1 Jisas ama yegl dugwa, Ene mabuno du eraiglmara i, yoba ta ene debino si dinaiglmedi kan kun erio! Kowai ene yegl eribi, Neno heven ibo moglkwa i, okuo topo swara ta tekrabuka.

2 Ene mige moni i pi goduglme yoba tenaiglkwa igne, ene yoba ta dede, aglage kaglkane ere, debino sinaiglmedi dedekrio. Yoba mabuno kibi erikwa i, yoba debino sinaiglmedi ka mabuno yugu ya yoba meglmara biugel sio digwa i, ye ka kaima topono i kodigwa. 3 Ba ene goduglme yoba ake ple dinamnedi pribi, ene nogugl erekre, teke atne mere yegl erio. 4 Teke atne mere yegl eribi, ene Neno heven ibo moglkwa i, ye ene topo wakai te ikne edenabuka. I siragl pre yoba taragl teke atne erikwa i, ye kanumiwe dugwa.

5 Ene kamage eraiglkwa igne, yoba mabuno kibi erikwa erimere yegl erekrio. Ye ka mabuno yugu yugugl ya, konbauna nogagle adigl mogl, yoba no kanaiglmedi kamage erikwa i, wakai prikwa. Ba na ene kaima di teiga, yoba i ye topono i kodigwa. 6 Ba ene kamage eraiglkwa igne, ene yugugl nene moglsre, dua yogugl kegl didre, ene Neno ta kankrikwa moglkwa i, kamage ere teo. Ene yegl eribi, ye taragl mudu teke paugwa kanugwa pre ene teke mogl, kamage eribi, ye kanabuka. Ye kandre, ene topo wakai te ikne edenabuka.

7 Te, ene kamage eraiglmara ene God prabedi ka di kodigwa i, aglke kor kor dikrio. Yugobuno tau God pre kan erekrikwa i, yegl ere, ka mere kaima dumun, no godno i, kamageno praiglmedi prikwa 8 pre ene ye erimere yegl ta erekrio. I siragl pre ene Neno moglkwa i, ye ene siragl taragl ta inaiglkwa paugwa i, komono kana pre kan ere kodugo, ene okuo ye agle di primiwe dugwa.

9 Ene kamage eraiglkwa i, kamage yegl erio,

Neno Kade, ene heven ibo motnga i,

Ene kagn pere kaima padre, mina kaima panabedi prumga.

10 Te, ene king moratnga igne i tabre plau dinabedi prumniwa.

Ene pitnere keme heven ibo, plau dumere yegl,

No makandigle munara i, ama yegl keme panabedi prumga.

11 No kaya mokna ege swara swarade ta nenamnere mere noro.

12 Te, yoba aglau ere noriko, ye aglauno kide kodo tomnere mere yegl, no aglauno kide kodo noro.

13 Te, ege mere yagl kide kigln koglmara magigl pi dinaiglmedi ersre,

Yagl kide no si dinabedi no ere yo

di, ene kamage yegl eraiglme dugwa.

14 Yoba ene aglau ere tenaiglkwa i, ene kide kodo tebi, ene Neno heven ibo moglkwa i, ene tadaglmeno ama kide kodo tenabuka. 15 Ba ene yoba ta aglauno kide kodo tekribi, ene Neno ama ene tadaglmeno kide kodo tekrabiwe dugwa.

16 Ene kaya mokna mawagl eraiglkwa igne, yoba mabuno kibi erikwa erimere yegl ta erekrio. Ye kaya mokna mawagl erikwa igne, yoba ye kaya mokna mawagl erimedi kanaiglmedi pre ye gumano kide erikwa. Ba na ene kaima di teiga, ye topono i kodigwa. 17 Ba ene kaya mokna mawagl eraiglmara i, ene oliv nuglo bitno yugo mina edidre, gumano drano nigl koglsre, erio. 18 Ene yegl eribi, ene kaya mokna mawagl erikwa i, yoba ta kankraiglkwa ba ene Neno ta kankraiglkwa moglkwa i, ye taragl mudu teke erikwa kanugwa pre ene teke eribi, kanabuka. Kandre, ene topo wakai te ikne edenabiwe dugwa.

