14 Na Imbuli ino Inoghile ya undewa itsopetighwa mne isi yose ka ukalangama kwe isi tsose, kuya ukumala kwe iisi kutsakutsa.

29 "Bahala ghamatsuwa agho gha ghamaghayo aghatsomala, litsua litsoghumighwa ichisi, na lwetsi ng’alutsolapfa bae ghumwanga, tsinondo tsisolaghala kulawa mlanga na tsingupfu itsili kulanga tsitsohighisighwa. 30 Chipindi acho, chitango che Imwana we Imunu chitsolawila mlanga na isi tsose tsitsolila, iwanu watsomwona Imwana we Imunu kakutsa mna ghamawingu mlanga, hamwe ne ingupfu na utunitso mkulu. 31 Naye katsowatuma wamalaika wake wane malati ilikemela sideke, nawo watsoweka hamwe awala iwasaghulighwe kulawa chila ubali we iisi, kulawa utsighilo uno we lilanga mbaka utsighilo ungi.

42 "Apfo, mwalangitse, kwaapfila ng’ammanya bae litsuwa lyachi Imtwatsa wenu hayatsakutsa. 43 Lekeni mmanye apfi, ka mwenye kaye ang’amanyile imbapfi kakutsa tsuwachi, ang’akalile meso, na tsang’oileka bae ing’anda yake ibenighwe. 44 Pfipfila namwe mwiyandae, kwaapfila Imwana we Imunu katsakutsa mne isaa ng’amuilolele bae yatse."

20 na muwalangulitse kughakinda aghala ghose ghaniwalaghitse. Na nene na hamwe namwe ghamatsuwa ghose mbaka iisi haitsomala."

32 "Kuduhu iyomanya litsuwa lila wala saa ila. Hata wamalaika wa kulanga wala Imwana ng’awomanya, ila Imulungu yaliyeka iyomanya.

1 Ukumbuke kutsakuwa na maghayo mne ghamatsuwa gha utsighilo. 2 Iwanu watsenoghela iwenyegho na watsonoghela tsisendi na watsetunya na watsakuwa na chidandali na watsokuwa na maligho, watsoleka kuwahulikitsa aba tsawo na mai tsawo, watsokuwa wahela mighede, watsokuwa ng’awahenzeluke bae, 3 iwalihela unoghelo na iwolema kwighongola na waghutsu na ing’awodaha kwilongotsa na wakali, ing’awonoghela ghanoghile, 4 iwohunduka weyawo na iwotenda bila kwipfikitsa na wane chepfu na iweghoda na iwenogheletsa iwenyegho kubita kumnogheletsa Imulungu. 5 Kwa kunze wakoneka ka iwanu iwompfuka Imulungu, lekeni woilema ngupfu yake. Wibaghule ghendo ne iwanu awo.

17 ‘Imulungu kolonga, mne matsuwa gha utsighilo

nitsowamwaghila iwanu wose Ghumuhe ghwangu.

Iwana wenu na neghe tsenu watsopeta mbuli yangu,

iwasongolo wenu watsakona ghamaono,

ne iwabala wenu watsolota tsindoto.

18 Hata iwatumwa wangu pfipfila, wose iwamale ne iwapinga

nitsowamwaghila Ghumuhe ghwangu mne matsuwa agho,

nawo watsopeta mbuli yangu.

19 Nitsotenda pfihulo uchanya kulanga,

ne ipfinu pfa ukukangawatsa muisi,

kutsakuwa na idamu, ghumoto na hosi tito.

20 Litsua litsoghaluka kuwa chisi,

na lwetsi lutsakuwa ludung’u ka idamu,

aho ng’ana lipfike litsuwa lila likulu lye utunitso we Imtwatsa.

21 Ne imunu wowose iyatsolomba kwa taghwa lye Imtwatsa katsokombolighwa.’

28 "Nitsowaghalila ghumuwe ghwangu mna iwanu wose.

Iwana wenu iwamale ne iwapinga watsolonga mbuli tsangu,

tsina sekulu wenu watsolota tsindoto,

iwanenu iwalume ne iwapinga watsakona ipfinu ipfitsolawila.

29 Pfipfila nitsowaghalila ghumuhe ghwangu kwe iwatumwa wenu,

iwamale ne iwapinga.

1 Mna ghamatsuwa agho, malaika mkulu Mikaeli iyowalolesa ghoya iwanu wako katsolawila. Nawo iwanu watsoghaya ng’ani kubita matsuwa ghose ighapfosile, ahala iwanu hawanzile ukukala muisi. Lekeni mna ghamatsuwa agho chila yumwe iyandikighwe taghwa lyake mna ichitabu cha ugima katsokombolighwa. 2 Iwanu wengi iwafile watsotsilihuka, wamwenga watsakuwa na ugima wa matsuwa ghose ing’aghohupa, na wamwenga watsopata chinyala na watsobetsighwa matsuwa ghose ing’aghohupa. 3 Awala wana ihekima watsong’ala ka pfaling’ala lilanga, na awala iwowalongotsa iwanu wengi ukutenda ihaki, watsong’ala ka tsinondo matsuwa ghose ing’aghohupa.

