1 Ana Jisas ka mudu i di kodidre, ye duglo beglkwa yagl yegl di togwa, 2 Nono ege suo mun, ege kade ta plau dinabuka i, ene prikwa. God ye okna ibo Israel yoba oglo sugwa ege ikra plau dinan, yoba ta na Yoba Wam moglka i, i pi kudana ikne ogono mina yenan, ye na si goraiglmiwe di, Jisas yegl dugwa.

3 Igne i tawa teigwa yoba bitno meglkwa i ya te, Juda yoba yobano kade u tawa teigwa yoba bitno yagl ta moglkwa, kagie Kaiafas we digwa i, kipamara togl suna akie makai sigwa. 4 Ye makai sidre, Jisas siragl mere ugl mage ere, si akidre, si goraiglmere pre ka di keglkwa. 5 Ba ye digwa i, ege kade yoba makai sinaiglkwa igne Jisas ta si kane sikramga paugwa. Ta si kane sumun, kowai yoba kide prisre, kuda eramnedi eribi, i kide panabiwe digwa.

6 Ana Jisas dumo Betani moglsre, ede pi yagl ta kagie Saimon we digwa i, kipamara yugugl ogwa. Yagl Saimon i, okna sik leprosi paugwa. 7 Ana Jisas kaya mokna nenagledi ame di moglko, abu ta nigl migi kobuglo mina bekigwa ta idre, ugwa. Nigl migi atne i, kugo nuglo ta demene wakai erukwa moglkwa. Te, kugo nuglo i, mige podo boglkwa. Ana abu i, ede Jisas moglmara u kugo nuglo toide bre mina edugwa. 8 Toide bre mina edugo, Jisas duglo beglkwa yagl kandre, kide pre, yegl digwa, Abu i, kugo nuglo yoko toide yar edugwa. 9 Ye kugo nuglo i pi mige boglma, mige podo imna, mige i pi goduglme yoba tomgo we digwa.

10 Jisas duglo beglkwa yagl i, yegl digwa ba Jisas ye ka siragl mere digwa i, pre kan ersre, ye yegl di togwa, Ene siragl pre abu i yubun teime? Ye mabuno wakai ta ere narukwa. 11 Goduglme yoba ene meglmara ege ege moraiglkwa ba na ene bogl aimadi akie moglkramga. 12 Abu i, kugo nuglo yu toide ogona nagna mina edugwa i, na maugl sinaiglkwa pre erukwa. 13 Te, na ene kaima di teiga, yoba ta na kana wakai i pi uglo koglo koglo dinaiglmara i, ye abu i erumere i ama yoba boglo kugl tebi, poglo di praiglmiwe dugwa.

14 Ana igne i Judas Iskariot, ye Jisas duglo beglkwa yagl 12-pela meglmara i swarano ta moglkwa, ye ede tawa teigwa bitno yoba meglmara pidre, 15 yegl dugwa, Na Jisas yu ene ogono mina yebo, ene siragl naraiglme? dugwa. Yegl dugo, mige silva 30-pela teigo, 16 Judas ye ege wakai ta yenan, Jisas auro yu kudamo ikne ogono mina yenagledi sugl moglkwa.

17 Ana Juda yoba brit yis edekre, gagl neigwa ege i, yogo, Jisas duglo beglkwa yagl ye moglmara udre, yegl digwa, God Israel yoba oglo sumedi pre moramnedi kaya mokna nenamga i, no dumo aglo mere ere wakai ere tenamne? digwa. 18 Yegl digo, Jisas di ikne ede, Ene ede taun suna ebi, yagl swara ta moran, kanaiglmiwe dugwa. Yagl i yegl di tenaiglkwa, No tisano yegl dugwa, na egena ede magigl umiwa. God Israel yoba oglo sumedi pre moramnedi kaya mokna nenamga i, na duglo beglkwa yagl bogl ene kana nenamnedi priwe dume dio dugwa. 19 Yegl dugo, ye duglo beglkwa yagl ye dumere ersre, kaya mokna nenaiglkwa ere wakai erikwa.

