1 ኬቲዳ ባሳኔ ሚዛታ ማላ ኢንቴ ኣሳቴ ኦርዲሲዳ ሳማሪያ ማጫሳቶ! ሃይሳ ቃላ ሲዪቴ! ኢንቴ ዳቡራንቻታ ካዉሼታ፤ ማንቆታ ቦላካ ጎዳቴታ፤ ኢንቴ ኣዚናታ፥ «ኑስ ማሲዛ ኡሹ ኤሂቴ» ጌታ።
2 ሄሳ ጊሻስ ጎዳይ ባ ጌሻቴን፥ «ኢንቴስ ሲን ዳፎይ ኣን ኢንቴ ባና ዎዴይ ያና፤ ኢንቴፌ ሄን ቢታ ቦላ ኣቲዳይቲ ቃሴ ማንጻኮን ኦይኬቲ ቢዛ ሞሌ ማላ ኦይኬቲ ባና።
3 «ኢንቴፌ ኢሶይ ኢሶይ ኢንቴ ማታን ዲዛ ሉኮራ ጎሼቲ ጎሼቲ ኬዚዲ ጌዴ ሄሪሞኔን ዬጌታና» ጊ ጫቂዴስ።
ኢስራኤሌ ኣሳይ ባንታ ባላፔ ሲሚቤቴና
4 ጎዳይ፥ «ኢስራኤሌ ዴሬዞ!
ቤቴሌ ቢዲ ናጋራ ኦቴ!
ጌልጌላካ ቢዲ
ናጋራ ጉጂ ኦቴ!
ጋላስ ጋላስ
ኢንቴ ያርሾ ያርሺቴ!
ሄን ጋላስ ጋላስ
ኢንቴ ኣስራታ ኢሚቴ።
5 ኢንቴ ኦናስ ኮይዛይ
ሄሳ ጊዲዳ ጊሻስ
ኢርሾይ ኢዛን ዲዛ ኡኬ
ጋላታ ያርሾ ሺሺቴ፤
ኢንቴ ሄሳ ኢንቴ ሼኔ ማላ
ሺሺዛ ጊሻስ
ኢዛን ጬቄቲቴ» ጌስ።
6 «ኢንቴስ ዶናን ባና ካራ ታ ይሳዳ ኢንቴ ካታማታን ኡባን ኮሻ ዬዳዲስ። ኢንቴ ጊዲኮ ሃ ታኮ ሲሚቤኬታ። 7 ኢንቴ ካይ ጋካናፔ ቡሮ ሄ ኣጊናይ ዲሺን ሲንታ ታ ኢንቴስ ኢራይ ቡኮንታ ማላ ዲጋዲስ፤ ኢሲ ካታማን ቡኪሺን ሃራ ካታማን ቡኮንታ ማላ ዲጋዲስ፤ ኢሲ ጋዴን ቡኪሺን ሃንኮ ኢሳ ጋዴን ኢራይ ዪን ሜሊዴስ። 8 ኣሳይ ሃ ኡያናስ ኮዪሼ ሃ ካታማፔ ሄ ካታማ ቢዴስ፤ ጊዶ ኣቲን ባስ ጊዲዛ ሃ ዴሞንታ ኣጊዳ ጊሻስ ኡዪዲ ኣላናስ ዳንዳይቤቴና፤ ኢንቴካ ታኮ ሲሚቤኬታ።
9 «ኢንቴ ካ ሜሊሲዛ ሃርጌ ታ ኪታዲስ፤ ኢንቴ ኢንቴ ኣታኪልቴኔ ዎይኔ ሚታ፥ ባላሴኔ ዎጋራ ሚታ ኡባ ቦሌይ ሚዴስ፤ ጊዶ ኣቲን ኢንቴ ሃ ታኮ ሲሚቤኬታ» ጌስ።
10 «ታ ካሴ ጊብጼ ቢታ ቦላ ዬዲዳ ኢታ ሃርጌዛ ማላ ሃርጌ ኢንቴ ቦላ ዬዳዲስ፤ ኢንቴ ናቴ ናይታ ማሻን ሃይቃና ማላ ኦዲስ፤ ኢንቴ ፓራታካ ዲኤታና ማላ ታ ኦዲስ፤ ኢንቴ ዲዛሶን ሃይቂዳ ኣሳ ኣሃ ጺንቆይ ኢንቴ ሲ ቱጪዴስ፤ ኢንቴ ጊዲኮ ሃ ታኮ ሲሚቤኬታ። 11 ሶዶሜኔ ጋሞራ ካሴ ታ ይሲዳ ማላ ኢንቴፌ ዳሮታካ ታ ይሳዲስ፤ ኢንቴ ኣቲዳይቲካ ታማይ ሚሺን ኣቲዳ ሚ ዱርጫ ማላ ጊዲዴታ ሺን ኢንቴ ሃ ታኮ ሲሚቤኬታ።4፡11 ሜ 19፡24
12 «ኢንቴኖ ኢስራኤሌ ኣሳቶ
ታኒካ ኢንቴ ቦላ
ሄሳ ኦና፤
ሄሳ ጊሻስ ኢንቴ ታናራ
ኢንቴ ጎዳራ ጋይታናስ
ኣኔ ጊጌቲቴ!» ጌስ።
13 ዙማታ ኦዳዴይ
ጫርኮታ ሜዳዴይ
ባ ቆፒዳይሳ ኣሳስ ቆንጪሲዛይ
ጋላሳ ፖኦ
ጌዴ ማን ላሚዛይ
ቢታ ቦላ ቃሶሆን
ሄሜቲዛይሳ
ሱንይ ጎዳ ሳሎ ጾሳ።