15 Kwaapfila twowalongela ghano kwa imbuli ye Imtwatsa, twetwe itung’ali waghima, itusighale mbaka hayatsakutsa keli Imtwatsa, ng’atutsowalongola ghendo bae awala iwafile. 16 Kwaapfila Imtwatsa mwenyegho katsohulumka kulawa kulanga, hamwe na laghitso, na litsi lya malaika mkulu we kulanga hamwe ne litsi lye malati ye Imulungu, na iwanu iwafile aku womtoghola Kiristu tanu watsotsilihuka. 17 Kuya twetwe itung’ali waghima, itusighale tutsosolighwa hamwe nawo mne libingu kwitingana ne Imtwatsa kulanga. Apfo tutsokala hamwe ne Imtwatsa ghamatsuwa ghose. 18 Lelo mwighume ghumoyo kwa ghamalonga ghano.

6 Apfo tuleke kuwa ka iwanu wangi iwawasile, ila tukale meso na twitawale wenyegho. 7 Mana iwanu wala iwowasa, wowasa nechilo, na awala iwopatika, wopatika nechilo. 8 Lekeni twetwe ituli we imisi, twitawale wenyegho. Tupfale inoghola ne unoghelo ka lighwanda lya chuma lyo ukwikinga mna tsimbagha tsetu, na lolelo lye ukombotsi liwe ka kofiya ya chuma yo ukukinga matwi ghetu. 9 Kwaapfila Imulungu ng’atusaghule bae tukomighwe na maya yake, ila tupate ukombotsi kubitila Imtwatsa wetu Yesu Kiristu.

34 "Mwalangitse! Imimoyo yenu ileke kughoghighwa ne kuja ng’ani, kupatika na kughaya kwaajili ye ughima uno, na litsuwa lila liwatsile kwa kuwadukitsa ka ghumtegho pfaughogha. 35 Kwaapfila litsowatsila iwanu wose iwokala mne uhanga we isi yose. 36 Apfo mkale meso ghamatsuwa ghose, mlombe mdahe ukukomboka mne hagho ghose ghatsolawila, na kwima hambele he Imwana we Imunu."

8 Lekeni sale tsangu, hana chinu chimwe mleke kwisemwa, kwe Imtwatsa litsuwa limwe lyeghala ne miyaka elufu imwe, na miyaka elufu imwe yeghala na litsuwa limwe. 9 Imtwatsa ng’okawa bae kutenda achila chalongile ka iwanu pfawakona kokawa. Yeye komdudumilani, ng’obama bae imunu wowose yangamile, ila chobama yeye chila munu aleke nzambi tsake.

10 Lekeni litsuwa lya Imtwatsa litsakutsa ka muitsi. Litsuwa alyo, kulanga kutsohupa kwa litsi likulu, ipfinu pfose ipfili kulanga pfitsolakatsighwa ne ghumoto na kuhinyighwa, iisi na chila ichinu ichili mghati mwake chitsoghubulighwa na kulekighwa mwatsi. 11 Ka chila chinu chitsohinyighwa pfino, lelo mwemwe mwobamighwa muwe iwanu wachi? Mwobamighwa mkale ughima iuhenzeluke na kukala kwa kumpfuka Imulungu, 12 ka pfamlolela litsuwa lye Imulungu na kulitenda litse himahima. Litsuwa alyo kulanga kutsolakatsighwa kwa ghumoto na kuhinyighwa, ne ipfinu pfose ipfili kulanga pfitsolubuka kwa ghumoto. 13 Lekeni twetwe twololela chayalongile Imulungu, twololela kulanga kwa sambi ne iisi ya sambi, ukaye kwa iwanu iwomnoghelesa Imulungu.

51 Tegheletseni, nowalongelelani mbuli; wose ng’atutsokufa bae, ila wose tutsoghaluka, 52 malati haitsolila, baho, iwanu iwafile watsotsilihulighwa aku ng’uli tsawo ng’atsolile bae, kuya na twetwe ng’atutsakufa ila tutsoghaluka.

1 Kuya mbona kulanga kwa sambi na isi ya sambi. Kulanga kula kwa mwanduso na isi ila ya mwanduso tsaihupa, na tsakukala kuduhu keli ibahali. 2 Na mbona ghumji ghwenzeluke, Yerusalemu ya sambi, ghohulumka kulawa kulanga kwe Imulungu, ghukala ghoya ka pinga yapfalile pfinoghile kwa kukwelighwa ne mmale. 3 Kuya nihulika litsi kulu kulawa hane chighoda che undewa, "Lola! Kaye ya Imulungu sambi ya mghati mwe iwanu, naye katsokala nawo. Nawo watsakuwa iwanu wake, naye Imulungu mwenyegho katsokala nawo, naye katsakuwa Imulungu wawo. 4 Naye katsobaghusa chila sotsi. Kutsakuwa kuduhu keli ukufa, au kunyanyana, au kulila au usungu, kwaapfila aghala gha ghumwande ghahupa."