20 Ana min paugo, Jisas ye duglo beglkwa yagl 12-pela bogl kaya mokna nenamnedi ame di meglkwa. 21 Ame di mogl, kaya mokna ne meglko, Jisas ye yegl dugwa, Ene kaima di teiga, ene swarano ta na i pi kudana ikne ogono mina yenabuka. 22 Yegl dugo, ye duglo beglkwa yagl deno muduno yubun podo dogo, ye swara swarade Jisas di pre, Yagl Kade, na pre ta din we di, yegl digwa. 23 Digo, Jisas di ikne ede, yegl dugwa, Yagl ta na i pi kudana ikne ogono mina yenabuka i, ye na bogl akie bret idre, sup swara mina si bai, nobuluwe dugwa. 24 Na Yoba Wam moglka i, God kamo dumere yegl na kaima goraglka paugwa ba yagl ta na i pi kudana ikne ogono mina yenabuka i, ye yubun podo inabuka. Ye mam ye ta kuglkruma, wakai paugo we dugwa. 25 Jisas yegl dugo, Judas kuda ikne ogono mina yenabuka yagle yegl dugwa, Neno Yagle, na pre ta din we dugwa. Yegl dugo, Jisas di ikne ede, Ene dinga i, kaima diniwe dugwa.

26 Ana Jisas duglo beglkwa yagl bogl kaya mokna ne meglko, Jisas bret ta idre, God di wakai yei te, bret i ake buko dugwa. Ake buko di, ye swara swarade nenaiglmedi tedre, yegl dugwa, Bret i idre, neo. I na nagna mere yegl yomiwe dugwa. 27 Ana Jisas kap ta wain nuglo atne moglkwa ama idre, ye duglo beglkwa yoba nenaiglmedi tedre, yegl dugwa, Kap swara i mina mudu neo. 28 I siragl pre wain nuglo i, na bormaina mere yegl yomiwe dugwa. Na ene yoba mere kumapno tenagledi bormaina suru ede meda edibo, God ka kaima ta okna di te paduglkwa ikra, ka kaima plau dinabuka. Plau dinan, ene tadaglmeno ama gugl ede tenabuka. 29 Te, na ene di teiga, Na erme nigl wain nekre mogl ebo, na Nina yoba kingno mogl, suglno morabuka egemo yenan, nono akie suna moramga igne, nono aglke kor akie nenamniwe dugwa. 30 Jisas yegl dugo, ye duglo beglkwa yagl bogl giglage kaima ta didre, yugugl ta meglmara i kide kodo, ede muglo Oliv we dimara eigwa.

31 Ege i Jisas ye duglo beglkwa yagl yegl di togwa, Erme eduer ene mudu mokono nare, ede pere pere enaiglkwa. Ebi, God kamo okna beglkwa i, kaima plau dinabuka. God kamo bage i yegl dugwa,

Na sipsip sugl moglkwa yagl i sibo, sipsip mudu ede pere pere enaiglmiwe*

dugwa. 32 Yegl dugwa ba na adigl u kor enaglka igne i na ede okna u distrik Galili moglbo, tegigl yenamniwe dugwa. 33 Jisas yegl dugo, Pita ye di ikne ede te, yegl dugwa, Yoba mudu ene mokono tebi, tenaiglkwa ba na kaima ene mokona tekraluwe dugwa. 34 Yegl dugo, Jisas ye di te, yegl dugwa, Na ene kaima di teiga, erme eduer koduagle kumugl wi ta sikran, ege suota na ye ta kankriwe dinatniwe dugwa. 35 Dugwa ba Pita kor dagl yegl dugwa, Na ene bogl akie gorabuglka mere panan, gorabuglka ba na kaima ene mokona ta tekraluwe dugwa. Pita dumere yegl Jisas duglo beglkwa yagl mudu ama yegl digwa.

36 Ana Jisas ye duglo beglkwa yagl bogl ede pi dumo ta Getsemani we dimara eigwa. Eigo, Jisas duglo beglkwa yagl yegl di togwa, Ene magigl i, ame di molo. Na ede ido pidre, kamage ere moragle dugwa.Dumo Getsemani muglo tebe yogo, ede oliv mere paigwa 37 Ye yegl didre, Pita ya Sebedi wam suo keme auro idre, ede ido ogwa. Ede ido pidre, Jisas kide kaima prisre, dem muduo yubun podo kaima dogwa. 38 Yegl eruko, ye yagl suota i, yegl di togwa, Na dena muduna yubun podo dogo, na goraglka mere yegl paugwa. Ene magigl i ugl paikre, sugl wakai ere meglbi, moramniwe dugwa. 39 Yegl didre, kuri ta ede iro pi yage mage di, makan mina emine ere, kamage ere, yegl dugwa, Nina yo, na nigl kide ta kogl nedre, ibun inaglka i, konbauna ta yenan, i eglke ede naratnedi prika. Ba na nana primere ta erekraglka. Ene pitnere eraluwe dugwa.

