ኣሞጼ ቲንቢቴ 7

ኣሞጼይ ኣጁታን ቤኢዳ ቦሌ

1 ጎዳይ ኣጁታን ቦሌይ ያናይሳ ታና ቤሲዴስ፤ ሄኮ ካዎ ካ ማጼቲ ዉሪዳፔ ጉዬ ጌዶራ ጫሪዳ ኣዛባ ካ ቦላ ጾሲ ማቴ ቦሌይ ኬዛና ማላ ኦዴስ። 2 ቦሌዚካ ቢታ ቦላ ዲዛ ጪሊላ ኡባ ፒቲ ሚዳይሳ ታኒ ቤያዳ፥ «ኡባፌ ዎልቃማ ጎዳዉ! ኔ ዴሬ ቆሆዛ ማራርኪ! ኔ ዴሬ ኢስራኤሌስ ዎልቃይ ባይንዳ ጊሻስ ኢዚ ሃይሳ ዎስቲ ኤቄቲ ዳንዳያኔ?» ጋ ዎሳዲስ።

3 ጎዳይካ ኢስታስ ሚሼቲዲ፥ «ሃይሲ ኔ ቤኢዛይሲ ፖሌቴና» ጊዲ ታስ ዮቲዴስ።

ኣሞጼይ ኣጁታን ቤኢዳ ፒርዳ ታማ

4 ኡባፌ ዎልቃማ ጎዳይ ታና ኣጁታ ቤሲዴስ፤ ጎዳይ ቃጻያናስ ታማ ፒርዳ ዬዲዴስ፤ ታማዚካ ዎጋ ጊታ ኣባ ሚቺዲ ቢታ ሙስ ኦይኪዴስ። 5 ሄ ዎዴ ታኒ፥ «ኡባፌ ዎልቃማ ጎዳዉ! ሃይሳ ታማ ቶይሳርኪ! ኔ ዴሬ ኢስራኤሌስ ዎልቃይ ባይንዳ ጊሻስ ኢዚ ሃይሳ ዎስቲ ኤቄቲ ዳንዳያኔ?» ጋ ዎሳዲስ።

6 ጎዳይካ ኢስታስ ሚሼቲዲ፥ «ሃይሲ ኔ ቤኢዛይሲ ፖሌቴና» ጊዲ ታስ ዮቲዴስ።

ኣሞጼይ ኣጁታን ቤኢዳ ቱምቤ

7 ጎዳይ ታና ሃራ ኣጁታ ቤሲዴስ፤ ቱምቤን ሲቲ ጊ ኦሴቲዳ ጊምቤ ኣቻን ጾሲ ባ ኩሼን ቱምቤ ኦይኪ ኤቂዳይሳ ቤያዲስ።*7፡7 ቱምቤይ ጊምቤ ጊምቢዛይቲ ጊምቤዛ ሲቲ ሂስቲ ጊምባናስ ጎኤቲዛ ሚሽ። 8 ኢዚካ፥ «ኣሞጼ! ሄሲ ኔ ቤኢዛይሲ ኢዚ ኣዜ?» ጊ ኦይቺዴስ። ታኒካ፥ «ቱምቤኮ!» ጋዲስ። ጎዳይ ዛሪዲ ታስ፥ «ቱምቤን ሲቲ ጊ ኦሴቶንታ ጊምቤ ማላ ታ ዴሬ ኢስራኤሌይ ጌላቲዴስ፤ ሄሳ ጊሻስ ሃይሲ ቱምቤዚ ኢስራኤሌ ናይታ ጌላቴ ቤሲዛ ሌሚሶ፤ ታኒካ ኢስታ ቃጻዮንታ ኣጊኬ። 9 ዪሳቂኔ ኢዛስ ናዛ ናይቲ ጎይኒዛ ቃሶሆቲ ላሌታና፤ ኢስራኤሌ ናይቲ ጎይኒዛሶሆቲ ላሌታና፤ ኢዮርባኣሜ ካዎቴ ታኒ ሙሌራ ይሳና» ጊዴስ።

ኣሞጼኔ ኣማሲያሴ

10 ቤቴሌ ቄሴ ጊዲዳ ኣማሲያሲ ኢስራኤሌ ካዎ ኢዮርባኣሜኮ፥ «ሄኮ ኣሞጼይ ኢስራኤሌ ኣሳ ጊዶን ኡቲዲ ኔ ቦላ ኣሳ ዴንስ፤ ሄሳ ማላ ኦሶን ቢታ ሺሪ ዬጌስ። 11 ኢዚካ፥ ‹ኢዮርባኣሜይካ ኦላን ሃይቃና፤ ኢስራኤሌ ዴሬይ ባ ዴሬፔ ዲኤቲ ባና› ጌስ» ጊ ኪቲዴስ።

12 ኣማሲያሲ ኣሞጼስ፥ «ኔኖ ኣጁታ ቤኢዛይሶ! ሃይሳፌ ዴንዳ ኪቻ፤ ዱጌ ዩሁዳ ቢታ ባዳ ሄን ቲንቢቴ ዮታሼ ኔስ ሚዛ ሚሽ ዴማ። 13 ቤቴሌይ ጊዲኮ ካዎይ ጎይኒዛሶኔ ካዎ ዱሳሶ ጊዲዳ ጊሻስ ቲንቢቴ ዮቶፓ» ጊዴስ።

14 ኣሞጼይ ኣማሲያሳስ፥ «ታኒ ዉዴ ሜሄ ሄሚዛዴኔ ኤ ኣይፌ ማጺዛዴ ኣቲን ታ ሁኤስ ናቤ ዎይኮ ናቤ ና ጊዲኬ።*7፡14 ኤ ኣይፌ፡ ኤ ኣይፌ ጌቴቲዛይሳ ኢሲ ኢሲ ባጋ ጋሞ ቃላን ቦባ ኣይፌ ጌቴቴስ። 15 ጊዶ ኣቲን ጎዳይ ሜሄ ሄሚዛሶሆፔ ታና ጼይጊዲ፥ ‹ባ! ታ ዴሬ ኢስራኤሌስ ቲንቢቴ ዮታ› ጊዲ ኣዛዚዳይ ጎዳ።

16 «ሃኢካ ጎዳይ ኔና ጊዛይሳ ሲያ፤

ኔኒ ታና፥ ‹ኢስራኤሌ ኣሳ ቦላ

ቲንቢቴ ዮቶፓ፤

ዪሳቃ ዜሬ ጊዲዳ ኢስራኤሌ

ዴሬዛካ ሳባኮፓ› ጋ ዲጋዳሳ።

17 ሄሳ ጊሻስ ኣማሲያሳ!

ኔ ጊሻስ ጎዳይ፥

‹ኔ ማቼያ ካታማ ጊዶን

ላይማ ማጫስ ጊዳና፤

ኔስ ማጫ ናይቲኔ ኣቱማ

ናይቲካ ኦላን ሃይቃና፤

ኣላጋቲ ኔ ቢታ

ዎዶሮን ዋ

ጊሼቲ ኤካና፤

ኔኒካ ኣላጋ ቢታን ሃይቃና፤

ኢስራኤሌ ኣሳይ ባ ቢታፌ

ዲኤቲዲ ኣላጋ

ዴሬ ባና› ጌስ»

ጊ ዮቲዴስ።