1 Ana Jisas ye yagl kade wagle ka ebrie swara ta ama di tedre, yegl dugwa, 2 God yoba kingno mogl, suglno morabuka i, yegl mere pame dugwa. King ta moglsre, ye wam abu bogl ye tenabuka egemo yenan, ye kaya mokna podo gagl, yoba di gaglkwa. 3 Di gaglsre, ye unaiglmedi nigl kogonmo yoba dedugo, di yunamnedi eigwa ba ye mudu kaima ukramnedi konbauna dokigwa. 4 Yegl erikwa pre king i aglke kor niglmo kogonmo yoba tau ama dedidre, ye yegl di teo, dugwa. Nono kingno ene yegl di togwa, Kau kumugl ya siragl tau ere kuglka meglkwa i, si keiga de kodugo, kaya mokna podo erika i, u nenaiglmedi kwia ere moglka pre tabre ede wio dume di, ene yegl dio! dugwa. 5 Ye dumere pi yegl di teigwa ba ye kano pra kiure, yene kogono mina eigwa. Ta ede pi kaya mokna ere yaglmara enagliwe dugo, ta yene kogonmo sugl moragledi ede ogo, 6 te tau ye dedugwa yobamo i, ake gi di mogl, ere kide ere tedre, si geglkwa. 7 Yegl eriko, king i dem podo kubrisre, soldiama dedugo, ye pi, king niglmo kogonmo yoba si geglkwa yobamo ikra, si goglsre, ye yuguno toglno gagl tege erimiwe di, Jisas yegl dugwa.

8 Ana king i aglke kor dagl nigl kogonmo yoba agle didre, yegl di togwa, Na wana abu yugwa pre kaya mokna erika i, ere wakai ere kodiga ba di gaglka yobamo i, tau nenaiglkwa mere manugwa 9 pre ene erme we, yoba konbo bage moraiglkwa i, mudu kaima di gagl yuio dugwa. 10 Yegl dugo, ye nigl kogonmo yoba ede pi yoba kide wakai siramna ta konbo bage kanigwa i, mudu di gagl yuigo, king yugumo kau kaima sumiwe dugwa.

11 Ana king ede yugugl udre, yoba wigwa i, kogl kare di inagledi ugwa. Udre, kanugwa i, yagl swara ta yagl abu bogl inamnedi eriko, ekin gaiglmere mere yegl ta gaglkre, ugo, kanugwa. 12 Kandre, yagl i kira pogl, Kabaglena yo, siragl eruko, ene ekin kuno ere gaglkre, une? dugwa. Yegl dugo, yagl i ka di ikne edenabuka mere manugo, 13 king ye niglmo kogonmo yoba di tedre, Ene yagl i ogo kagle kan sidre, pia si meda edibi, ye meda, mim erumara morabuka. Meda i, yoba kai ersre, signo gikr eraiglmiwe di, king i yegl dume di, Jisas yegl dugwa.

14 Jisas yegl didre, ama yegl dugwa, Kuno yegl mere God yoba mere agle dugwa ba yoba suom keme yugugl moraiglmedi edumiwe dugwa.

15 Ana igne i Farisi yoba makai si mogl, Jisas ka ta aglau ere dinan, kot ere tenamnedi konbo dokigwa. 16 Yegl di prisre, ye duglo beglkwa yoba ya Herot yobama tau bogl akie enaiglmedi dedigo, ye pi, Jisas yegl di teigwa, Tisa yo, no prumga i, ene ka du keme didre, yoba beke tenga. Ene yoba kade meglkwa mo yoko meglkwa i kerekre, God konbaunamo kuno keme yoba beke tenga. 17 Yegl pre ene siragl we di pitne? Nono mige taks Rom king tenamga kuno erumo mo tekramne? digwa. 18 Yegl digwa ba Jisas ye nomane kide idre, digwa i, pre kan ersre, ye yegl di togwa, Ene mabuno kibi erikwa yoba meglkwa. Ene siragl pre na aglau ere dinan, pramnedi na kira pogl prime? 19 Ene mige silva ta naribi, kanaluwe dugwa. Yegl dugo, ye mige silva ta yu teigo, 20 Jisas mige i kandre, yegl dugwa, Ira kwiamo ya kagie mige i mina pame? dugwa. 21 Dugo, ye di ikne ede, Rom king kwiamo ya kagie pamiwe digwa. Yegl digo, Jisas ye yegl di togwa, Yegl eran we, taragl ta Rom king pre yenabuka i, Rom king teo. Te, taragl ta God pre yenabuka i, God teo! dugwa. 22 Yegl dugo, ye prisre, wai kiglkwa. Wai kuglsre, Jisas kide kodo, ede eigwa.

