Sinais do fim dos tempos

14 Anumzamofo kuma’mofo Knare Musenkea miko mopane mopane huama hutesageno, hagi vagarekna egahie.

29 Tusi’a knazama evutesigeno’a, ana knafina ame huno zagemo’a tusi’a haninkisigeno, ikamo’a tavira ontesigeno, ofuzagamo’a monafintira atafriramisigeno, hagi monamofo hankavemo’a kogekoge hugahie. (Joel 2:31, Rev-Huf 6:12, 13) 30 Ana hanigeno Vahe’mofo Mofavremofo avame’zana monare fore hanige’za, mika kazigatira nagate nofite vahe’mo’za zamasunku nehu’za negesageno, Vahe’mofo Mofavre’a tusi’a hanave’ane masazama’afi mona hamponte eramigahie. 31 Hagi ankero vahe’zaga’a huzamantesige’za ufena nere’za, mopa omete emete huneregati’ma Agrama huhampri’ma zmante’nemokizmi, monamofo mago agentega vuno mago agentegatira zmavare atru hugahaze.

42 E’ina hu’negu kavua ketenka manio, na’ankure kagri Ramo’a nanknare egahio, kagra ontahi’nane. 43 Hianagi ama’na kea antahi ankerenka antahio, nomofo nefa’ma musufa ne’mo’ma kenagepima ne-esia knama antahi ankere’nesuno’a, agra kvahu ankere’neno atresigeno noma’a tagana vazino uofregahie. 44 E’ina hu’negu tamagranena trotra hiho, na’ankure Vahe’mofo mofavremo’a tamagra egahie hutma antahi omisaza knazupa egahie.

20 Nagrama huramantoa kasege rempi huzaminke’za ana miko vahe’mo’za avaririho. Hagi kama antahiho, Hakare zupa tamagra ne manina nevanenkeno makaza vagaregahie.

Jisasi’ma esia kna mago vahe’mo’e huno ontahine hu’nea naneke

32 Hianagi mago vahe’mo’e huno anazama fore’ma hania knane zagenena ontahi’ne. Monare nemaniza ankero vahe’mo’za ontahi’zageno, Mofavre’amo’a ontahi’ne. Nefa Agrake ana kna antahi’ne.

Mona Mopa vagaresia knafi fore hania kna’zamofo naneke

1 Hianagi kagra Timotiga antahi ani' huo, mona mopa vagaresia knama atupa’ma hanigeno’a, tusi’a knaza fore hugahie. 2 Na’ankure ana knama fore hanige’za, vahe’mo’za zamagraguke zamagesa nentahi’za, zagogu zamesinente’za, zamagra zamufga ra nehu’za, vahe zamage henkami netre’za, urinkege nehu’za, zamarera zamafa naneke erizafa osu’za, vahera muse kea huozmante’za, agru hu’za omanigahaze. 3 Vaheku zamavesi ozamante’za, kumizmi otrente atrente nosu’za mago zamarimpa hu’za eri fatgo osu’za, vahe zamarimpa nere’za, vahe zamefiga’a ke nehu’za, manirava ohe’za, vahe zamata zamizankuke nehu’za, knare’zama hu’zankura zameosigahie. 4 Hagi vahera komoru (betray) hunezmante’za, vaheku antahiozmi’za, osu’naza zante havige hu’za zmavufga ra nehu’za, mopafi mani’zante zamesinente’za, Anumzama avesi antega kana atregahaze. 5 Zamagra Anumzamofo avu’avara amega zamufareti nehu’za, zamagra tusi’a hanave Anumzamofompi me’neana zamefi hunemize. E’inama nehaza vahera nezmatrenka mani rure hunka manio.

17 Hagi vagare knafina, Anumzamo’a anage hu’ne, Nagra Avamuni’a vahepi eri herafi atresugeno, tamagri ne’mofatamimo’za, kasnampa kea huama nehanage’na, kasefa vahe’mo’za ava’na keaza nehanage’za, ranafa tamimo’za ava’na kegahaze. 18 Nagri eri’za * vahera, vene’nere ene, a’nerera Nagra Avamu’ni’a ananknafina eri herafi atresuge’za zamagra kasnampa kea hugahaze. 19 Nagra monafina ruzahu’za eri fore nehu’na, kaguva avame’za ama mopafina erifore nehu’na, korane, tevene, hampone tokira hugahie. 20 Zagemo’a rukrahe huno hani hanigeno, ikamo’a kora hanigeno, henka tusi’a hanave’nentake Ramofo kna egahie. 21 Ana nehanigeno miko vahe’mo’za, Ramofo agi hanta nevazisamo’za zamagu’vazinke’za knare kuma erigahaze. (Jol 2:28-32.)

