1 Ana wakan kade ege ta Jisas ye duglo beglkwa yagl bogl wan ede pi yoba kugl mogo ere yaiglmara suna eigwa. Ye ede suna eigo, ye duglo beglkwa yagl kidan gogl, kugl mogo tau ursre, nedre, nedre, ede eigwa. 2 Ne ede eigo, Farisi yoba tau kandre, ye di te, yegl digwa, Ene duglo beglkwa yagl erima, kano! Ye Wakan Kade ege mawagl pamara kugl mogo si yuime digwa. 3 Yegl digo, Jisas di ikne ede, yegl dugwa, Okna ibo Devit ya yoba tau ye bogl akie meglkwa i, kidan geglko, Devit siragl mere erukwa i, ene kerimo mo kerekrime? 4 Ye God yugumo yomara ede yugugl pidre, bret tau God gumuglo mina yeigwa i tau i nedre, yoba ye bogl akie meglkwa i ama tau togo, neigwa. Lo dugwa i, tawa teigwa yoba keme bret i nenaiglme dugwa ba Devit kidan goglkwa pre yegl erume dugwa.

5 Te, ene God lomo kere kankrikwa paugwa. God lomo dumere mere wakan kade ege tawa teigwa yoba God yugumo mina kogono ere pai meglkwa ba ye kogon erimara i, wakan kade lomo ta si biglki dikrikwa. 6 Te, na wiga i, na tawa teigwa yugu kogonmo paugwa i, egre atne ediga. 7 God kamo bage ta dugwa i, Na ene tawa naraiglmedi prikrika. Ene yoba pere mitno goraiglmedi priwe* dugwa. Bage i pre pogl sima, na duglo beglkwa yobama kenaglno ta sikriko, dugwa. 8 I siragl pre na Yoba Wam moglka i, wakan kade ege i, na Nem Yagl moliwe dugwa.

9 Ana Jisas dumo i kide kodidre, ede yoba i ka mabuno yuguno yugugl ta ogo, 10 yagl ta ogo koglo mawa sugwa ama yugugl moglkwa. Ana Farisi yoba ye Jisas aglau ere dinan, kot ere tenamnedi prisre, ye yegl di prikwa, Wakan kade ege, yoba ta kide sinan, ere wakai ere tenamga i, mawagl panabo mo paikrabe? digwa. 11 Yegl digo, Jisas di ikne ede, ka ebrie ta yegl dugwa, Ene wakan kade yogwa pre sipsip ta kiglbi, yage maugl atne sinan, kanige eriaglmo mo erekraiglme? Kodio, ene gudu i meda edenaiglkwa. 12 Ene sipsip pre yegl eraiglkwa ba yoba taragl kade paugwa pre wakan kade ege nono yoba ere wakai ere tenamga i, mawagl ta paikrumiwe dugwa. 13 Jisas yegl didre, yagl ta ogo mawa sugwa ikra yegl di togwa, Ene ogon ake duglo suo! dugwa. Yegl dugo, sugo, ogo koglo pamere yegl u wakai ogwa. 14 Yegl erukwa ba Farisi yoba kandre, ede meda pi, yene makai si mogl, Jisas siragl mere ere kide ere tenaiglmere i pre ka di keglkwa.

15 Ana Farisi yoba nomano pamere i, Jisas pre kan erukwa pre dumo i kide kodo, ede ogwa. Te, ye omara i, yoba mere kide ye duglo bogl ede eigo, yoba tau kide sigwa i, Jisas mudu ere wakai ere togwa. 16 Ere wakai ere tedre, ye di te, Na ira moglka i, yoba ta di tekrio di, mane dugwa. 17 Ka kep yagl Aisaia okna God dra idre, dugwa i, plau dinabuka pre Jisas yegl erukwa. Aisaia ka kep ere yegl dugwa,

18 Na yagl ta kere igo, ye na niglna kogona yoba moglma kanio. Na dena muduna ye tedre, ye we di prika igne, na gun yeiga,

Na Murubuglona ye tebo,

ye mabuno du Jentail yoba di pogl tenabiwa.

19 Ye yoba bogl nonga ta dikre, ka podo ama ta dikrabuka.

Te, ye konbauna adigl mogl, ka podo ta dikrabuka.

20 Yoba ta yobuglno paikrabuka mo ye yene ake ple dibi, kuno erekrabuka i, ye si atne edekre, ere wakai ere tenabuka.

Ye kogon yegl ere pai morabara i, mabuno du win sinabuka.

