1 Ana ege i, Jisas yugu i kide kodidre, ede pi nigl nubun bina ame di moglkwa. 2 Ame di moglko, yoba mere kide ye moglmara eigwa pre ye aglke kor ede baglkugl mina ede egli pi ame dugo, yoba mere kide nigle bina adigl meglkwa. 3 Adigl meglko, Jisas ka ebrie mere kaima beke togwa. Ta dugwa i, yegl dugwa, Ene prio. Yagl ta kugl mogo i pi sudragledi ede ogwa. 4 Kugl mogo i pi sudugl ake pia sugo, kugl mogo tau yage konbauna sigwa. Kugl mogo i, kua pru di u neimiwe dugwa. 5 Te, tau, yage makan gaba kuri ta kobuglo bolamugl moglmara yage sigwa. Kugl mogo i, makan gaba mere yeikrumara yage sigwa pre tabre parikwa 6 ba ade ede mitna ugwa igne, duglane ede atne pikrukwa pre kugl i tabre ade de, yaminugwa. 7 Te, tau yage kan kagigle yaglkwa bogl moglmara sigwa. Kugl mogo i pare wi sigo, kan kagigle yaglkwa i ama akie pare ede mitna pi, kugl i atne edugwa. 8 Te, kugl mogo tau yage makan wakai yomara sigwa. Kugl mogo i, pare ede mitna pi, mogo wakai koglkwa. Tau 100 keglko, tau 60 keglko, tau 30 keglmiwe di, yegl dugwa. 9 Didre, ama yegl dugwa, Yoba na kana ta pramnedi praiglkwa i, na ka diga i wakai ere kinano gudu prio! dugwa.

10 Ana okuo Jisas duglo beglkwa yoba ye moglmara udre, ye kira pogl yegl di prikwa, Ene ka ebrie mina keme yoba ka beke tenga i, siragl pre etne? digwa. 11 Yegl digo, Jisas ye di te, yegl dugwa, God yoba kingno morabuka kamo mem teke paugwa i, ye ene pre pogl sinaiglmedi pra we dugwa. Ba yoba tau meglkwa i, ye pre pogl si dinaiglmedi mane dugwa. 12 Yegl paugwa pre yoba ta na ka diga pre igwa meglkwa i, God nomane tau i tebe ede tenan, pre kawa tenaiglkwa. Ba yoba ta na ka diga prakirikwa meglkwa i, ye kunabe ta primere i, God i eglke ede tenabuka. 13 Yegl pre na ka ebrie mere diga. I siragl pre ye gumuglno wakai paugo, kaima kan meglkwa ba siragl mere kanigwa i, kan pogl sikrikwa. Te, ye kinano wakai paugo, wakai ere prikwa ba ka prakiure, nomane ikrikwa.

14 I mina, ka kep yagl Aisaia ka ta okna boglkwa i, pai yugwa. Ye boglkwa i, God dra idre, yegl boglkwa,

Ene ege ege prisre, ka i ta pre pogl sikraiglkwa. Te, ene ege ege kanigwa ba kaima ta kan pogl sikraiglkwa. 15 I siragl pre Israel yoba meglkwa i, ye nomano gigle dugo, kinano kegl dugo, gumuglno ama kuglkwa. Ye ta prisre, ede ikne na moglmara unaiglkwa ta kuno eran, na ye kideno aragan ere, bu yenabedi ere tenaluwe*

di, Aisaia yegl boglme di, Jisas yegl dugwa.

16 Na ene meglmara kogon mere eriko, ene gumuglno mina kandre, kinano mina pre pogl sidre, erikwa pre ene gun yeio. 17 I siragl pre na ene ka kaima di teiga. Ene taragl tau kanigwa ya ka mere prikwa i, ka kep yoba ya yoba du okna meglkwa i, kanamnedi sugl meglkwa ba kankrikwa. Te, ka i pramnedi sugl meglkwa ba prikrimiwe di, yegl dugwa.

18 Jisas ama yegl dugwa, Na ka ebrie ta yagl kugl mogo suduglkwa pre diga i, mem di poglbo, praiglkwa. 19 God yoba kingno mogl, suglno morabuka kamo i, yoba ta prisre, pre pogl sikrikwa meglkwa i, yagl kide udre, kugl mogo ta ye nomano mina yage sugwa i, i eglke edugwa. Na kugl mogo tau yage konbauna bina sime diga i, yoba i pre diga. 20 Te, kugl mogo tau yage kobuglo moglmara sime diga i, yoba tau God kamo prikwa igne, ye tabre pre idre, gun yeigwa. 21 Ba duglane ede atne pikrumere mere yegl meglkwa pre ye ege sugunagle keme ka prikwa pre ka primara pre yubun ta teigwa mo ye ere sibi, ye tabre yage sinaiglkwa. 22 Te, kugl mogo tau yage kan kagigle yaglkwa boglmara sime diga i, yoba tau God kamo prikwa ba ye erme mogl pai eraiglkwa i ya mige moni inaiglkwa i we di prisre, erme gun yenaiglkwa i pre i mitna edigwa pre kan kagigle yaglkwa i, kugl i atne edumere mere yegl, taragl i ye nomano mina kau sugo, ye mogo wakai ta koglkrikwa. 23 Ba kugl mogo tau yage makan wakai yomara sime diga i, yoba tau God kamo primara i, ye pre pogl kaima sigwa pre diga. Ye God kamo pre pogl sidre, mogo wakai keglkwa. Tau ki 100 keglko, tau ki 60 keglko, tau ki 30 yegl keglmiwe di, Jisas yegl dugwa.

