1 Yanagaw awun paglongun ku kanmu magi dun ni ngalan na Tyumanem aw ni Kristu Jisus na un lumikuꞌ aw maghariꞌ, aw mag-ukum sa kadég na manga utaw dala ya utaw pa aw ya nyatay da. Aw ini ya suguꞌ ku kanmu: 2 Ubat-ubatan ya tingeg na Tyumanem. Tagilana gayed ya kanmu pagka-utawun na un mag-ubat-ubat adti manga utaw pangkay unu ya pagpakabetang, aw pangkay awun magpakanyeg aw walaꞌ. Paglonga silan na dalugun nilan ya palna-u ni Kristu. Kun awun utaw na nyakasalaꞌ, diliꞌ mu pagpabaya-an manang pagsagda͡an sakanan pada diliꞌ nan padelegen ya pig-imoꞌ nan. Aw dun ni kanmu pagpalna-u, diliꞌ kaw magkalumay manang pakatasa ya kanmu pasinsiya adti manga utaw na un mu palna-uwan. 3 Kay dumateng ya manga allaw na diliꞌ da malim ya manga utaw magpakanyeg sa matinaw na palna-u. Aw yan da oloꞌ ya dalugun nilan ya kanilan pagkaliman. Maninaw silan sa manga magpalna-uway na magkasampet sa pagkaliman nilan pagdengegen. 4 Kele͡an nilan ya tengteng matinaw, aw pakanyegan nilan baling ya dadan na kasampetanen na oloꞌ pig-imo-imoꞌ na utaw. 5 Manang ikaw, gayed pakatanawi ya kanmu pagka-utawun. Ti-isa ya pangkay unu na manga kalugan na dumateng. Palna-uwan ya Madyaw na Ubat-ubat kan Kristu adti madég na manga utaw. Aw padelega ya manga imo-unun na pigtaligu kanmu na Tyumanem.

6 Kay tagbiꞌ dakman ya pag-eyaꞌ ku asini tas na lupaꞌ, kasiling na bino na pag-asag kun awun ayep na pigdugsuꞌ adti Tyumanem. 7 Pigtibagsegan ku ya pagpalaguy, aw nyatigkas da ku ya pag-abay aw dyumateng da aku adti datenganan. Pigpakatanawan ku to-o ya kanak pagpangintu-u. 8 Yanagaw awun da pigtagilan kanak na Tyumanem na tandan dun ni allaw na pag-ukum asuntu na dyumalug aku sa pagkaliman nan, aw bekeꞌ ku oloꞌ ya pigtagilanan, manang ya kadég uman na mangintu-uway na tyumagad sa paglikuꞌ nan, aw matinaw saba ya kanan pagbayaꞌ.

9 Na, kay Timotiyo, tibagsegi na maksay kaw makakadi ni tampid ku. 10 Kay pig-ayawan da aku ni Démas, kay yan baling ya pigginawa͡an nan ya asini tas na lupaꞌ, aw adtu la sakanan ni Tésalonika. Aw si Crésénté adtu la sakanan ni Galasiya, aw si Tito uman adtu la ni Dalmatiya. 11 Dakman si Lukas ya eped ku idi. Yanagaw, angaya kanak si Markos aw pa-agadan adi sayid ku, kay dakulaꞌ ya matabang nan dun ni imo-unun ku. 12 Na, si Tikiko, pigpakadtu ku sakanan adti Épéso. 13 Aw sa pagkadi mu, dala͡a kanak ya madakmel na sa-ul na pig-ayawan ku adti kan Karpo dun ni Troas. Dala͡a uman kanak ya manga libru, labi la ya manga sulat adtu na piglulun.

14 To-o malatay ya pig-imoꞌ kanak ni Aléjandro na magtu-angay. Manang Tyumanem da ya magbayaꞌ sa pig-imoꞌ nan. 15 Magpakatanaw kaw uman sa utaw yan, kay to-o nan pagbalabagan ya palna-u tadun. 16 Adti tagnaꞌ na pag-usay kanak, walaꞌ ya utaw na migtameng kanaken. Pig-ayawan aku na kadég nilan. Manang pigsekat ku adti Tyumanem na walaꞌ galu ya tubagenen nilan adti kanan. 17 Pangkay pigpabaya-an aku nilan, manang walaꞌ aku pabaya-i na kanaten Matas na Pangulu. Pigpakabagseg nan ya ginawa ku migpa-edeꞌ sa Madyaw na Ubat-ubat kan Kristu pada dengegen na kadég na Héntil. Aw pigpaluwaꞌ aku nan lekat adti kamatayen. 18 Kya-ede-an ku na paluwa-en aku na kanaten Matas na Pangulu lekat adti kadég na malatay mendaꞌ sa allaw na angayen aku nan aw pa-agad adti Kasakupan na Pighari-an nan adti tas na langit. Aw umbaꞌ sakanan deyen na walaꞌ ya tyamanan! Amén.

19 Pangumusta͡an beg aku kan Priscilla aw kan Akila aw sa ka-epedanan ni Onésiporo dun ni balay nan. 20 Migpatagak pa si Érastos adti Corinto, aw si Tropimo pig-ayawan pa ku adti lunsud na Miléto kay kyedelan sakanan. 21 Tibagsegi na maksay kaw makadateng adi sa diliꞌ pa dumateng ya manga bulan na to-o manikiꞌ. Nyangumusta kanmu si Yubulo, aw maynan uman si Pudénté, aw si Lino, aw si Cla͡udiya, aw ya kadég uman na manga inulug tadun na mangintu-uway.

22 Ayin pa aku galu na gayed kaw agadan na kanaten Matas na Pangulu, aw ya kanan grasya awun gayed ni kadég mayu.