1 Ghwe yunoghile kubita wamapinga wose,

yaghendile kwani ayo mnoghelwa wako?

Yahundukile kwani mnoghelwa wako

ili tukwapfile ukumbama?

2 Moghelwa wangu kaghenda kwikonde kwake,

hanu haimela imibiki ya upfumba,

yeye kodima wang'olo wake kuna likonde,

na kokunga hamwe ghamaluwa gha yungi yungi.

3 Nene nawakwake mnoghelwa wangu na yeye wakwangu nene,

yeye kowadima wang'olo wake hana ghamaluwa gha yunginyungi.

4 Mnoghelwa wangu, ghweghwe kunogha ka ghumji ghwa Tiliza,

kunogha ka ghumji ghwa Yerusalemu,

kokangawatsa ka maasikali iwenule tsibendela tsawo.

5 Uhunduke, tsinenge tsako tsilole kumbalimbali,

kwaapfila tsing'andola noyayamka,

tsimvili tsako tseghala na wamene,

iwamene iwohulumka kulawa chidunda Gilaedi.

6 Matsino ghako matselu ka ng'olo mapinga iwatselu iwaganighwe imighala sambi,

iwoyile kulawa kogha,

chila yumwe kakweleka wana weli weli,

na kuduhu hata yumwe ing'akwelaka mwana.

7 Ghamakanza ghako ighaghubikighwe na lishela gheghala na likomamanga limwe ilibatsuke.

8 Hodaha kuwa na malikiya sitini, na mapinga wakunze semanini,

na wali ing'awopeteka baye,

9 lekeni injiwa wangu iyanoghile yang'ahungukighwe na chochose, yeye kayeka ghendo,

yeye ka mwana nyalimwe kwa mai wake,

na iyomnoghela mai wake iyamweleke,

mapinga wose womwona na womkema kabweda,

Malikiya na mapinga wangi wose wamtunya.

10 Angu ayu nani iyakoneka ka ghumwanga ghwa nemitondotondo,

iyomeletseka ka lwetsi na iyong'aika ka tsuwa?

11 Nihulumka kuna ibostani ya mibiki ya milotsi,

mbone pfibiki ipfitsuka mna ibostani,

mbone ka mitsabibu itula mna ibostani,

mbone ka imikomamanga isanula maluwa.

12 Ng'ana nitange baye ichilawila,

nibona nimwenyegho ka apfla nakwendesa mtuka ghwa chifalume ighukweghighwa na falasi.

13 Uye, uye ghweghwe pinga kulawa Shulamu,

uye tukulole pfaubigha.

Hebali mbama kutsodola tsinenge mmwone ipinga ayuno kulawa Shulamu,

ka apfila mwololesa ngoma ya Mahanaimu?