14 Aw sa diliꞌ pa dumateng ya katigkasan, pa-edeꞌ adti kadakulaꞌ na banwa ya Madyaw na Ubat-ubat sa Kasakupan na Pighari-an na Tyumanem.

29 "Na, pagkatigkas da na dakulaꞌ na manga kalugan dun ni manga allaw yan, ya sega aw bulan diliꞌ da matag sa kalalamdag. Aw mangkolug ya madég na manga bitun. Aw walaꞌ da ya katundanan na kadég na awun ni dalem na langit.* 30 Pagkatigkas yan, kita-en dun ni langit ya pangilala sa paglikuꞌ ku na Iseꞌ na Utaw. Aw magpansisugaw ya kadég na kasakupan na manga utaw na walaꞌ pangintu-u. Kay aku na Iseꞌ na Utaw, kita-en nilan dun ni labun aw ka-agadan na katulus aw dakulaꞌ na kalalamdag na pagka Tyumanem ku. 31 Aw magi sa uni na trumpita na to-o mableg, sugu-un ku ya kanak manga anghil. Aw madtu silan ni silatan aw adti sallepan aw adti balabagan na kadakulaꞌ na banwa, aw un nilan angayen aw pantipunun ya manga utaw na pigpamalliꞌ da ku.

42 Yanagaw gayed kamu magpakatanaw, kay walaꞌ mayu ka-ede-i kun kinunu ya paglikuꞌ na kamayu Matas na Pangulu. 43 Anenganenga mayu yeiy: Kun nyaka-edeꞌ pa ya tagtun sa balay na awun matakaw na sumeled na gabi yan, magpulaw galu sakanan aw pakatanawan nan ya kanan balay pada diliꞌ makaseled ya matakaw. 44 Yanagaw ka-ilangan mayu magtagilan, kay pangkay unu udasa lumikuꞌ aku na Iseꞌ na Utaw na diliꞌ mayu pag-imanmanen."

20 Aw palna-uwi mayu silan na imo-un nilan ya kadég na pigsuguꞌ ku kamayu. Aw diliꞌ mayu pagkalingawan na gayed ta kamu agad-agadan kada allaw mendaꞌ na malingeb da ya kadég adti kamoliyan na allaw."

32 "Na, ya allaw aw udas na paglikuꞌ ku, walaꞌ ya utaw na nyaka-edeꞌ. Yan oloꞌ ya nyaka-edeꞌ ya Ama ku na awun ni tas na langit. Pangkay ya manga anghil, aw pangkay aku uman na Iseꞌ nan walaꞌ paka-edeꞌ.

1 Na, madyaw kun kalabetan mu ya ini, na adun na manga kamoliyan na allaw, un saba dumateng ya madég na manga kalugan, 2 kay ya manga utaw, yan ya ginawa͡an nilan ya kanilan pagka-utawun aw ya kuwalta. Magpalibantug silan aw magpatastas. Paglongan nilan na malatay ya eped na utaw. Diliꞌ nilan pagka͡agadan ya mangkatikadeng nilan aw diliꞌ silan magpasalamat. Diliꞌ silan malim dumalug sa Tyumanem. 3 Diliꞌ nilan pagginawa͡an ya eped na utaw, aw diliꞌ silan magkalim mag-iyuliꞌ sa po-on nilan. Kalaten nilan ya dengeg na eped na utaw, aw walaꞌ ya katadeng nilan magtagen sa pagkaliman na pagka-utawun nilan. Mabulut silan, aw diliꞌ nilan pagkaliman ya pangkay unu ya madyaw. 4 Pangkay ya kanilan manga ubaybay paglubidan nilan. Aw pangkay unu ya imo-un nilan, diliꞌ nilan pag-anenganengen ya un sampetan. Kaliman nilan oloꞌ patasen ya kanilan dengeg. Ya manga utaw yeiy, diliꞌ nilan pagginawa͡an ya Tyumanem manang yan baling ya pagginawa͡an nilan ya pagleya͡an na asini tas na lupaꞌ. 5 Magpakita-kitaꞌ silan na dyumalug sa Tyumanem, manang balyaw nilan ya katulus na Tyumanem. Yanagaw, pagpakawat kaw sa maynan na manga utaw!

