1 Ana igne i Farisi yoba tau yeigo, God lomo beke teigwa yoba ama tau yeigo, dumo Jerusalem kide kodidre, Jisas moglmara u kira pogl yegl digwa, 2 Siragl eruko, ene duglo beglkwa yagl meglkwa i kowano awano mabunono pamere ogono nigl koglkre, kaya mokna ake neime? digwa. 3 Yegl digo, Jisas di ikne ede, yegl dugwa, Ene kowano awano mabuno pamere eramnedi God lomo kaima pamara si biglke digwa i, ene siragl pre erime? dugwa. 4 God dugwa i, Ene neno mano kano prisre, pre i mitna edio* dugwa. Didre, ama yoba ta ye nem mo mam ka kide ta di tenan, ene ye si golo* dugwa. 5 God lomo yegl dugwa ba ene enene mabunono duglo boramnedi yoba ta ye nem mam pre i mitna edidre, taragl tau tenabuka pamara i, i eglke edidre, ye taragl i God tenaluwe dugwa i, ene kuno pamiwe digwa. 6 Ye nem mam pre i mitna edidre, ake ple di tenabuka i ta paikrume digwa. Ene yegl dimara i, ene enene mabunono duglo boramnedi God lomo kide kodimiwe dugwa.

7 Ene ka didre, mabuno erikwa i, u kuno pikrukwa. Aisaia ye God kamo ta kep ere, ene pre boglkwa i, plau dugwa. Ye ka yegl boglkwa,

8 Yoba i ye drano wagle na kagna kade narikwa ba ye deno muduno eglke yomiwa. 9 Ye na kagna dagl, ake mina edigwa ba drano mina di yar edimiwa. Di yar edigwa i, i siragl pre ye yoba ka mabuno di tomne digwa i, kaima ta dikrisre, ye yoba lono i keme yoba di teimiwe*

di, Aisaia yegl boglme dugwa.

10 Ana Jisas yoba mere magigl wio di, agle dugo, wigo, ye di te, yegl dugwa, Na ka ta erme dinaglka i, ene prisre, nomane inaiglme dugwa. 11 Taragl ta meda yogo, ne atne edigwa i, taragl i yoba ta si deglbi yeikrukwa ba taragl ta deno muduno mina yogo, ye drano mina ede meda ugwa i, taragl i kaima yoba si deglbi yomiwe dugwa.

12 Ana Jisas yegl di kodugo, ye duglo beglkwa yagl i, ye moglmara udre, yegl digwa, Ene ka dinga i, Farisi yoba kide prikwa i, ene pre kan etno? digwa. 13,14 Yegl digo, Jisas di ikne ede, yegl dugwa, Ene Farisi yoba pre pre yubun dekrio. Na Nina heven ibo kaya mokna ere yaglkwa ba taragl tau yene parukwa i, God duglane bogl pru i meda edenabuka. Farisi yoba meglkwa i, ye yoba gumuglno kin yogwa i, konbauna obuno di tomnedi prikwa ba yene ama gumuglno kin yogwa. Kin yogwa pre yoba gumoglno kin yogwa ta ogono akenaiglkwa i, ye akie guglo sinaiglmiwe dugwa.

15 Jisas yegl di kodugo, Pita ye di pre, yegl dugwa, Ene ka ebrie ta dinga i, mabunomo di pogl notn, pramniwe dugwa. 16 Yegl dugo, Jisas yegl dugwa, Siragl pre ene aimadi nomane ikrime? 17 Taragl ta meda yogo, yoba ta ne atne edigwa i, ede deno biglko mina pidre, okuo ede de mur yugu ogwa i, ene prikrikwa paugwa. 18 Ba siragl tau yoba deno muduno mina paugo, drano mina di meda edigwa i, taragl i yoba si deglbi yeigwa. 19 Yegl pre yoba nomane kide prikwa ya yoba si geglkwa ya kumugl abai mo yagl abu ta bogl kunogl neigwa ya taragl kunogl neigwa ya ka kibi didre, ka kide kane kane digwa mabuno i, ye deno muduno mina padre, ede meda wigwa. 20 Mabuno i, ene si deglbi yeigwa mere yegl paugwa ba yoba ta ogo nigl koglkre, kaya mokna ake nogwa i, ye ta si deglbi yeikrumiwe di, Jisas yegl dugwa.

