጎዳ ቃላን ኢንቴስ ጊዛይ ሃይሳ፤ ኑኒ ሃይቆንታ ፓጻ ዲዛይቲኔ ጎዳይ ያና ጋካናስ ጋምኣናይቲ ካሴ ሃይቂዳይታፔ ሲንቶኮ። 16 ጎዳይ ባ ሁኤራ ጊታ ኣዛዞን ኪታንቻታ ሃላቃ ጊሪሳራ ጾሳ ጹሩምባ ጊሪሳን ሳሎፔ ዎና፤ ካሴ ኪርስቶሳ ኣማኒዲ ሃይቂዳይቲ ኢስቲ ካሴቲ ዴንዳና። 17 ሄሳፌ ጉዬ ኑኒ ቃሴ ፓጻ ዲዛይቲ ጎዳ ጫርኮ ቦላ ጋጋናስ ኢስታራ ኢሲፌ ሻራራ ዴንዳና፤ ሄሳካ ኑ ሜርናስ ጎዳራ ዳና። 18 ሄሳ ጊሻስ ሃ ቃላን ኢሶይ ኢሳራ ሚኔቲቴ።

6 ሂስቲኮ ኣኔ ቤጎስ፤ ኣኔ ኑርካ ኑና ሃሮስ ኣቲን ሃንኮ ስኪዛ ኣሳ ማላ ኑኒካ ኣኔ ስኮኮ። 7 ስኪዛይቲ ቃማራ ስኬቴስ፤ ማቲዛይቲካ ቃማራ ማቴቴስ። 8 ኑኒ ጊዲኮ ጋላሳ ኣሳታ ጊዲዳ ጊሻስ ኣማኖኔ ሲቆ፥ ቲራን ማይኢዛ ጹሩሬ ማይኦ ማላ ማይኢዲ ኣቶቴ ሂዶታ ሁኤን ዎዛ ቢራታ ቆቤ ማላ ሁኤን ዎዲ ኣኔ ኑናቴ ሃሪዲ ዴኦስ።✝ 9 ጾሲ ኑ ጎዳ ዬሱስ ኪርስቶሳ ባጋራ ኣቶቴ ዴማና ማላ ኣቲን ኑና ሃንቆስ ጼይጊቤና።

34 «ሂስቲኮ ዎጋይ ባይንዳ ዱሳን፥ ዳሮ ኡሻኒኔ ዱሳስ ሂርጋን ኢንቴ ዎዚናይ ዳቡሮፖ፤ ሄሳ ኦንታ ኢጺኮ ሄ ጋላሳይ ኢንቴ ቆፖንታ ናርጻ ማላ ኢንቴ ቦላ ጋኮንታ ማላ ናጌቲቴ። 35 ሃይሲ ቢታ ቦላን ዲዛ ኣሳ ኡባ ቦላ ጋካና። 36 ሄሳ ጊሻስ ቡሮ ያናይሳፌ ኢንቴ ኬሲ ኤካና ማላኔ ኣሳ ና ሲንን ኤቃናስ ዳንዳያና ማላ ኡባ ጋላስ ሚኒዲ ዎሲቴ» ጊዴስ።

8 ታ ሲቆቶ! ኢንቴ ጊዲኮ ጎዳ ኣቻን ኢሲ ጋላሲ ሺ ላይ ማላ፤ ቃሴካ ሺ ላይ ኢሲ ጋላሳ ማላ ጊዲዳይሳ ሄሳ ሄ ሃኖዛ ባሎፒቴ።✝ 9 ኢሲ ኢሲ ኣሳታስ ሚሳቲዛ ማላ ጎዳይ ባ ዮቲዳ ሂዶታ ቃላ ፖላናስ ጋምኤናኮሺን ኣሲ ዉሪካ ማሬታና ማላኔ ኣይ ኣሲካ ዮንታ ማላ ኮዪዲ ኢዚ ኢንቴ ጊሻስ ታኬስ።

