1 Na, madyaw kun kalabetan mu ya ini, na adun na manga kamoliyan na allaw, un saba dumateng ya madég na manga kalugan, 2 kay ya manga utaw, yan ya ginawa͡an nilan ya kanilan pagka-utawun aw ya kuwalta. Magpalibantug silan aw magpatastas. Paglongan nilan na malatay ya eped na utaw. Diliꞌ nilan pagka͡agadan ya mangkatikadeng nilan aw diliꞌ silan magpasalamat. Diliꞌ silan malim dumalug sa Tyumanem. 3 Diliꞌ nilan pagginawa͡an ya eped na utaw, aw diliꞌ silan magkalim mag-iyuliꞌ sa po-on nilan. Kalaten nilan ya dengeg na eped na utaw, aw walaꞌ ya katadeng nilan magtagen sa pagkaliman na pagka-utawun nilan. Mabulut silan, aw diliꞌ nilan pagkaliman ya pangkay unu ya madyaw. 4 Pangkay ya kanilan manga ubaybay paglubidan nilan. Aw pangkay unu ya imo-un nilan, diliꞌ nilan pag-anenganengen ya un sampetan. Kaliman nilan oloꞌ patasen ya kanilan dengeg. Ya manga utaw yeiy, diliꞌ nilan pagginawa͡an ya Tyumanem manang yan baling ya pagginawa͡an nilan ya pagleya͡an na asini tas na lupaꞌ. 5 Magpakita-kitaꞌ silan na dyumalug sa Tyumanem, manang balyaw nilan ya katulus na Tyumanem. Yanagaw, pagpakawat kaw sa maynan na manga utaw!

6 Kay awun manga eped kanilan na pag-ubaybayen nilan una ya mig-eyaꞌ dun ni balay pada paseleden silan, aw mabatug da nilan ya pagbalawbalaw sa manga ka͡ubayan pada kagawayan nilan magi sa palna-u nilan na galuꞌ. Ya manga ka͡ubayan yeiy maksay silan magka-agad-agad kay walaꞌ pakadalid ya kanilan pagpangintu-u asuntu na kyabegatan silan sa manga salaꞌ aw magkagagad silan sa pangkay unu na pagkaliman nilan. 7 Gayed silan migpakanyeg sa palna-u, manang diliꞌ nilan ka-ede-an kun ayin ya palna-u na tengteng matinaw. 8 Ya manga utaw na miggaway sa manga ka͡ubayan yeiy, alag nyangkabaluk ya anenganeng nilan aw walaꞌ ya guna na kanilan pagpangintu-u. Gayed nilan pigbalabagan ya matinaw na palna-u, kasiling na pagbalabag ni Janés aw ni Jambrés kan Moysis asini muna.* 9 Manang diliꞌ magpadeleg ya palna-u nilan kay diliꞌ madugay mabangal adti kadég na manga utaw na walaꞌ ya kya-ede-an nilan, kasiling saba na dyatengan ni Janés aw ni Jambrés.

10 Manang ikaw, kay Timotiyo, nya-edeꞌ da kaw sa kanak pigpalna-u, aw sa bet ku, aw sa tud na kanak pag-eyaꞌ asini tas na lupaꞌ. Kya-ede-an mu uman ya kanak pagpangintu-u, aw ya pagtagen ku sa kanak kadaman, aw ya pagginawa ku sa manga utaw, aw ya kanak pagpadeleg pangkay 11 pigpamulayaman aw pigpati-is aku na manga utaw. Kya-ede-an mu ya kadég na nya-imoꞌ kanak dun ni Antiyokiya na sakup na Pisidiya, aw adti Ikoniyo, aw adti Listra, na to-o aku pigpamulayaman, manang migpadeleg aku kay pigtabangan aku na kanaten Matas na Pangulu. 12 Ya kadég na utaw na malim dumalug sa bet na Tyumanem asuntu na nyakasambuk silan kan Kristu Jisus, un saba nilan apeten ya pagpamulayam. 13 Manang ya manga utaw na malatay ya bet aw migtallalingu, to-o pa kadugangan ya malatay na imo-unun nilan. Maggaway silan sa eped na utaw aw gawayan uman silan.

14 Manang ikaw, pagpadeleg kaw dun ni matinaw na palna-u na pigdengeg mu aw kanmu pyangintu-uwan, kay kya-ede-an da mu ya manga utaw na migpalna-u kanmu. 15 Lekat pa saba na pagkatagbiꞌ mu, nyaka-edeꞌ da kaw sa pigpasulat na Tyumanem asini muna aw yeiy ya miggagad sa kanmu anenganeng na mangintu-u kan Kristu Jisus pada makaluwaꞌ kaw lekat adti pa-emel-emel na Tyumanem.

16 Ya kadég na pigpasulat na Tyumanem lyumekat saba adti kanan, aw to-o dakulaꞌ ya ma-untung dun ni pagpalna-u sa matinaw, aw dun uman ka-ede-i ya manga salaꞌ tadun. Aw magi uman sa pigpasulat nan, mabatug tuliden ya utaw na nyakasuway aw palna-uwan sa pagdalug sa pagkaliman na Tyumanem, 17 pada ya utaw na nyangintu-u sa Tyumanem dayaw matagilan sa manga imo-unun na madyaw.