21 Te, Jentail yoba moraiglkwa i, yagl swara i no ere wakai ere norabukra we di pre gi dinaiglmiwe*

dugwa.

22 Ana ege ta murubuglo kide yagl ta moglmara suna moglko, yagl i ka prikre, dikre, eruko, gumuglo ama kin yogwa. Yoba yagl i auro yu, Jisas moglmara edigo, Jisas ye ere wakai ere togo, yagl i ka prisre, didre, kandre, erabuka mudu kuno erukwa. 23 Jisas yegl ere togo, yoba mere kide kandre, nagino koglsre, grigle di, yegl digwa, Yagl i, Devit Gawamo ta unabe digwa ikra um kana? di, yegl digwa. 24 Ba ka yegl digo, Farisi yoba ka i prisre, ye kide kaima pre yegl digwa, Yoba i, Belsebul murubuglo kide bitno moglkwa ikra we, yobuglo togo, murubuglo kide di meda edumiwe digwa.

25 Ana Farisi yoba nomano pamere i, Jisas pre kan kodidre, ye di ikne ede, yegl dugwa, Yoba ta dumo swara ta moraiglkwa i, yene si buno di ede suo pidre, kuda beglbi, dumono u kide pi kodinabuka. Mo, yoba bormai swara meglkwa i, yene ikne ikne kuda beglbi, ye ama u kide enaiglkwa. 26 Kuno yegl mere Satan ye yene si meda edenan, ye yene mina kuda boglkwa pre ye siragl mere yobuglo ere dumomo sugl mogl pai morabe? Dumo wau yenabuka. 27 Te, ene kogono yoba ama murubuglo kide di meda edime digwa i, ye Belsebul yobuglo togo, di meda edime ta dikrikwa. Yegl dibi, ene ka tage tenaiglkwa. Ene na pre Belsebul yobuglo naruko, murubuglo kide di meda edume digwa i, ta kuno erekrukwa. 28 Ba ene prio! Na murubuglo kide di meda ediga i, God yobuglomo mina erika pre God ene kingno mogl, suglno morabuka igne i ene meglmara u kodumedi prio! di, Jisas yegl dugwa.

29 Jisas ka ta ama yegl dugwa, Yagl Kide yobuglomo podo paugwa i, yugumo sugl moran, yoba ta ye taraglmo inagledi eran, ta kuno erekrabuka. Ba yoba ta ye taraglmo inagledi pran, ye komono kana ogo kagle kan si padiglsre, okuo ye taraglmo mudu ta yugugl yenabuka i, inabiwe dugwa.

30 Jisas ka ta ama yegl dugwa, Yoba ta na bogl akie moglkrumga i, ye na kudana ikne ta moglkwa mere yegl paugwa. Te, na yoba ere i suna edenagledi ere moglmara yoba na ake ple di narekrabuka i, ye ama yoba si pere pere edumiwe dugwa.

31 Yegl pre na ene yegl di teiga, Yoba tadaglme siragl mere ta eraiglkwa ya God ka kide di tenaiglkwa i, God ye gugl ede tenabuka ba yoba ta God Murubuglomo di kide yei tenan, God ye tadaglmemo i, gugl ede tekrabuka. 32 Yoba ta na Yoba Wam moglka i ka kide di naran, God ye tadaglmemo i gugl edenabuka. Ba yoba ta Mudu Murubuglo di kide yei tenabuka i, God ye ege erme mo okuo ta unabuka i, aimadi ta gugl ede tekrabiwe dugwa.

33 Jisas ka ta ama yegl dugwa, Ede wakai ta mogo kide ta koglkrabuka. Te, ede kide ta mogo wakai ta koglkrabuka. Yegl pre yoba ede swara swarade mogo siragl mere keglkwa i kandre, ede wakai paimo mo kide paimo mo i, kan pogl sigwa. 34 Ba ene toki kide mere yegl meglkwa. Ene yoba kide meglkwa pre ene ka wakai ta dinaiglkwa i, kuno ta erekrukwa. I siragl pre siragl taragl yoba ta dem muduo mina kau sugwa i, ye ka dugwa igne ede meda ugwa. 35 Yoba wakai ta morabuka i, ye nomane ya dem muduo wakai paugwa pre ebrie mabunomo ama wakai panabuka. Ba yoba kide ta morabuka i, ye nomanemo ya dem muduo kide paugwa pre ye ebrie mabunomo ama kide panabiwe dugwa.

