ኣሞጼ ቲንቢቴ 1

1 ኦዚያይ ዩሁዳ ካዎ፤ ሄሳካ ኢዮኣሳ ና ኢዮርባኣሜይ ኢስራኤሌ ካዎ ጊዲ ዲሺን ሄሲካ ቢታይ ቃጻናፔ ናምኡ ላይፌ ሲንን ኢስራኤሌ ጊሻስ ቴቁሄን ሜሄ ሄሚዛይታ ጊዶፌ ኣሞጼይ ቤኢዲ ዮቲዳ ቃላይ ሃይሳፌ ካሊ ዲዛይሳ፤✝1፡1 2ካዎ 15፡1-7፤ 2ታሪ 26፡1-23፤ 2ካዎ 14፡23-29

2 ኣሞጼይ፥

«ጎዳይ ጺዮኔፔ

ባ ቃላ ቁ ሂስቲ ሲሴስ፤

ዬሩሳላሜፔ ጊሬስ፤

ሜሄይ ሄሜቲዛሶቲ ሜላና፤

ቃርሜሎሴ ዙማን ዲዛ

ጪሊላቲ ሹላና» ጊዴስ።✝1፡2 ኢዩ 3፡16

ኢስራኤሌ ሄራን ዲዛ ዴሬታ ቦላ ያና ፒርዳ

3 ጎዳይ ኣራሜስ፥

«ዳማስቆ ኣሳይ ዛሪ ዛሪዲ

ኦዳ ናጋራ ጊሻስ

ታ ኢስታ ቃጻዮንታ ኣጊኬ፤

ኢስቲ ጋላኣዴ ኣሳ

ቢራታ ኣቻራ ዲዛ ካ

ቡኪዛ ሎዳን ቡኪዳ።

4 ካዎ ኣዛሄሌ ኬን

ታማ ዬዳና፤

ሄ ታማይ ካዎ ቤኒ-ሃዳዴ

ሚጻታ ማና።

5 ዳማስቆ ካታማ ፔንጌታ

ታ ሜንሬና፤

ቤቲ-ኤዴኔ ዴሬ ካዎዛኔ

ኣዌ ዙላን ዲዛ ኣሳ

ታ ይሳና፤

ኣራሜ ዴሬ ኣሳይካ ዲኤቲዲ

ጌዴ ቂሬ ዴሬ ባና» ጌስ።✝1፡3-5 ኢሳ 17፡1-3፤ ኤር 49፡23-27፤ ዛካ 9፡1

6 ጎዳይ ፊሊስጼሜስ፥

«ጋዛ ኣሳይ ዛሪ ዛሪዲ ኦዳ

ናጋራ ጊሻስ

ታ ኢስታ ቃጻዮንታ ኣጊኬ፤

ኢስታ ዴሬዛ ኡባ ዲኢ ኤፊዲ

ኤዶሜስ ባይዚዳ።✝1፡6-8 ኢሳ 14፡29-31፤ ኤር 47፡1-7፤ ሂዚ 25፡15-17፤ ኢዩ 3፡4-8፤ ሶፎ 2፡4-7፤ ዛካ 9፡5-7

7 ኢዚ ጊምቤታ ማና ማላ

ጋዛ ሚጻን ታኒ ታማ ዬዳና።

8 ኣስቄሎና ዴሬ ካዎዛኔ

ኣሽዶዴ ዴሬ ኣሳ

ታ ፒታ ይሳና፤

ፊሊስጼሜን ዲዛይቲ

ዉሪ ዉራና ጋካናስ

ታኒ ታ ኩሼ ኣቃሮኔ ቦላ

ዴንና» ጌስ።

9 ጎዳይ ጺሮሴስ፥ «ጺሮሴ ኣሳይ

ዛሪ ዛሪዲ

ኦዳ ናጋራ ጊሻስ

ታ ኢስታ ቃጻዮንታ ኣጊኬ፤

ኢስቲ ባ ኢሻቴ

ጫቆ ቃላ ላሊዲ

ባ ዲኢዳ ዴሬዛ

ኡባ ኤዶሜስ ባይዚዳ።

10 ሄሳ ጊሻስ ታኒ ጺሮሴ ካታማ

ጊምቤታ ቦላ ታማ ዬዳና፤

ሄ ታማይ

ኢዚ ሚጻታካ ማና» ጌስ።✝1፡9-10 ኢሳ 23፡1-8፤ ሂዚ 26፡1—28፡19፤ ኢዩ 3፡4-8፤ ዛካ 9፡1-4፤ ማቶ 11፡21-22፤ ሉቃ 10፡13-14

11 ጎዳይ ኤዶሜስ፥ «ኤዶሜ ኣሳይ

ዛሪ ዛሪዲ ኦዳ

ናጋራ ጊሻስ

ታ ኢስታ ቃጻዮንታ ኣጊኬ፤

ኢስቲ ባ ኢሻታ

ኢስራኤሌ ናይታስ

ቃቶንታ ማሻን ጎዲዳ፤

ባ ሃንቆ ዶሺሶንታ ኤጺዲ

ኢስታስ ሚሼቶንታ

ኡባ ዲፒ ሂስቲዳ።✝1፡11-12 ኢሳ 34፡5-17፤ 63፡1-6፤ ኤር 49፡7-22፤ ሂዚ 25፡12-14፤ 35፡1-15፤ ኣብ 14፤ ሚል 1፡2-5

12 ሄሳ ጊሻስ ታኒ

ቴማኔ ጊምቤታ ቦላ

ታማ ዬዳና፤

ሄ ታማይ

ቦጺራ ሚጻታካ ማና» ጌስ።

13 ጎዳይ ኣሞኔስ፥

«ኣሞኔ ኣሳይ ዛሪ ዛሪዲ

ኦዳ ናጋራ ጊሻስ

ታ ኢስታ ቃጻዮንታ ኣጊኬ፤

ኢስቲ ዴሬ ዛዋ ኣሳናስ

ጋላኣዴ ዴሬ

ሻራ ማጫሳታ

ኡሎ ዳኪዳ።✝1፡13-15 ኤር 49፡1-6፤ ሂዚ 21፡28-32፤ 25፡1-7፤ ሶፎ 2፡8-11

14 ሄሳ ጊሻስ ኤራባ ካታማ

ጊምቤታ ቦላ

ታኒ ታማ ዬዳና፤

ሄ ታማይ ኢስታ ሚጻታ ማና።

ሄሳፌ ጉዬ ኦላ ጋላሳን

ዋሶይ ዳራና፤

ኦላዚካ ጎቴ ጫርኮ ማላ

ኤሶታና።

15 ኢስታ ካዎይኔ

ዳናቲ ዲኤታና» ጌስ።