19,20 Ene taragl wakai wakai makandigle bona sikre, heven ibo bona sinaiglkwa. Ene taragl wakai wakai makandigle bona sibi, gunage taragl tau nebi, taragl tau ama ouno edenan, te, kunogl gogl yoba ede yugugl udre, kunogl nenaiglkwa. Ba ene taragl wakai wakai heven ibo bona sibi, kunogl gogl yoba ta u i pikribi, gunage ama nekribi, ouno edekrabuka. 21 Ene dumo aglo mere ta bona sinaiglkwa i, dumo i keme ene nomano mina kau sinabuka pre heven ibo keme bona sinamnedi erio di, Jisas yegl dugwa.

22 Ene gumuglno paugwa i, ken lam mere yegl padre, ene ogono nagino mudu abuglage si tenabuka pre paugwa. Yegl pre ene gumuglno wakai panan, ene ogono nagino mina abuglage mudu kau sinabuka. 23 Ba ene gumuglno kide eran, ene ogono nagino mudu mim erabuka. Yegl pre ene abuglage sumedi pitnga ba kaima mim eran, mim i podo kide erabiwe dugwa.

24 Yoba swara ta yoba suo kogono ere tenabuka, kuno ta erekrabuka. I siragl pre ye yaglmo kade ta wakai kandre, ta wakai kankrabuka. Te, ye yagl swara ta bogl si dakagl miur, ta moko tenabuka. Kuno yegl mere ene God kogonmo ersre, mige moni ama pre i mitna edinamnedi eribi, kuno ta erekrabiwe di, Jisas yegl dugwa.

25 Ana na ene ka ebrie di teiga i, ene pre epigl ersre, erme makandigle siragl mere mogl pai eraiglkwa i, pre yubun dekrio. Ene nigl, kaya mokna siragl mere nenaiglmere mo kuguglno gaglno siragl mere edinaiglmere kaima nomane sikrio.

Neno Kade kor moramga norukwa pre kaya mokna ya kugugl gak edinamga i, taragl kebra pamedi praiglkwa. 26 Kua pru di wan meglkwa i, ene prio. Yene kaya mokna ere yagl, si nenaiglkwa i pre nomane sikrikwa. Ba ene Neno kamin mitna moglkwa i, kua wakai moraiglmedi suglno moglkwa. Kua suglno wakai moglsre, te, no yoba munga i, siragl podo pamedi prisre, no wakai kaima suglno morabedi praiglmiwe dugwa.

27 Ene siragl mere wakai mogl pai eraiglkwa pre ege ege nomane sibi, ene bugla yuguno ere i olto edinaiglmo? Ta manabiwe dugwa.

28 Ene kugugl gagl siragl mere edenaiglkwa i, siragl pre nomane sime? Kugl siragl mere pare pi kwie sumere yegl prio. Ye nomane sidre, kogon podo eriko, kwieno u wakai pikrukwa ba God yene ekino wakai kaima togwa. 29 Te, King Solomon king kuguglmo gaglmo edugwa i win paugwa ba kugl kwie ekino wakai kaima padre, Solomon ekinmo togwa. 30 Kugl ege sugunagle paigo, yoba kugl kuba sidre, ere gaiglkwa ba yoba taragl kade paugwa. Yegl pre God kugl ekino togwa panan, ene siragl pre God kugugl gagl norokrabedi prime? Ene God pre mediglkwa i, gigle dikrume dugwa.

31 Te, ene nigl, kaya mokna siragl mere nenaiglkwa mo kugugl gagl siragl mere edenaiglkwa i, pre yubun dedre, dokokraiglkwa. 32 Yoba uglo koglo koglo meglkwa i, ye makandigle taragl yegl mere inamnedi nomano mina kau sugwa ba ene Neno kamin mitna moglkwa i, ene siragl taragl inaiglkwa pamere i kwande pre kodugwa. 33 Ba ene God ye yoba kingno mogl, suglno morabuka ya mabunomo du ake gumano kagle edibi, God makandigle taragl ta inaiglkwa panabere mere ama tenabiwe dugwa. 34 Yegl paugwa pre siragl mere tagna plau dinabuka i pre ene nomane sikrio. Tagna i, ye yene pre nomane sinabedi kanige erio. Yubun ta erme plau dinabuka i keme ene poglo di pribi, kuno erabuka pre ene tagna pre nomane sikrio di, Jisas yegl dugwa.