24 Ana Jisas ye yoba makai si meglkwa i, ka ebrie ta ama di tedre, yegl dugwa, God yoba kingno mogl, suglno morabuka i pre ka ebrie yegl dinaglka. Yagl ta kugl wit mogo i pi ye makanmo mina suduglkwa. 25 Sudiglsre, ugl paugo, ye niglmo kogonmo yoba ama ugl paigwa. Ugl paigo, eduer i, kudamo ikne meglkwa i, kugl kide mogomo akie sudiglsre, ede eigwa. 26 Ana okuo kugl wit pare ede mitna pidre, mogo keglko, kanigwa i, kugl kide i ama akie paimedi kanigwa. 27 Makan nem yagl i niglmo kogonmo yoba kandre, u yegl di teigwa, Yagl kade yo, no prumga i, ene kugl mogo wakai i pi suduglnedi prumga. Ba siragl eruko, kugl kide tau mere suna parume? digwa. 28 Yegl digo, ye di ikne ede, yegl dugwa, Na kudana ikne ta moglkwa i, kugl kide mogo tau suduglkwa pamiwe dugwa. Yegl dugo, ye aglke kor yegl di prikwa, Yegl panan, no kugl kide i pru edinamno? di priko, 29 ye mane didre, Kanige erio dugwa. Kugl kide i pru edinamnedi eribi, kowai wit akie pru ede dinaiglmiwa. 30 Kanige eribi, wit denabuka igne, si yunaiglkwa yoba dedibo, enaiglkwa i, kugl kide komono kana si koglo sidre, doga mina garaiglkwa pre i pere edidre, wit mogo i pi yugugl makai simara edinaiglmiwe di, makan nem yagl i yegl dumiwe di, Jisas yegl dugwa.

31 Ana Jisas ye ka ebrie swara ta ama yegl di togwa, God yoba kingno mogl, suglno morabuka i, ede mastet mogomo mere yegl ta pame dinaglka. Yagl ta mastet mogo ta i pi kaya mokna ere yaglmara suna yaglkwa. 32 Ana mastet mogo i, kebra kaima yedre, kaya mokna mogo tau togwa ba mastet pare ede mitna ogwa igne, ede mere yegl pai, kaya mokna mudu egre i atne edugwa. Ede mere yegl paugo, yogagle mina kua tau mere u yugo bagl paimiwe dugwa.

33 Jisas yegl didre, ye ka ebrie ta ama yegl di togwa, God yoba kingno mogl, suglno morabuka i, yis mere yegl pame dinaglka. Abu ta flaua mere yomara i, yis kunabe kaima ta i atne edugo, flaua mudu ake poia di, ede u podo ome dugwa.

34 Ana Jisas ye yoba mere kide makai si meglko, ka di togwa i, mudu ka ebrie keme di togwa. Ye ka yoko swara ta dikrukwa. 35 Dumara i mina, God kamo kep yagl ta ka ta boglkwa i, pai inabuka pre dugwa. Ye ka boglkwa i, yegl boglkwa,

Na drana mina ka ebrie di nogugl edenaglka i, God okna dumo makan ere yogwa igne ede u erme ugwa i, taragl tau teke paugwa i, di nogugl edinaluwe*

di, yegl boglkwa i pai yugwa.

36 Ana Jisas yoba mere kide makai si meglmara kide kodidre, ede yugugl ta ogo, ye duglo beglkwa yagl ye omara i pidre, ye yegl di prikwa, Ene kugl wit ya kugl kide pre ka ebrie dinga i, mabunomo di pogl notn, pramniwe digwa.