23 Ana ade swara i, Sadyusi yoba tau Jisas moglmara wigwa. Sadyusi yoba digwa i, yoba ta goglsre, adigl u kor ta pikraiglmiwe digwa. Ana ye tau Jisas moglmara udre, yegl digwa, 24 Tisa yo, Moses ka bogl norumara i, yegl dugwa, Yagl ta abu inabuka ba gak kuglkre, goran, ye agigle ta morabuka i, abu werai i inan, gak kurabrika i, nem goglkwa agaimo idre, makanmo inabiwe dugwa. 25 Ana Moses ka bogl norumara i mina ka kira ta poramga. No munara i, agigle agigle 7-pela meglkwa. Ta komono moglkwa i, abu ta yugwa ba ye gak kuglkre, goglko, agigle namba 2 ere mogl, abu werai i, yugwa. 26 Agigle namba 2 i, abu i yugwa ba ye ama gak ta kuglkre, goglko, agigle namba 3 ede pi namba 7 i, mudu abu werai i idre, gak kuglkre, geglkwa. 27 Ana okuo kaima abu i ama goglkwa. 28 Agigle agigle 7-pela i, mudu abu swara i igwa pre yoba adigl u kor enaiglkwa igne, abu i, ira ebie morabuka i di noro! digwa.

29 Ana Sadyusi yoba yegl digo, Jisas ye di ikne ede te, yegl dugwa, Ene God kamo pre pogl sikre, God yobuglomo siragl mere paugwa i, ama pre pogl sikrikwa pre ene nomano kugl dugwa. 30 Yoba adigl u kor enaiglkwa igne, ye abu idre, ede yagl pidre, erimere yegl ta erekraiglkwa ba angelo heven ibo meglmere yegl moraiglkwa. 31 Ba yoba geglkwa adigl u kor enaiglkwa paugwa i, God kamo ene di nogugl ede te kodugwa ba ene kere kankrikwa paugwa. God kamo yegl dugwa, 32 Na yagl Abraham, ya Aisak, ya Jekop Godno mogl pai moluwe* dugwa. God kamo yegl dugwa i, ye yoba gogl kodigwa i, Godno moglkwa pre dikrukwa ba yoba kor mogl pai meglkwa i, Godno moglkwa pre dumiwe di, Jisas yegl dugwa. 33 Ye Sadyusi yoba ka yegl beke togo, yoba mere kide magigl moglsre, prikwa i, nagino keglkwa.

34 Ana Jisas ye Sadyusi yoba drano si kegl dugwa i, Farisi yoba akie mogl, kanigwa. Kandre, u swara pi mogl, ede Jisas moglmara wigwa. 35 Wigo, God lomo beke togwa yagl ta adigl mogl, Jisas ka ta aglau ere dinabo mo di pragledi kira pogl, yegl dugwa, 36 Tisa yo, God lomo paimara suna i, siragl lo podo pai, lo tau egre tome? dugwa. 37 Yegl dugo, Jisas ye yegl di togwa, Lo ta podo pai, lo tau egre atne edugwa i, yegl paugwa, Ene den mudun bogl mudu Yaglnen Kade God tedre, ene nomanen ya ene mudu motnere God to* dugwa. 38 Lo i podo pai, lo tau egre togwa. 39 Te, lo ta namba 2 paugwa i, yegl dugwa, Ene enene wakai kanere mere yegl, yoba ta magigl akie kipanaiglkwa i, ama yegl mere wakai kano* dugwa. 40 Lo suo i, God lomo mudu ya God kamo kep yoba beglkwa paugwa i, egre atne edidre, mudu bi dibriwe di, Jisas yegl dugwa.

41 Ana Farisi yoba makai si meglko, Jisas kira pogl, yegl dugwa, 42 Ene siragl we di prime? God Kere Yugwa Yagl i, ira gawamo morabe? dugwa. Yegl dugo, ye di ikne ede, Devit gawamo morabe digwa. 43 Yegl digo, Jisas kor dagl yegl dugwa, Devit gawamo ta morabuka panan, Devit God Kere Yugwa Yagl pre dugwa i, siragl pre ye na Yaglna Kade moglme dume? Devit ka yegl dugwa i, God Murubuglomo nomane togo, ye ka yegl dugwa,

44 Neno Kade ere mogl, na Yaglna Kade yegl di togwa,

Ene ogona wo kra ame di moglo.

Na ene kudanen ikne yobuglo ere tedre,

kagln mina atne edinaluwe*

di, yegl dume dugwa. 45 Devit yene God Kere Yugwa yagl i pre na Yaglna Kade we dugwa ba yoba tau Devit gawamo morabe digwa i we, siragl pre ka yegl dime? Na di nario di, Jisas yegl dugwa. 46 Yegl dugo, yoba swara ta di ikne edenabuka i, kuno ta erekrukwa. Te, yoba okuo kira poraiglkwa i, kudugl geglkwa.