(Aposolo 2:17-21)

28 Ana zantamima evu vagamaretena Nagra Avamuni’a maka vahepi eri herafi atresugeno, tamagri ne’mofatamimo’za, kasnampa kea huama nehanageno, kasefa vahe’mo’za avana’gnaza negenageno, ranafa tamimo’za ava’na kegahaze. 29 Ana knafina kazokazo eri’za venenere’ene a’nere’enena Nagra Avamu’ni’a eri herafi atregahue.

Henkama maka zamo’ma vagama renaku’ma hania knafima fore’ma hania zamofo naneke

1 Hanki ugota ankero ne' Maikoli’a Israeli vahe’motma kegava huneramantea ankeronkino, ana knafina agra otigahie. Ana knafima fore’ma hania knazana, magore huno ama mopafina fore osu’neankna knaza fore hugahie. Hianagi Danieliga kagri vahe’ma zamagima avontafepima me’nesnia vahera Anumzamo’a zamagu vazi’nige’za knare hu’za manigahaze. 2 Hanki ko’ma frizage’zama ase zamante’naza vahera fri’nafintira ete otigahaze. Anama hute’za mago’amo’za manivava zamasimu enerisnage’za, mago’amo’za tusi zamagazegu nehu’za ana zamagazefi manivava hu’za vugahaze. 3 Hanki knare antahi’zane vahe’mo’za monamo’ma remsama hiaza hu’za remsa nehanage’za, rama’a vahe’ma zamavare’za fatgo avu’avapima nevanaza vahe’mo’za, ofumo’ma hiaza hu’za maka zupa remsa huvava hu’za vugahaze.

15 Na’ankure amanahu kante Ramofonkea neramasamune, mani’nona vahe’mota ovu’nenunkeno, fri’naza vahe’mo’za otiza ugota hu’za marerigahaze. 16 Ramo’a Agra’a monafinti eneramino, hanavege huno kezanke nehanigeno, ugota ankeromo’a ageru nerinkeno, Anumzamofo ufemo krafa nehanigeno, vahe’mo’za Kraisinte zamentinti hute’za frinesaza vahe’mo’za kote’za kerifintira otigahaze. 17 Anantera tagrama ofritama maninesuna vahe’mota, tavresigeta mrerita hampompi omeri mago huteta, magoka anagamu Ramofona ome tutagiha hunenteta, maka kna Agrane manivava hugahune. 18 E’ina hu’negu ama nanekenu, magoke magokemofona ozamazeri hanaveti azamezeri hanaveti hiho.

6 E’ina hu’negu atrenketa mago’amo’za nemasazaza huta omaseta, tavumo’a hari nehina, ama' antahintahi e’nerita kva huta manigahune. 7 Na’ankure zmavuma masaza vahe’mo’za kenegeke nemasageno, aka tima nenaza vahe’mo’za, kenageke aka tina nene’za neginenaze. 8 Hianagi tagra masare vahe mani’nonanki, atrenketa ama' tagutagesa nentahita, tamentintima huzane, vahe’ma avesinte avu’ava zana tamimizare hanko reheriaza nehuta, Jisasi’ma taguvazino tavresiazanku nentahita amuhama nehunazana, fetori anteaza huta antegahune. 9 Na’ankure Anumzamo’a rimpahe’zama’a erigahaze huno huorantene. Hianagi Ranti Jisas Kraisimpinti tahokeno taguvazizana erisunegu huhamprirante’ne.

Eri’za vahe’mo’za kva hanaza naneke

34 Jisasi’a mago’ane anage hu’ne, Tamagra kva hiho. Ru negi ti neta negineneta, makazana kva huso’e nosuta, tmavufamofo zanku antahintahi hakare hanagi, e’inahuma hanageno’a krifumo zagagafa azeriankna hu’nenigeno, ana knamo’a ame huno onkesageno tamagritera efore hugahie. 35 Na’ankure maka ama mopafi mani’naza vahete ana knamo’a efore hugahie. 36 Hanki tamagra maka knafina kva hutma maninetma, nunamuna huvava nehutma, hankavetita mani’neta ana maka knazama efore’ma haniana agateneretma, Vahe’mofo Mofavrema esigura avega anteho.

8 Hianagi navesi neramantoa ronenimota amazana tamagera okaniho, Ramofontera mago zage ferumo’a 1tauseni’a zagekfugna higeno, 1tauseni’a zagekafumo’a magoke zage ferukna hu’ne. 9 Ramo’a huvempama hu’nea kerera, mago’a vahe’mo’zama nentahizaza huno akoheno eri’zana e’norie. Hagi akoheno kavega anteno mani’neno, mago’a vahe’mo’za fanane osnaze huno mani’ne. Hianagi maka vahe’mo’za zamagu’a rukrehe hanazegu zamavega anteno mani’ne.

