Sinais do fim dos tempos

14 Te, God yoba kingno mogl, suglno morabuka ka wakai i, ede yoba yugobuno pere pere u koglo koglo meglmara enan, mudu praiglkwa paugwa. Ye pre kodibi, taragl mudu dudunabuka ege i, okuo ime unabiwe di, Jisas yegl dugwa.

Yoba Wam ede ikne unabuka

29 Ana Jisas yegl didre, ama yegl dugwa,

Yubun podo kide yegl unan, mokomugl i taragl tau tabre plau dinabuka. Ade ake mim eran, ba ama abuglage sikrabuka. Kugl kuri paigwa i, yage makandigle sibi, taragl tau heven ibo gigledi paigwa i, ama piga kar dinaiglkwa.* 30 Igne i, na Yoba Wam moglka i, kamun mitna ibo plau didre, na yobuglna ya abuglagena podo paugwa i nogugl edibo, kanaiglkwa.* Yoba yugobuno mudu meglkwa i, na kandre, kai eraiglkwa. 31 Eribi, biugel podo ta boran, na angelona dedibo, ye ede uglo koglo koglo pidre, na yoba ta kere i pere edigo, meglkwa i, yu makai sinaiglkwa. Ye ade umara ya ade beimara pidre, te nigl bre ya nigl beye pidre, na yobanama yu makai sinaiglmiwe di, Jisas yegl dugwa.

42 Ene Yaglno Kade aunake unabuka i, ene pre kan erekrikwa pre kwi ere molo. 43 Prio. Kunogl gogl yoba eduer suna unabuka i, yugu nem yagl aunake unabuka i, pre kan eruma, ye kwi ere moglsre, kunogl gogl yoba ede yugugl u dinabedi si kegl dugo. 44 Yegl paugwa pre ene aimadi kwi ere molo. I siragl pre na Yoba Wam moglka i, ege ta prikraiglkwa ege ikne unagliwe di, Jisas yegl dugwa.

20 Nigl bugl tedre, ka mudu ene duglo boraiglmedi beke teiga i, ye ama duglo boraiglmedi beke teo. Te, ene prio. Na ene bogl aimadi akie moramga. Ege erme munga i dudinan, okuo na ene bogl aimadi mogl pai moramniwe di, Jisas yegl dugwa.

Jisas ere mogl, Na aunake unaglka, yoba ta prikrime dugwa

32 Jisas yegl didre, ama yegl dugwa, Na aunake igne unaglka i, ade kwia mo ege i, yoba ta pre kan erekrikwa. Yoba ta pre kan erekriko, angelo heven ibo meglkwa i pre kan erekriko, te na God Wam moglka i ama pre kan erekrika. Na Nina swara ege i pre kan erukwa.

Okuo kaima ime, siragl taragl plau dinabuka

1 Te, ene ama pre pogl sinatnga i, okuo ibor ege kide ta unabuka. 2 Ege i unan, yoba ye yene wakai kandre, mige moni ama wakai kandre, ye yene pre i mitna ede, kagno ake mitna edenaiglkwa. Yoba yegl mere ersre, te, ye yoba pere ka kide di tedre, neno mano kano prikre, yoba ye wakai ere tenaiglkwa i di wakai yei tekre, ama God mokono tenaiglkwa. 3 Yoba okuo yegl mere ersre, ama ye yoba pere deno muduno tekre, yoba ye aglau ere tenaiglkwa i kide kodokre, yoba pere kenaglno sinaiglkwa. Ye yegl ersre, te mabuno kide ye deno muduno mina pogglau borabuka i mane dikre, yoba ere sidre, mabuno wakai kide yomedi kanaiglkwa. 4 Yoba mabuno yegl ersre, te ye ama yoba pere i pi kudano ikne ogono mina yedre, mabuno gua gua tabre ersre, mogl mitna kaima edumnedi praiglkwa. Te, ye ama God wakai kanaiglkwa i kankre, ye erme gun yenaiglkwa i keme wakai praiglkwa. 5 Ye ka mabuno prumnedi eraiglkwa ba God ye meglmara kogon yobuglo erabuka i, ye mane dinaiglkwa. Yoba yegl mere ta moraiglmara i, ene mogl eglke edo!

17 God yegl dugwa, Ege okuo, taragl mudu dudinagledi erabuka igne,

Na ere mogl, Murubuglona yoba mudu meglmara dedenagle dugwa.

Na dedibo, yoba mudu meglmara enan, ene wanoma ya abroma na kana kep ere dinaiglkwa.