37 Ana Jisas duglo beglkwa yagl i yegl digo, Jisas ye di ikne ede te, yegl dugwa, Yagl ta kugl mogo wakai i pi suduglme diga i, na Yoba Wam moglka i pre diga. 38 Te, kugl mogo i pi makan mina suduglme diga i, makan i dumo makan mudu pre diga. Te, kugl mogo wakai we diga i, God yoba kingno morabara yoba ta suna moraiglkwa i pre diga. Te, kugl kide parime diga i, yagl kide gagiglma meglkwa i pre diga. 39 Ana kuda ikne ta kugl mogo kide suduglme diga i, Satan pre diga. Te, kugl mogo denabuka ege we diga i, taragl mudu dudunabuka ege i pre diga. Te, kogon yoba pre diga i, na angelo pre diga. 40 Ana kogon yoba kugl kide koglo si, i pi doga mina gaiglme diga i, ege erme dudunabuka igne, taragl yegl mere plau dinabuka. 41 Na Yoba Wam moglka i, angelona dedibo, na king moraglmara i, taragl kide ta suna yei dinabedi ake i suna ede, i meda ede, eraiglkwa. Taragl kane kane ta yoba yage sinaiglmedi eraiglkwa mo yoba ta mabuno kide eraiglkwa i, ye i meda edidre, 42 puk si doga podo ta denabara edenaiglkwa. Doga domara i, yoba kai ersre, signo gikr eraiglkwa. 43 Ege i, yoba du moraiglkwa i, ye Neno Kade king morabara suna i, ade abuglage sumere yegl abuglageno podo sinabuka. Na ka diga i, ene pramnedi pribi, ene wakai ere kinano gudu prio! di, Jisas yegl dugwa.

44 Jisas yegl didre, ama yegl dugwa, God yoba kingno mogl, suglno morabuka i yegl mere paugwa, yoba ta boks mige ya bonagana podo borabuka ta makan mitna atne yogo, yagl ta wake kandre, gun podo yedre, tabre makan si kegl didre, ye pi taraglmo ya yugumo toglmo mudu topo bogl idre, ye tabre pi makan ta box i yogo, kanumara ikra topo si yumiwe dugwa.

45 Jisas yegl didre, ama yegl dugwa, God yoba kingno mogl, suglno morabuka i pre ka ebrie ta ama yegl dinaglka. Bisnis man ta bis nugo kruo wakai wakai yenabuka i, idre, aglke kor topo bogl inagledi doko wan moglkwa. 46 Doko wan mogl, ege swara ta pi mige podo kaima borabuka ta kanugwa. Kandre, pi taraglmo mudu ta kan nogwa i, topo bogl idre, bis nugo ikra topo sumiwe di, Jisas yegl dugwa.

47 Jisas yegl didre, ama yegl dugwa, God yoba kingno mogl, suglno morabuka i, yegl mere paugwa. Yoba tau buglo bagle ere sinamnedi degigl gaglno nigl nubun mina pia si atne edigo, buglo bagle kane kane ede atne eigwa. 48 Degigl gagl kau sugo, ye gudu i meda edidre, nigle bina ame di mogl, buglo bagle wakai ya kide aglade i pere pere edigwa. Ye fis wakai gagl girsre, fis kide kide kodigwa. 49 Kuno yegl mere ege erme dudunabuka igne, angelo wagle ede bage bage pidre, yoba du moraiglmara suna i, yoba kide ama suna mogl dinaiglmedi ye ake i swara edidre, 50 pia si doga podo domara edenaiglkwa. Doga domara i, yoba kai ersre, signo gikr eraiglmiwe di, yegl dugwa.

51 Ana Jisas ka ebrie yegl didre, ye duglo beglkwa yagl di pre, yegl dugwa, Na ka tau diga i, ene pre pogl simo? dugwa. Yegl dugo, ye Owo digwa. 52 Owo digo, Jisas ye yegl di togwa, I siragl pre yoba ta God lomo pre pogl sidre, God yoba kingno morabuka ka i ama pre pogl sinan, ye yugu nem mere mogltre, taragl wakai wakai kan nogwa mere yegl morabuka. Ye taragl wakai wakai kan nomara i, taragl okna yogwa ya tau erme yogwa i, akie i nogugl edenan, kuno erabiwe di, Jisas yegl dugwa.

53 Ana Jisas ka ebrie yegl di kodidre, dumo i kide kodo, 54 ye ede yugomugl Nazaret pidre, ye ka mabuno yugu yomara yugugl pi, yoba ka beke togwa. Ye ka beke te moglko, yoba prisre, nagino kogl, yegl digwa, Aiya, nomane podo yegl ya kimagl tau erukwa i, ira beke togo, erume? digwa. 55 Ye yegl didre, kiam si, ama yegl digwa, Ye kapenta ikra, wam moglko, mam Maria kanumga moglkwa. Te, ye agiglema Jems ya Josep ya Saimon ya Judas meglkwa. 56 Ye abaugloma magigl akie munga. Magigl i mogl yakugwa pre yobuglo aglo mere idre, erume? digwa. 57 Ye yegl di, kiam sidre, Jisas kubro teigwa. Ba Jisas di ikne ede, yegl dugwa, God kamo kep yoba ta morabuka i, yoba dumo pere pere moraiglkwa i, ye kamo praiglkwa ba yene yugomugl yoba ya bormai swara meglkwa i, ye eran, kaima ta prikraiglmiwe dugwa. 58 Jisas yegl didre, dumo i kimagl mere ta erekrukwa. I siragl pre yoba i ye pre mediglkrikwa.