17 ‘Ini ya piglong na Tyumanem.

Dun ni manga kamoliyan na allaw,

un ku atag ya kanak Ispiritu adti kadég na manga utaw.

Ya manga buwadbuwad mayu na eseg aw bubay, un nilan ubat-ubat ya pa-edeꞌ ku kanilan.

Aw ya manga eseg na bagu pa ya ginawa, awun pakitaꞌ ku kanilan.

Aw ya manga bakleg mayu, un ku silan patagaynepen.

18 Aw pangkay ya kanak manga sugu-anen na eseg aw bubay,

atag ku kanilan ya kanak Ispiritu,

aw un nilan ubat-ubat ya pa-edeꞌ ku kanilan.

19 Magpakitaꞌ aku sa madég na pangilala adti langit aw manga milagru asini tas na lupaꞌ:

Kita-en ya duguꞌ aw atulun aw madakmel na ebel.

20 Ya sega magkangitngit, aw ya bulan iman mu aw duguꞌ.

Maynan alag ya un mangka-imoꞌ sa diliꞌ pa dumateng ya allaw na pagdateng na Tyumanem, aw yeiy ya allaw na to-o madyaw aw walaꞌ ya maka-unawa.

21 Aw pangkay singalan ya magtawag adti Tyumanem, paluwa-en saba sakanan.’ "*

15 Kay yan saba ya piglong ni Jisus idtu muna, na kitadun na utaw pa dun ni paglikuꞌ nan, diliꞌ kitadun muna sa manga mangintu-uway na nyatay da. 16 Kay manog ya kanaten Matas na Pangulu na si Jisus lekat adti tas na langit na ka-epedan na dakulaꞌ na tingeg na migsuguꞌ, aw ya tatawag na kapitan na manga anghil, aw ya uni na trumpita na Tyumanem. Aw ya manga mangintu-uway na nyatay da, muna silan matawun. 17 Pagkatigkas yan, magdengan ya kadég tadun na mangintu-uway ma-engat, dala ya bagu nyataw aw kitadun uman na utaw pa. Aw dun ni dalem na langit kitadun pagkitaꞌ si Jisus aw magad kitadun kanan aw meyaꞌ adti sayid nan na walaꞌ ya tyamanan. 18 Yanagaw, magi sa piglong nami, pakabagsega ya ginawa na tagsambuksambuk kamayu.

6 Yanagaw diliꞌ da tadun pagsilingan ya manga utaw na walaꞌ ya pagpangintu-u, kay kasiling silan na utaw na nyakatulug na walaꞌ nilan pag-imanmana ya un dumateng. Manang mag-inap aw magpakatanaw baling kitadun. 7 Kay ya gabi, yan ya udas na pagpakatulug na manga utaw aw yan uman ya udas na pagkalangulangu na manga mag-inemay. 8 Manang asuntu na kya-ilawan da kitadun na tingeg na Tyumanem, magpakatanaw kitadun kasiling na sundalu na syumut sa manga pagkanaꞌ na pigtampeng sa aba aw ulu nan. Maynan uman naten tamengan ya kanaten pagka-utawun magi sa pagpadeleg sa kanaten pagpangintu-u, aw ya pagginawa tadun sa manga eped na utaw, aw ya pag-awid sa kanaten pag-iman na paluwa-en kitadun. 9 Kay pigtawag kitadun na Tyumanem. Aw ya pagtawag nan kanaten, bekeꞌ na pa-emel-emelen kitadun adti kamoliyan na allaw, manang yan baling ya tud nan na paluwa-en kitadun magi sa kanaten Matas na Pangulu na si Jisu-Kristu.

34 Migpadeleg si Jisus miglong, "Magpakatadeng kamu pagaw gayed makabetang adti anenganeng mayu ya pagpa-eyang dun ni pagpamista, aw pag-inem mendaꞌ na mangkalangulangu kamu, aw sa pagkaypeng sa kamayu pag-eyaꞌ. Kay pagaw kabigla-an kamu 35 kasiling na iyalas na kyalitagan. Kay ya kadég na utaw na mig-eyaꞌ asini tas na lupaꞌ kabigla-an saba silan dun ni manga allaw yan. 36 Yanagaw gayed kamu pagtagilan sa kamayu pagka-utawun aw gayed kamu uman panawagtawag adti Tyumanem pada diliꞌ kamu kaliputan na manga kalugan yeiy na un dumateng, aw mabatug mayu ya mindeg adti asdangan ku na Iseꞌ na Utaw na walaꞌ ya kamulamula."