Dibi, te ene yagl kulu meglkwa i, gumuglnomugl eran, kanibi, te, ene yagl kidagl meglkwa i ugl kubu kane kane kanaiglmiwe*

di, God yegl dume dugwa. 18 Yegl didre, ama God yegl dume dugwa,

Igne i, na ere mogl, na Murubuglona dedibo, na niglna kogona yoba mudu meglmara ka kaima enabuka. Dedibo, na niglna kogona yagl ya abu meglmara enan, ye na kana kep ere, yoba di tenaiglmiwa. 19 Te, na ama diu tau kamun mitna ibo ya dumo makan mina eraglka. Eribo, yoba ye bormai ya doga ya te, ede inge podo kide kaima plau dinan, kanaiglkwa. 20 Te, ade mim eran, ba ake bormai ede, ede u gogl enabuka. Yegl eran, okuo i na Yagl Kade moglka i, egena podo kide kaima, na yoba ka tage tenaglka ege i, unabuka. 21 Ana yoba ta ere mogl, na Yagl Kade moglka i, ye na ere inabedi agle ta dinan, na ye ere inaluwe*

di, God yegl di togo, yagl Joel ikra boglmiwe di, Pita yegl dugwa.

15 Nono Yaglno Kade yene okna ka ta di noruko, no erme ene di tomga. Ka i, yegl mere paugwa, Nono Yaglno Kade ede ikne unabuka igne i, nono tau goglkre, kor mogl pai moramga i, nono ta ede okna pi, ye tegigl yekramga ba yoba ta pre mediglsre, geglkwa i komnaye adiglbi, nono ye bogl u swara pidre, ege swara ta ogono nagino mina Jisas tegigl yenamga. 16 I siragl mere plau dinabuka i, yegl mere paugwa, nono Yaglno Kade Jisas yene heven ibo kide kodo, ede atne udre, ka podo kide kaima ta dinabuka. Dinan, angelo swara ta angelo tau bitno moglkwa i ama ka podo dinan, God biugelmo borabuka. Boran, taragl komono kana plau dinabuka i, yoba ta Krais pre mediglsre, geglkwa i, ye ogono nagino mina adigl u kor enaiglkwa. 17 Adigl u kor ebi, nono pre medunga yoba tau goglkre, kor mogl pai moramga i, ye bogl u swara pidre, ede egli ibo pi, kamun kua mina suna pidre, Yaglno Kade kamun mitna unabara i, ye tegigl yenamga. Nono Yaglno Kade Jisas tegigl yedre, ye bogl aimadi kamin akie moramga. 18 Taragl yegl mere okuo plau dinabuka pre enene ka i poglo di pramnedi di ikne ikne edidre, deno muduno ikne ikne si gigle di teo.

6 nono siragl mere wan, mogl pai erumga i kan pogl sidre, yomere pamere wan moramga paugwa. Yoba pre mediglkrikwa i, ye siragl mere wan, mogl pai erikwa i, kiurikwa pre ye ugl du paigwa mere yegl paugwa ba nono yegl ta erekramga paugwa.

7 Eduer yogwa i, yoba ugl du pai, pre pogl sikrikwa ege yogwa. Te, eduer yogwa i, yoba spak erikwa ege yogwa. 8 Ba nono munga i, ermine wan munga yoba munga mere yegl paugwa pre nono nomano mina pre pogl sidre, yomere pamere wan moramga paugwa. Soldia kuda kugugl gagl edimere mere yegl, nono God kamo pre medigl moglsre, deno muduno ikne ikne tomun, nono ain pitno mina padunga mere yegl panabuka. Te, God nono ere i kodumiwedi pre gi dumun, nono ain bitno gagl edumga mere yegl panabuka.

9 Ana God okuo yoba ere sinabuka igne i ye nono ere inan, nono ama suna mogl, yubun ikramga i, nogugl paugwa. I siragl pre God nono ka tage noragledi di padiglkrukwa ba nono Yaglno Kade Jisas Krais kogon erumara i mina ye ka ta di paduglkwa i, Na yobanama ere ibo, ye yubun ama i dinaiglmiwe di, ka yegl di padigl kodugwa.

Jisas duglo beglkwa yoba i, ye Jisas unabedi sugl kan moraiglkwa paugwa

34 Jisas yegl didre, ka ta ama yegl dugwa, Ene kan kun erio. I siragl pre ene gua gua ere, spak ersre, erme makandigle siragl mere mogl pai eraiglkwa i pre yubun debi, taragl i ene nomano mina kau sinabuka. Kau sinan, ege i tabre plau dinan, 35 dua kabu kigln keglko, simere mere yegl, ene wai kuraiglkwa. I siragl pre ege i, makandigle yoba mudu moraiglmara plau dinabuka. 36 Yegl pre ene ege ege sugl kan moglsre, God yobuglo bogl norabedi kamage erio. God ene yobuglo bogl tenan, yubun i ene si atne edekran, ene na Yoba Wam gumuglna mina adigl mogl, wakai moraiglme di, Jisas yegl dugwa.