21 Ana Jisas dumo i kide kodidre, ede pi dumo Tair ya Saidon yebrara magigl ogwa. 22 Ogo, Kenan abu ta dumo igle kipaugwa i, ye moglmara udre, ka podo di, Yagl Kade yo, ene Devit Gawamo motnga i, na mitna goglo dugwa. Murubuglo kide ta na abra moglmara suna moglsre, ye ere kide ere te moglmiwe dugwa. 23 Yegl dugwa ba Jisas ka swara kaima ta di ikne ede tekrukwa. Yegl eruko, Jisas duglo beglkwa yoba ye yegl di teigwa, Abu i, ka nigadi di ugwa pre ene dedin, enabedi prumniwe digwa.

24 Yegl digo, Jisas di ikne ede, yegl dugwa, Nina na dedugwa i, Israel yoba sipsip wau beglkwa mere meglkwa i keme ake ple di tenatnedi na dedumiwe dugwa. 25 Jisas yegl dugwa ba abu i u goglko bodugl tedre, kamage yei, yegl dugwa, Yagl Kade yo, na ake ple di naro! dugwa. 26 Dugo, Jisas aglke kor yegl dugwa, Yoba ta gak kebra kaya mokna nenaiglmere tenaiglkwa i, ake towa si idre, agl ta tebi, wakai ta paikrabiwe dugwa. 27 Jisas yegl dugo, abu i yegl dugwa, Yagl Kade, ene kuno ere dinga ba agl kiglkwa yoba ta kaya mokna plet mina nebi, kebra yage maginagle sinabuka i, agl i nenaiglmiwe dugwa. 28 Abu i yegl dugo, Jisas di ikne ede, Abu wakai. Ene na pre mediglnga i, podo paugwa pre ene ta panabedi pitnere plau dinabiwe dugwa. Yegl dugo, ye abuglo ogladi wakai moglkwa.

29 Ana Jisas dumo i kide kodidre, ede pi nigl nubun Galili moglmara bina pidre, muglo kebra ta pamara pi ame di moglkwa. 30 Ame di moglko, yoba mere kide, kide kane kane sigwa auro yu ye moglmara ere wakai ere tenabedi yuigwa. Yoba ogono kaglno mawa sugwa ya kide erukwa i, yudre, yoba gumuglno kin yogwa ya ka dikrikwa i, ama mudu yu Jisas kagle mina edigo, Jisas ye ere wakai ere togwa. 31 Ere wakai ere togo, yoba kinano gi dugwa i, ka priko, yoba ogono kaglno kide erukwa i, u wakai ogo, yoba ye kaglno mawa sugwa i, adigl ede eigo, yoba mere kide wigwa i kandre, nagino keglkwa. Ye nagino koglsre, Israel yoba Godno i, kagie kade teigwa.

32 Ana Jisas ye duglo beglkwa yagl agle dugo, wigo, yegl di togwa, Yoba mere kide wigwa i, na mitno goglka. Nono ege suota munara magigl i, ye kaya moknano dudugwa. Aglau eran yoko ede pio dibo, kaima pi konbauna bage gumuglno magran, yage sinaiglkwa mere yegl pamiwe dugwa. 33 Yegl dugo, ye duglo beglkwa yagl yegl di teigwa, Dumo magigl i, dumo wau yogwa. Nono bret aglo mere i tomin, yoba mere kide i nenaiglme? digwa. 34 Yegl digo, Jisas ye yegl di togwa, Ene bret siramna yeigwa yome? dugwa. Yegl dugo, ye di ikne ede, Bret 7-pela yogo, buglo bagle kebra suom ta yomga yomiwe digwa.

35 Ana Jisas ye yoba i mudu ame dio dugo, ame di meglko, 36 ye bret 7-pela ikra ya buglo bagle tau idre, God di wakai yei tedre, bret ya buglo bagle ake buko di, ye duglo beglkwa yagl togwa. Ye i pi yoba mudu ame di meglkwa i, teigo, 37 ye mudu neigwa, dano erukwa. Dano eruko, tau yoko yogwa i ye i makai sidre, degigl gagl kade 7-pela gre kau sigwa. 38 Te, yoba kaya mokna neimara i, kerikwa yagl 4,000 mere yegl meglkwa ba abu gak ta kerekrikwa. 39 Ana Jisas ye yoba mere kide wigwa i, dedugwa, ede eigo, ye baglkugl mina mogl, ede nigl kogl ibo dumo ta Magadan we dimara ogwa.