40 Ana Jisas kamage yegl ere kodidre, ede u ye duglo beglkwa yagl suota meglmara udre, kanugwa i, ye ugl pai meglko, kanugwa. Kandre, Pita yegl di prukwa, Ene aua swara keme kor meglbi moramga i, kuno ta erekrumo? 41 Yagl kide ene kinano si dinabedi kor mogl, kamage ere, ugl paikrio. Ene nomano mina wakai eramnedi prikwa ba ene ogono nagino mina yobuglno paikrumiwe dugwa.

42 Jisas yegl didre, ege namba 2 ede ikne pidre, kamage ere, yegl dugwa, Nina yo, na nigl kide ta kogl nenaglka i, i eglke ede naratnga ta kuno eran, pra. Ba ta manan, ene pitnere panabiwe dugwa. 43 Yegl didre, aglke kor u kanugwa i, ugl pai meglko, kanugwa. Ye ugl podo geglkwa pre ugl paigwa. 44 Ana Jisas u kandre, aglke ede ikne pi ege namba 3 kamage erukwa. Ye okna kamage erumere ikra aglke kor dagl erukwa. 45 Ye kamage ere kodidre, ede u ye duglo beglkwa yagl suota meglmara yegl dugwa, Ene ugl kanana siragl eruko paime? Prio. Ege ikra u kodugwa. Yoba ta na Yoba Wam moglka i, i pi tadaglme yoba ogono mina yei kodumiwa. 46 Ene adigl ede wio. Yagl ta na i pi kudana ikne ogono mina yenabuka i, uma, kanio dugwa.

47,48 Ana Jisas ka yegl di moglko, yoba mere bainet ya kuba ki akidre, wigwa. Wimara suna i, yagl Judas ye duglo beglkwa yagl 12-pela meglmara swarano ta moglsre, Jisas i pi kudamo ikne ogono mina yenabuka yagl ikra akie wigwa. Te, yoba wigwa i, yagl kade wagle tawa teigwa bitno yoba ya Juda yoba kade dedigo, wigwa. Ana Judas komono kana ye di tedre, Na yoba ta pauna si nenaglka i, yoba i moglmedi kandre, ye si ake gi dinaiglmiwe dugwa. 49 Ana yagl Judas i yoba tau mere bogl akie wigo, yagl i tabre ede Jisas moglmara pidre, Neno Yagle yo, ene motno? didre, ye pauna si nogwa. 50 Yegl eruko, Jisas ye yegl di togwa, Na kabaglena, ene ta eragledi unga i, ero dugwa. Yegl dugo, yoba wigwa i, tabre Jisas ake gi di mogl, si kane sigwa.

51 Si akigo, yagl swara ta Jisas bogl akie meglkwa i, bainetmo i meda edidre, tawa teigwa bitno moglkwa i, niglmo kogonmo yagl ta kina si bugl di edugwa. 52 Yegl eruko, Jisas ye di te, yegl dugwa, Ene bainetnen ikne edo. Yoba ta bainet ake moglsre, kuda eraiglkwa i, ye ama bainet mina goraiglkwa. 53 Ene siragl we di pitne? Na Nina agle dibo, ye angelo mere kide 12,000 mere yegl dedenan, u na kudana erekraiglmedi pitno? 54 Ba na yegl ta erekraglka. I siragl pre na taragl yegl eribo, God kamo siragl yegl mere plau dinabe dugwa i, kaima ta paikrabiwe di, Jisas yegl dugwa.

55 Jisas yegl didre, ye kan ake te, yoba ye si kane sinamnedi wigwa i, yegl di togwa, Na kunogl gogl yoba ta moglko, ene bainet ya kuba mina na si akenamnedi wimo? Na tawa teigwa yugu yomara ege ege mogl, yoba ka beke te moglka ba ene na si akekrikwa. 56 Ba siragl erme plau dugwa i, God kamo kep yoba okna beglkwa i, mogo korabedi pre plau dumiwe dugwa. Yegl dugo, ye duglo beglkwa yoba mudu ye kide kodo, teke ede eigwa.

57 Ana Jisas si kane sigwa i, ye ake i pi Kaiafas, ye tawa teigwa yoba bitno moglkwa i, kipamara eigwa. Kaiafas kipamara i, God lomo beke teigwa yoba ya Juda yobano kade kwade makai si meglko, Jisas okuo yuigwa. 58 Te, Jisas auro i ede eimara i, Pita okuo mokonomugl sika si ede pi tawa teigwa bitno yagl kipamara ede togl suna eimara ede ogwa. Suna pidre, kibr nem ame di meglmara i, ame di mogl, siragl taragl plau dinabuka i, kanagledi sugl moglkwa.