8 Ana agrama abarama wagle, dena muduna suna meglkwa i, God okuo yoba kotno prisre, dumo makan ere kide erabuka ba ene ka swara ta pre moraiglkwa paugwa. Ka i yegl mere paugwa, Yagl Kade gumuglo mina ege swara ta yogwa i, bugla yugu 1,000 bogl kuno yogwa. Te, bugla yugu 1,000 i, ama ege swara bogl kuno yogwa. 9 Yagl Kade ye ede ikne unagledi ka kaima di te paduglkwa i, ye tau kanana moglsre, ede ikne ukrumedi yegl ta prikramga. Yoba tau yegl mere praiglkwa ba nono pre pogl sinamga i, Yagl Kade tabre ede ikne ukrukwa i, siragl pre ye yoba goraiglmedi prikrukwa. Ye yoba mudu nomano yake tenaiglmedi prisre, sugl moglkwa.

God ye kamun mitna ya dumo makan kor ere yenabuka

10 Ana Yagl Kade unabuka igne i tabre plau dinabuka. Yoba ugl paigwa igne, kunogl gogl yoba ede yugugl wimere yegl, yoba kankre meglbi, tabre plau dinabuka. Ege i plau dinan, ade ba ya kugl kuri bla didre, doga de, dudinaiglkwa. Te, dumo makan ya yoba taragl kane kane dumo makan mina erikwa i, doga de kodinabuka.

11 Ana taragl kane kane yegl mere u kide pi kodidre, dudunabuka pre ene siragl mere mogl pai eribi, kuno erabedi prime? Ene God we di pre wan moglsre, ye mabunomo duglo bogl moraiglkwa paugwa. 12 Te, God ege ta Yagl Kade unabedi di paduglkwa i, ene ege i tabre unabu ba di prisre, kie ere molo. Ege i unan, kamun mitna ibo ya taragl kane kane mitna ibo paigwa i, doga dedre, de kurdi ede u kide pi kodinaiglkwa. 13 Ba God ka kaima di noro paduglkwa i, ye kamun mitna ya dumo makan kor ere yenagle dugwa. Te, dumo makan kor i mina mabuno du keme panabuka. Yegl pre nono kamun mitna ya dumo makan kor i, unabedi kie ere munga.

51,52 Yegl paugwa ba ene prio! God kamo ta okna teke paugwa ba erme di norukwa i, ene di tebo, praiglkwa. Nono Jisas yobama ta munga i, mudu ta goglkramga. Tau goraiglkwa ba tau yoko meglbi, Jisas ede ikne unabuka. Ye ede ikne unabuka igne i biugel podo ta boran, yoba gumuglno kubugl kai simere yegl, nono ogono nagino tabre kaima u kor enabuka. Jisas yobama ta gogl kodigwa i adigl u kor pidre, ogono nagino kor aimadi kamin panabuka i ibi, te tau goglkre, yoko moraiglkwa i ama ogono nagino kor kuno yegl inaiglkwa.

God dumo makan ya kamun mitna ibo kor ere yogwa

1 Ana okuo na kaniga i, dumo makan ya kamun mitna ibo erme paigwa i, imim daiglko, God dumo makan kor ya kamun mitna ibo kor ere yogwa.* Te, dumo makan kor i, mudi nigl ama moglkrukwa. 2 Te, na ama kaniga, God sitimo, dumo Jerusalem kor i, God moglmara heven ibo yei, ede atne ugo, na kaniga. Abu ta ede yagl enabedi pre yoba ekin wakai gagl teimere mere yegl, God ye dumo Jerusalem kor i, ere wakai ere yei kodidre, ede atne edugwa. 3 Ede atne edugo, yoba ta sia king yomara mogl, ka podo ta dugo, na prika. Ye yegl dugwa, Ene kanio! God sel yugumo erme yoba meglmara suna yenan, God ye yoba meglmara suna kipai moran, yoba i ye yobama moraiglkwa. God ye meglmara suna moglsre, 4 kaino nuglo ta yage sinabuka i koko ede tenabuka. Te, yoba okuo ta goglkribi,* yoba kai ersre, kai giglage sigwa ya giugl prikwa i, okuo ama ta manabuka. I siragl pre taragl kane kane okna pamere yegl ta paikrabuka. Dudumiwe di, yegl dugwa.