1 Ana ege ta Farisi yoba ya Sadyusi yoba tau Jisas moglmara udre, aglau eran kanamnedi yegl digwa, Ene God yobuglomo idre, kimagl ta etn, pre medramniwe digwa. 2 Yegl digo, Jisas yegl di togwa, Ene poko dugo kamun gogl erukwa kandre, ene tagna wakai erabuka pamiwe digwa. 3 Te, tagna mogl, kamun kua gogl erukwa kandre, Erme ir podo unan, kamun sinabiwe digwa. Ene kamun mina taragl yegl plau dugwa kandre, mem i di peglkwa ba ege erme siragl taragl plau dugwa i, kandre, mem i ta di poglkrikwa. 4 Ene yugobuno erme meglkwa i, ene u kide pi kodigwa. Abu ta wie kide kodo yagl ta bogl kunogl nebrere mere yegl ene God kide kodigwa. Na kimagl ya diu ta etn, kanamnedi prikwa ba na ta erekraglka. Na kimagl swara ta eribo, kanaiglkwa i, Jona okna erumere yegl eribo, kanaiglmiwe dugwa. Jisas yegl didre, ye kide kodo, ede ogwa.

5 Ana Jisas ye duglo beglkwa yagl bogl ede nigl koglo ibo eigo, duglo beglkwa yagl kanigwa i, bret ta yukrikwa paugwa. 6 Ana Jisas ye di te, Farisi yoba ya Sadyusi yoba yisno i pre ene kan kun erio! dugwa. 7 Jisas yegl dugo, ye duglo beglkwa yagl wagle prikwa i, No bret ikrumga i pre dumedi drano digwa. 8 Ye yegl digo, Jisas pre kan ere, yegl dugwa, Siragl pre ene bret yukrikwa i pre ka drano dime? Ene na pre mediglkwa i, kebra paugwa paugwa. 9 Na bret 5-pela ake buko didre, yagl 5,000 teigo, bret yoko yomara i mina ene degigl gagl siramna mere gre kau sigwa i, ene pre meglmo mo pre moglkrime? 10 Ama yoba 4,000 kuno yegl mere ersre, bret 7-pela mina teigo, kawa togwa degigl gagl kade siramna girikwa ene pre meglmo mo pre moglkrime? 11 Na bret pre dikrika ba siragl eruko, ene pre pogl sikrime? Na Farisi yoba ya Sadyusi yoba yisno i pre ene kan kun erio diwe di, Jisas yegl dugwa. 12 Jisas yegl dugo, ye duglo beglkwa yagl yis yoko, yoba bret mina edigwa i pre dikrukwa ba Farisi yoba ya Sadyusi yoba ye ka siragl mere yoba beke teigwa i pre dumedi pre pogl sigwa.

13 Ana Jisas ede pi dumo ta taun Sisaria Filipai we dimara magigl yogwa i pidre, ye duglo beglkwa yagl di pre, yegl dugwa, Na Yoba Wam moglka i, yoba na ira moglme dime? dugwa. 14 Yegl dugo, ye di ikne ede, yegl digwa, Ene Jon yoba nigl bugl togwa yagle ikra adigl u kor enga, motniwe digwa. Te, tau digwa i, ene Elaija motniwe digwa. Te, tau digwa i, Jeremaia mo ka kep yoba okna ibo meglkwa i, swarano ta u kor enga, motniwe di, yegl dime digwa. 15 Yegl di kodigo, Jisas yegl dugwa, Ana ene we? Ene na ira moglme di prime? dugwa. 16 Yegl dugo, Saimon Pita di ikne ede, yegl dugwa, Ene God Kere Yugwa Yagl moglsre, God kor aimadi moglkwa i, Wam motniwe dugwa.

17 Ana Pita ka yegl dugo, Jisas ye di ikne ede te, yegl dugwa, Saimon, ene Jona wam motnga i, ene gun yenatnga paugwa. I siragl pre na ira moglka i, yoba ta ene i nogugl ede tekrikwa ba na Nina heven ibo moglkwa i, ene i nogugl ede togwa. 18 Te, na ene di teiga, ene kagn Pita paugwa.* Te, na yugobuna ede u podo enabedi eraglka i, kobuglo ta magigl yomara i mina yuguna kenaglka mere yegl paugwa. Na yugu i kebo, yagl kide yobama bogl yobuglo ersre, si atne edinamnedi eribi, manabuka. 19 God yoba kingno mogl, suglno morabara i, na ene ki tebo, ake moratnga. God heven ibo moglsre, ye yobama pre taragl tau mane dinabuka i, ene makandigle mogl, mane dinatnga. Te, ye taragl tau pra we dinabuka i, ene ama pra we dinatniwe di, Jisas yegl dugwa. 20 Jisas ka yegl didre, ye duglo beglkwa yagl ka gigledi di tedre, Na God Kere Yugwa Yagl moglka i, yoba ta di tekrio dugwa.

21 Ana ege i mina Jisas mabuno bogl ka di nogugl ede tedre, ede Jerusalem enabuka paugwa. Enan, Juda yoba kade ya tawa teigwa yoba bitno meglkwa i ya te, God lomo beke teigwa yoba ogono mina enan, ye ibun ya giugl tedre, si geglbi, ye ege suota maugl atne pai mogl, adigl u kor enabere i pre ye duglo beglkwa yoba di pogl togwa. 22 Di pogl togo, Pita prisre, Jisas auro i bina edidre, ka te yegl dugwa, Yagl Kade yo, ene yegl ta dikro. Taragl yegl mere ene motnara kaima ta plau dikrabiwe dugwa. 23 Pita yegl dugo, Jisas kan ake te, Pita yegl di togwa, Satan, na moglmara ede eglke po! dugwa. Na kogon eraglmara i, ene si kegl dinagledi etniwa. Ene ka dinga i, yoba nomano pamere i keme dinga ba God nomanemo pamere i ene ta dikitniwe dugwa.

24 Ana Jisas ka yegl di kodidre, ye duglo beglkwa yagl mudu yegl di togwa, Yoba ta na duglo boragledi prabuka i, yoba ede prak kake ede eigo, si geglmere mere yegl, ye gorabuka i pre gun yedre, te ye yene nomanemo si goglsre, na duglo borabuka paugwa. 25 I siragl pre yoba ta na pre gorabuka i pra we dinan, ye kaima kor morabuka. Ba yoba erme keme kor mogl, wakai moragledi pran, ye u kide enabuka.

26 Yoba ta makandigle taragl mudu nem yagl morabuka ba ye yene u kide pidre, wau boran, wakai panabo? Mo, yoba kia mina kor morabuka i pre siragl wakai ta tedre, inabo? 27 Na Yoba Wam moglka i, na Nina abuglagemo mina angelo bogl ede atne unamga. Umun, nana yoba swara swarade mabuno erimere kuno ere te ikne edinaluwe dugwa.

28 Jisas yegl didre, ama yegl dugwa, Na ene kaima di teiga. Ene yoba magigl adigl meglkwa i, tau goglkre, yoko meglbi, na Yoba Wam moglka i udre, na yoba Kingno mogl, suglno moglbo, kanaiglmiwe di, Jisas yegl dugwa.