59 Ana tawa teigwa yoba bitno meglkwa i, ye kaunsil bogl mudu makai sidre, yoba tau kot mina ka kibi didre, Jisas aglau yegl erume dibi, si goramnedi dokigwa 60 ba yoba swara yegl mere ta doko kankrikwa. Yoba tau mere udre, ka kibi digwa ba ye Jisas aglau podo ta eran, ye si goraiglkwa mere yegl ta digo, prikrikwa. Yegl erukwa ba okuo yagl suo udre, 61 yegl dibrika, Yagl i, Na God yugumo si gur di atne edidre, ege suota mina kor kenaglka i, kuno erabiwe di, yegl dugo, no prubugle dibrika.

62 Ana yagl suo i, yegl dibriko, tawa teigwa yoba bitno moglkwa i, adiglsre, Jisas yegl di prukwa, Yoba ene aglau yegl yegl etne digwa i, ene di ikne edekratno? dugwa. 63 Dugwa ba Jisas ka swara ta di ikne edekrukwa. Di ikne edekruko, tawa teigwa yoba bitno i, Jisas yegl di togwa, Na God kor aimadi moglkwa i, kagie mina ene ka gigledi di teiga. Ene di noro. Ene God Kere Yugwa yagl moglsre, God Wam motno? dugwa. 64 Yegl dugo, Jisas ye di te, yegl dugwa, Ene dinga i, kaima dinga. Ba na ene di teiga, na Yoba Wam moglka i, okuo na God yobuglomo podo paugwa i ogo wo kra ame didre, kamun kua mina wibo, ene kanaiglmiwe* dugwa. 65 Jisas yegl dugo, tawa teigwa yoba bitno moglkwa i, yene kuguglmo gaglmo ake argla didre, yegl dugwa, Yagl i, ye God kagie ere kide ere togwa. Yoba tau udre, ye aglaumo ta di porabuka i ta paikrukwa. Ye God kagie ere kide ere togwa i, enene prikwa 66 pre ene siragl we di prime? dugwa. Yegl dugo, yoba makai si meglkwa i, di ikne ede yegl digwa, Ye si goramga i, kuno erumiwe digwa.

67 Yoba i yegl di kodigo, yoba tau ere mogl, Jisas guma dra mina eur sidre, agl dage sidre, ogono tu mina sidre, 68 yegl digwa, Ene God Kere Yugwa yagl motnga i, yoba ira ene sugwa i, ka kep ere, di pogl noro di, yegl digwa.

69 Ana Pita yugu meda kra togl suna ame di moglko, nigl kogon abai ta ye moglmara udre, yegl dugwa, Ene ama Galili nem Jisas bogl akie meglkwa pamiwe dugwa. 70 Yegl dugo, Pita yoba mudu gumuglnomugl mane di, Ene ka dinga i, na ta pre pogl sikriwe dugwa. 71 Yegl didre, adigl ede pi togl dra yomara moglko, nigl kogon abai ta ama udre, yoba magigl meglkwa i, yegl di togwa, Yagl i, ye kaima Jisas, dumo Nasaret nem i, bogl akie wan miuriwe dugwa. 72 Yegl dugo, Pita kor dagl ka gigledi di, yegl dugwa, Ene dinga i, na ta pre kan erekrika pre diniwe dugwa. 73 Pita yegl didre, kuri ta moglko, yoba tau magigl meglkwa i, ede u Pita yegl di teigwa, Ene motnga i, yagl i duglo beglkwa yagl meglmara suna i motnga paugwa. Siragl pre ene Galili yoba ka dimere kuno diniwe digwa. 74 Yegl digo, Pita ka gigledi didre, Na yagl i ta pre kan erekriwe dugwa. Na ka kibi ta dibo, God na ere kide ere narabiwe dugwa. Yegl dugo, koduagle kumugl ta tabre wi sugwa. 75 Wi sugo, Pita ye Jisas ka dugwa ikra, pre moglkwa. Jisas ye okna yegl di togwa, Koduagle kumugl wi sikran, ene ege suota na ta pre kan erekriwe dinatniwe dugwa. Ye ka yegl dugwa i, Pita poglo di prisre, ede meda pi, kai podo erukwa.