1 Wila wa Selemani unoghile kubita wila tsose.

2 Uninonele kwa milomo yako,

kwaapfila pfaunikunda kudeng'elesa kubita idipfai.

3 ghamapfuta ghako gha ukubakala ghonung'ila ghoya,

litaghwa lyako ka ghamapfuta ighonung'ila ghoya ighoghidighwa,

apfo iwali pfawokukunda.

4 Nisolee tutsume wose,

ghweghwe kwa imfalume wangu, ungale kuna ipfiheleto pfako,

ako tutsodeng'elela na ukubweda,

tutsotunya ukukunda kwako kubita idipfai.

Apfo si chinu cha kukangawala baye wamapinga kukukunda.

5 Nene na mtitu lekeni ninogha, mwemwe mapinga Yerusalemu,

na mtitu ka ghamahema gha Kedari,

lekeni ninogha ka ghamapanzia gha Selemani.

6 Mleke kunitsodolela tsinenge apfila pfanili mtitu.

utitu wangu litsuwa linilakatsa,

lumbu tsangu tsawanighudubukila,

wanyika nikalitse mighunda ya minzabibu,

lekeni mghunda ghwangu ghwenyegho sighukalitse baye.

7 Lelo unongele ghweghwe yughunoghela ghumoyo ghwangu,

wang'olo wako utsowadimila kwani?

Nemisi wang'olo wako watsobwihila kwani?

Hebali nene niwe ka ipinga iyeghubike uhanga kwa ishela,

habehi na wang'olo wa wayagho?

8 Ghweghwe yunoghile kubita mapinga wose,

ka ng'umnayile baye, tenda apfi,

uwinze ghamatsayo gha wang'olo,

ukawadime wamene wako wadowado habehi na ghamahema gha iwadimi.

9 Ghweghwe yuninoghela,

kweghala na falasi pinga iyokangawatsa hayokwegha ghumtuka ghwa Farao.

10 Ghamakanza ghako ghanogha ghang'awa na ipfipuli.

na isingo yako inogha kwa mikufu ya Johali yaupfalile.

11 Tutsokutengenetsela tsiheleni tsa nzahabu,

ihambighwe hamwe na ifetsa.

12 Mfalume hayakalile mna ichilagho chake,

ghamapfuta ghangu ghang'ali ghonung'ila chila hanu.

13 Ghweghwe yuninoghela kweghala ghendo na chikoba cha manemane ighonung'ila,

ighuwasa haghatighati ha ghamatombo ghangu.

14 Ghweghwe yuninoghela kweghala ghendo na ghamaluwa gha mbiki.

ighasanule mna imighunda ya minzabibu akula Engedi.

15 Lola apfila pfaunoghile, mnoghelwa wangu,

ghweghwe kunogha, tsinenge tsako ka tsa njiwa.

16 Ghweghwe kunogha, mnoghelwa wangu,

nene nonoghelwa na ghweghwe,

lusatsi lwetu lutsakuwa mitsani mibisi inoghile.

17 Tsingutso tsa ing'anda yetu tsitsakuwa tsa mbiki ghwa mkataluba,

na ing'anda ayo itsohaghalighwa na mibiki ya mihangala.