10 ጎዳ ጋላሳይ ቃሴ ካይሶ ዬ ማላ ቆፖንታ ዲሺን ጋኪ ዎና፤ ሄ ጋላስ ሳሎቲ ጊታ ጊሪሳን ኣና፤ ሜቴ ዉሪካ ታማን ጹጌቲ ያና፤ ቢታይኔ ኢዛ ቦላ ዲዛዚ ዉሪካ ጹጌታና።✝ 11 ሄሳ ጊሻስ ሄይቲ ዉሪካ ሄሳ ያናዝ ጊዲኮ ሂስቲን ኢንቴ ጌሻቴን ጾሳስ ጎይኒሼ ዳናስ ኢንቴስ ዋኒ ቤሴኔ? 12 ሄሳ ጊሻስ ጾሳ ጋላሳይ ያናይሳ ኢንቴ ላሞቲዛይታኔ ኢዚ ኤሌሊ ያና ማላ ኦዛይታ ጊዲቴ። ሄ ጋላስ ሳሎይ ታማን ጹጌቲ ያና፤ ሜቴቲካ ታማ ሴላን ሴራና። 13 ጊዶ ኣቲን ኑኒ ኢዚ ኑስ ኢሚዳ ሂዶታ ማላ ጺሎቴ ኦሶይ ኦሴቲዛሶ ኦራ ሳሎኔ ኦራ ቢታ ናጎስ።✝

51 ኣኔ ታ ኢንቴስ ኢሲ ጹራ ዮኦ ዮታይስ፤ ኑኒ ዉሪካ ሃይቆኮ፤ ጊዶ ኣቲን ኑ ዉሪካ ላሜታና። 52 ሄሲካ ሃናናይ ኑ ቆፖንታ ዲሺን ዉርሴ ጹሩምባይ ፑኔቲዛ ዎዴ ቂጲዳ ኣይፌይ ጼሊዛ ማላ ኢሲቶ ሃናና፤ ጹሩምባይ ፑኔታና፤ ሃይቂዳ ኣሳይ ዎቆንታይታ ጊዲዲ ዴንዳና፤ ኑኒካ ላሜታና።

17 ጎዳይ፥ «ሄኮ፥

ታኒ ኦራ ሳሎታኔ

ኦራ ሳኣ ሜና፤

ካሴ ኣዳ ሚሻቲ

ቆፌቴቴናኔ

ሃሳኤቴቴና።

18 ጊዶ ኣቲን

ታኒ ሜዛይሳን ኡፋዬቲቴ፤

ሜርናስ ሆምቦጪቴ፤

ታኒ ዬሩሳላሜ ኡፋይሳስ፥

ኢዚ ዴራካ ሆምቦጬስ

ሜና።

19 ታኒ ዬሩሳላሜን ኡፋዬታና፤

ታኒ ታ ዴሬዛን ሆምቦጫና፤

ሃይሳፌ ጉዬን ዬሆይኔ

ዋሶይ ሄን ሴቴቴና።✝

1 «ሄኮ ጮጬ ታማ ማላ ኤጺዛ ጋላሲ ያና፤ ኦቶራንቻቲኔ ኢታ ኦዛይቲ ዉሪካ ሜላ ሃፓ ማላ ጊዳና፤ ሄ ያና ጋላሳይካ ኢስታ ጹጋና፤ ጼራካ ጻጶካ ኣሼና» ጌስ ኡባፌ ዎልቃማ ጎዳ ጾሳይ። 2 «ታ ሱንስ ባቢዛ ኢንቴስ ቃሴ ጺሎቴ ኣርሼይ ባ ቄፌ ጋርሳን ፓዛዝ ኤካ ያና፤ ኢንቴካ ቢርሺ ዬዲዳ ጋሎ ማራ ማላ ጺኬቲሼ ኬዛና።

1 ሄሳፌ ጉዬ ታኒ ኦራ ሳሎኔ ኦራ ሳኣ ቤያዲስ፤ ካሴ ሳሎይኔ ካሴ ሳኣይ ኣ ቢዳ፤ ሃይሳፌ ጉዬ ኣባይካ ዴና።✝ 2 ጌሻ ካታማያ ኦራ ዬሩሳላሜይ ባ ኣዚናስ ጊጌቲዳ ሚሺራ ማላ ሎኣ ጊጌታዳ ሳሎ ጾሳ ኣቻፌ ዎሺን ታኒ ቤያዲስ።✝ 3 ኣልጋዛፔ፥ «ሄኮ ጾሳ ኣቆሶይ ኣሳራ ዴስ፤ ኢዚ ኢስታራ ዳና፤ ኢስቲካ ኢዛ ዴሬታ ጊዳና፤ ጾሲ ባ ቦንቾን ኢስታራ ኢሲፌ ጊዳና፤ ኢዚ ኢስታ ጾስ ጊዳና።✝ 4 ኢዚ ኢስታ ኣይፌፔ ኣፉን ኡባ ቁጫና፤ ካሴ ዎጋይ ኣዳ ጊሻስ ሃይቆይ ዎይኮ ሙዞቴ ዎይኮ ዬሆይ ዎይኮ ዋዬይ ሃይሳፌ ጉዬ ዴና» ጊዛ ጊታ ቃላይ ኬዚሺን ታኒ ሲያዲስ።✝