1 Nene mbona chinu chimwe chihile mna isi, nacho chowahenya iwanu. 2 Imulungu komwing'a imunu tsimali, utajili na komtenda yatunyighwe, naye ng'ohungukighwa baye na chinu chochose chaghubama ghumoyo ghwake, lekeni Imlungu ng'omleka baye yapfihomole ipfinu apfo, Ila imgheni yuyo iyopfihomola, alyo nalyo si chinu baye na lyodesa ghendo. 3 Imunu kodaha kweleka wana miya imwe na kukala miyaka mingi, lekeni ka imunu ayo ng'apfihomole baye ipfinu pfayapatile hayang'ali mgima, wala ng'atsotsikighwa baye ka munu mkulu, nene nolonga, ng'apfu imwana iyafilile munda, kubita imunu ayo. 4 Kwaapfila ukwelekighwa kwa imwana ayo bule ghendo, yeye kakwaghila mchisi na ng'akuwa na taghwa baye. 5 Hata ka imwana ayo ng'onile litsuwa wala ng'atangile chinu chochose, yeye kobwihila tulu kubita imunu ayo. 6 Na ka imunu ayo kokala miyaka elufu mbili na ukughendelela, lekeni ng'opfihomola baye ipfinu pfayapatile hayakalile mgima, imunu ayo keghala na imwana ayo, wose weli woghenda hanu hamwe. 7 Imunu keyunda ukusang'ana, ili yapate chijo yaje, lekeni ng'eghuta baye. 8 Angu imunu yana ihekima yopata choni kumbita imunu mbotsi? Apfi imunu mhingwa yopata choni yang'amanya ukukala pfinoghile mna iwanu? 9 Ng'apfu ukudeng'elela ichinu ichikoneka na tsinenge kubita ukumwemwetela chakachaka. 10 Chila chinu ichilawila ma tsaching'ighwa taghwa kulawa ghumwande, na imunu ma kamanyika apfila pfayali, wala kuduhu imunu iyodaha kwihisanya na imunu yana tsingupfu kubita yeye. 11 Ukulongalonga sideke si chinu baye, nako kumwapfila choni imunu? 12 Kwaapfila na yuhi iyomanya ighanoghile mna ghamatsuwa gha imunu hayakuwa mgima, ghamatsuwa ighali si chinu ghendo baye na ighobita ka chimbeho? Yuhi iyodaha kumlongela ighatsolawila yeye hayatsakuwa kahupa muisi?