36 Ba na ene di teiga, Ene ka gua gua siragl mere ta dimere i, okuo God yoba kotno prabuka igne, God gumuglo mina ene di peglbi, ka tage tenabuka. 37 Yegl pre ene ka dimara i mina God ene tau ka tage tenabuka. Tedre, tau du meglmiwe dinabiwe di, Jisas yegl dugwa.

38 Ana okuo God lomo beke teigwa yoba ya Farisi yoba akie ede Jisas moglmara udre, yegl di prikwa, Tisa yo, ene kimagl ta etn, no kandre, pre medramniwe digwa. 39 Yegl digo, Jisas di ikne ede, ye yegl di togwa, Ene yugobuno erme meglkwa i, ene u kide pi kodigwa. Abu ta wie kide kodo yagl ta bogl kunogl nebrere mere yegl ene God kide kodigwa. Na kimagl ya diu ta etn, kanamnedi prikwa ba na ta erekraglka. Na kimagl swara ta eribo, kanaiglkwa i, Jona okna erumere yegl eribo, kanaiglkwa. 40 Jona buglo bagle kade dane wagle ege suota etne ya eduer moglmere mere yegl, na Yoba Wam moglka i, ege suota etne ya eduer makan atne pai moraglka pre diwe dugwa.

41 Na ka tau Jona pre dinaglka i, ama yegl dinagle dugwa. God yoba ka tage tenabuka igne, Ninive yoba adigl, ene yoba erme meglkwa i, mabunono kide yomedi i nogugl edenaiglkwa. I siragl pre Jona ye Ninive yoba meglmara pi God kamo di togwa igne, ye mudu nomano yake teigwa ba na erme yagl kade mogl, Jona egre teiga magigl moglka i, ene nomano yake tenakrimiwa.

42 Te, igne i abu dumo Seba kwin moglkwa ikra ama adiglsre, ene yoba yugobuno erme meglkwa i, mabunono kide pamedi i nogugl edenabuka. I siragl pre king Solomon nomanemo wakai pame digwa pre abu kwin i, ye dumo eglke kaima moglsre, u Solomon ka dinan, pragledi ugwa. Ba na kade mogl, king Solomon nomanemo egre teiga moglka i, magigl akie munga ba na kana prakrimiwe di, Jisas yegl dugwa.

43 Ana Jisas yegl didre, ka ta ama yegl dugwa, Murubuglo kide ta yoba ta moglmara kide kodidre, ede meda enan, ye dumo ta kugla di yomara suna wan mogl, dumo wakai ta ye wakan morabuka i, dokinabuka ba ye ta kankrabuka. 44 Kankre, yegl dinabuka, Na yugu ta okna kipaiga kide kodimara ikra, ede ikne enaluwe dinabuka. Yegl didre, ede ikne enan, ye kanabuka i, yugu nem yugu i brum didre, ere wakai ere kodugo, yugu yoko yogwa mere yegl pamedi kanabuka. 45 Ye yegl kandre, pi murubuglo kide 7-pela mabuno kide mina ede okna eigwa i, ama doko inan, ye akie ede ikne unaiglkwa. Ye ede ikne u yoba i moglmara suna moraiglkwa. Yegl eribi, ye okna kide moglmere moglkre, u kide kaima enabuka. Kuno yegl mere yoba erme kide meglkwa i, ye meglmara taragl yegl ama plau dinabiwe di, Jisas yegl dugwa.

46 Ana Jisas yoba mere meglmara ka yegl di te moglko, ye mam ya agiglema u meda adigl mogl, Jisas unan, ka di tenamnedi pre sugl kan meglkwa. 47 Meglkwa pre yagl ta ede yugugl u Jisas di tedre, Ene man ya agiglnma meda mogl, ene ka di tenamnedi sugl kan meglmiwe dugwa. 48 Yegl dugwa ba Jisas di ikne ede, yegl di togwa, Na mana ya agrama ira meglmedi pitne? dugwa. 49 Didre, ye ogo buglo si, ye duglo beglkwa yoba meglmara edidre, yegl dugwa, Kanio. Yoba i na mana ya agrama meglkwa. 50 Yegl paugwa pre yoba ira ta na Nina heven ibo moglkwa i, kamo prisre, duglo boraiglkwa i keme na agrama moglsre, abarama moglsre, manama moglsre, erimiwe di, Jisas yegl dugwa.