8 Kay manga inulug ku na kanak pigginawa͡an, diliꞌ mayu pagkalingawan na ya sammalalan (1,000) ka umay sangallaw oloꞌ adti kana Tyumanem. Aw ya sangallaw kasiling na sammalalan (1,000) ka umay. 9 Iman na manga eped na utaw aw pigpakadugay na Matas na Pangulu tadun ya pagtuman sa pakang na lumikuꞌ sakanan. Manang ya tengteng matinaw, pigtagadan nan na magselsel ya kadég mayu, kay diliꞌ sakanan malim na ka-eletan ya pangkay singalan adti kanan na walaꞌ ya tyamanan. 10 Manang lumikuꞌ saba ya Matas na Pangulu tadun, aw ya allaw na paglikuꞌ nan kasiling na pagdateng na matakaw na diliꞌ imanmanen na dumateng sakanan. Aw dun ni allaw yan, awun mangkabaklaꞌ na dalagunut na dengegen, aw mabus mangkasangab ya kadég na awun ni dalem na langit aw ya asini kadakulaꞌ na banwa. 11 Na, asuntu na kya-ede-an da mayu na un kalaten ya kadakulaꞌ, yanagaw tibulluka ya kamayu anenganeng adti pag-imoꞌ sa makatutuk sa Tyumanem pada walaꞌ ya un pagsalaꞌ sa bet mayu. 12 Aw talana mayu tyumagad sa paglikuꞌ nan, pagkaseb kamu dun ni imo-unun na Tyumanem pada maksay ya paglikuꞌ nan. Kay un pa dumateng ya allaw na un kalaten ya awun ni dalem na langit aw asini tas na lupaꞌ magi sa kapasuꞌ na atulun. 13 Manang yan ya pigtagadan tadun ya dadan da nan pigpakang na bagu na langit aw bagu na lupaꞌ, aw dun pag-eyaꞌ ya manga utaw na dyumalug sa pagkaliman na Tyumanem.

51 To-o mayu pakanyegi ya un ku paglongun: Pigbukasan kanak ya palpa na Tyumanem na pigtaguꞌ nan asini muna. Diliꞌ ya kadég tadun mabus mangkamatay kay ya eped kanaten kasaban na paglikuꞌ ni Kristu, aw ya kadég tadun na nyangintu-u kanan, un baguwun na Tyumanem ya kanaten lawas. 52 Aw biglaꞌ na ma-imoꞌ yeiy na diliꞌ pag-imanmanen, kasiling na pagpilek na mata, kay dun ni moli na uni na trumpita, ya kadég na manga nyangkamatay un matawun. Aw kitadun na nyangintu-u kan Kristu, mabagu la ya lawas tadun.

1 Na, pagkatigkas yan, kyinitaꞌ ku ya bagu na langit aw bagu na lupaꞌ kay walaꞌ da ya dadan na langit aw lupaꞌ aw walaꞌ da uman ya dagat. 2 Aw kyinitaꞌ ku uman ya bagu na Jérusalim na syudad na Tyumanem na nyanog lekat adti tas na langit. Ya syudad yeiy, nyatagilan da kasiling na ka͡ubayan na syumut sa kadégkadég na pangkasal pada sumungun sa un nan pangesegen. 3 Aw awun dyengeg ku na dakulaꞌ na tingeg na lyumekat apit adti trunu na miglong, "Na, pakanyegi mayu! Ya eya-anan na Tyumanem awun da ni kana manga utaw. Meyaꞌ sakanan eped nilan, aw silan ma-imoꞌ kanan manga utaw. Aw ma-iyeped nilan sakanan aw yan saba ya kanilan Tyumanem. 4 Aw galisan nan ya manga luwaꞌ dun ni manga mata nilan. Aw walaꞌ da ya pagkamatay nilan aw kakalatan na kanilan ginawa, aw walaꞌ da uman ya pagsugaw, aw diliꞌ da silan magti-is. Kay ya manga muna pagpakabetang lyumabay da."