1 Umkumbuke Imuumba wako mna ghamatsuwa gha usongolo wako, ng'ana ghamatsuwa gha ukughaya ghapfike, wala ng'ana ipfike baye imiyaka hautsolonga, "Nene sideng'elela keli baye ukuwa mgima." 2 Umkumbuke ng'ana litsuwa na ghumwetsi na tsinondo tsighelighwe chisi na ng'ana libingu lya mvula litine keli. 3 Umkumbuke ng'ana iwokalitsa ing'anda waghudeme baye, na ng'ana wana tsingupfu wapfeduke mighongo na ng'ana awala iwosagha waleke kusagha kwaapfila wachidogho, na ng'ana iwosungulila ipfonzo ng'awakwona chinu baye. 4 Mkumbuke Imulungu ng'ana ghamaghutwi ghadiwe baye, ng'ana litsi lya iwanu iwosagha lileke kuhulikika, na ng'ana imunu iyawasile yalamke baye ahala wapfideghe hawolila, na ng'ana iwapinga iwakwimba wawe chidogho. 5 Umkumbuke ng'ana iwanu wapfuke baye ukugheluka mlughongo, na ng'ana iwanu wapfuke baye ipfinu ipfilagha pfili mzila, na ng'ana mbiki wa mloso ghusanule maluwa baye, na ng'ana ibalangulu yaleke kudaha ukudaluka, na ng'ana libatsu lya ukuja limale, na ng'ana imunu yaighendele ing'anda yake ya ghamatsuwa ghose ing'aghohupa, na ng'ana iwanu iwodomboketsa wabite mna tsinzila. 6 Umkumbuke ng'ana lutsabi lwa fetsa ludumke baye, na ng'ana libakuli lya nzahabu litulike baye, na ng'ana ichiha cha ghamatsi chutulike baye hana imbwibwi, na ng'ana lighuludumu lya ukukweghela ghamatsi lihinyike baye. 7 Na ilukuli lwako lutsakuya kuna lidongo kwalilawile, na iloho yako itsomwihila Imulungu iyaiumbile. 8 Nene Muhubili nolonga, "Si chinu ghendo, si chinu ghendo baye. Ghose bule bule ghendo."

9 Kwaapfila muhubili tsakana ihekima, kaghendelela kuwalangulitsa iwanu ukumanya, kughalinga na kughasaghanisa, na kutunga mesali nyingi. 10 Muhubili tsakaghabama ghamalonga gha kweli na kaghapata, na kaghandika agho ghose. 11 Ghawolonga iwanu wana ihekima gheghala na ing'weku ya ukudimila iwanyama isongolighwe, na ghawolonga ka misumari ikomelelighwe mna mbiki. 12 Lelo, mwanangu witeghanye! Ukwandika ipfitabu ng'akutsigha baye, na ung'asoma ng'ani ilukuli lwakwipfa. 13 Ung'aleka agho ghose ghalongighwe, lekeni kuna chinu chingi chobamighwa: Umpfuke Imulungu na kukinda ghamalaghitso ghake mana ayo iyo sang'ano yaumbilighwe imunu. 14 Mana Imulungu katsohigha ghamatendo ghenu ghose na aghala ighotendighwa kwa kwipfisa, ghawe ghanogha au gheha.