Monane mopane fanane hania naneke

10 Rantimo’ma esianknamo’a kumzafa vahe’mo’za ontasmi’za neazankna hanigeno, monafima me’neazamo’a ra ageru neruno fanane hanigeno, tusi’a amuhonentake tevemo maka’zama ama mopafi me’neazana tefanane hugahie.

11 E’inahu kante ana makazamo vagaregahianki, tamagra inankna hutma manigahze. Mani ruotge nehuta, Anumzamofo fatgo avu’avaza nehutma, mani’nenkeno anazana fore hino. 12 Ananknama esie hanutma eri’za enerinkeno, ame huno eno. Anankna zupa tevemo mona te fanane nehanigeno, maka’zana te maramra huno, te mekitrere hugahie. 13 Hianagi Anumzamo’a ko huvempa huranteno kasefa monane mopane tro hanugeno, fatgo avu’avazamoke megahie hu’ne. E’i anazama fore hanigu avega ante’none.

51 Oku naneke tmasami’za huanki antahiho, mika’mota ofrigahunanagi tagra ruzahe hugahune. 52 Mago knama esigeno’a, tavuraga keramage nehuna kna huno, vagare ufenkrafa hanigeno’a, ana fri’naza vahe’mo’za o’netisageta mika kasefa huta mani’nomota tavufamo’a ruzahe hanigeta onkasari hanave tavufa erigahune.

Ra Anumzamo’ma kasefa monane kasefa mopanema tro hania zamofo naneke

17 Hanki antahiho, Nagra kasefa monane kasefa mopanena tro hugahuanki’za, ko’ma fore’ma hu’nea zamo’a antahintahi zamifina mago’enena omanesanige’za zamagesa ontahigahaze. (2 Pita 3:13, Revalesen-Hufo hu’nea naneke 21:1) 18 Hianagi Nagrama kasefa’zama tro’ma hanua zanku muse huvava nehuta manigahaze. Nagra Jerusalemi kumara vahe’mo’zama musema hu’za manisaza kuma retro hugahue. Ana kumapima manisnaza vahe’mo’za tusi muse huvava hugahaze. 19 Nagranena Jerusalemi kumakura muse hunente’na, vaheni’agura antahi so’e huzmantegahue. Ana nehanugeno Jerusalemi kumapima zavi krafama nentahiza zana hu’za mago’enena ontahitfa hugahaze.

Ra Anumzamofo knare’ma ranra zama fore hania zamofo naneke

1 Monafi sondia vahe’mofo Ra Anumzamo’a anage hie, maka’zama refkoma hanua knamo’a, avenifima tevema hugre’nageno keonke zama tefizo nehiankna kna neankino, avufga rama nehia vahe’ene, kefo avu’ava’ma nehia vahe’enena, hagage trazama tevemo’ma tefanenema hiaza hugahie. Ana tevemo’a arafunama, azankuna’ma, maka’zama 'anena tefanane hugahie. 2 Hianagi Nagri nagigu’ma koro’ma nehuta, nagoraga’ama nemaniza vahe’motarera, hanavenimo’a tamagrite’ma efore’ma haniana, fatgo avu’avaza zamo’a zagemo’ma hiaza huno remsa hunermanteno, tamazeri knamarena bulimakao anentamo’ma keginafinti’ma atiramino ne-eno muse huno haru huno takaure takaure huno vano hiankna hugahaze.

Kahefa monane mopane fore haniazamofo naneke

1 Anantera kasefa monane, kasefa mopane ke’noe. Na’ankure ese monane, ese mopamo’a fanane higeno, mago’enena hagerina omane’ne. 2 Anantera kogeno Ruotge hu’nea rankumara e’i kasefa Jerusalemo, Anumzamofontegati mona atreno eramino, a’mo’ma vema erinaku’ma retro’ma huno eaza huno e’ne. 3 Anantera antahugeno kini tratetira, ranke huno anage hu’ne, Keho! Anumzamofo mono nomo’a vahe’ene nemanianki’za, Agra zamagrane nemanisigeno, Agri vea zamagra nemanisageno, Anumzamo Agra’a zamagri amu’nompina manigahie. 4 Ana nehuno maka zamavunura eri homu huzmante vagaresigeno, mago’ene fri’zana omnenkeno, zamasunku hu’za zavi’ma ate’zana omnena, zamatama krizana omnenigeno, ese’ma me’nea zantamina omnegahie.