1 Walangitse haughenda mna ing'anda ya Imulungu, usoghele habei utegheletse kubita ukulapfa nambiko ka pfawolapfa nambiko iwanu iwabotsi, iwanu ing'awamanyile ka wotenda ighehile. 2 Haulonga tanu wifikitse, wala uleke kuwa na chihumuhumu kulonga chochose hambele ha Imulungu, kwaapfila Imulungu ka kulanga na ghweghwe kwa muisi, apfo uleke kulonga pfinu pfingi. 3 Ukwalangula pfinu pfingi komtenda imunu yalote, na ukulongalonga komtenda imunu yalonge ubotsi. 4 Ung'amwikila Imulungu natsili, uleke kukawa kutimitsa, Imulungu ng'onoghelwa na iwabotsi baye. Ghweghwe utimitse inatsili yaumwikile Imulungu. 5 Ng'apfu uleke kwika natsili, kubita kwika inatsili kuya uleke kuitimitsa. 6 Witeghanye chaulonga chileke kukuhonza utende nzambi, kuya uleke kumlongela imtambika wa Imulungu ka tsang'ubamile baye ukutenda apfo. Hebali umtende Imulungu yone maya kwa achila chaulonga na yaihinye isang'ano ya ghamoko ghako? 7 Ukulotalota tsindoto na ukulongalonga kose bule ghendo, lekeni ghweghwe umpfuke Imulungu.

8 Haukwona iwanu iwahingwa mna isi wodidimitsighwa, wakwimighwa haki tsawo, uleke kukangawala na ichinu acho, kwaapfila chilongotsi yumwe kololighwa na chilongotsi iyali mkulu wake, nawo pfipfila wololighwa na iwakulu wawo. 9 Isi haibweda na iwanu wose wobweda, na imfalume mwenyegho kobweda kulawa kuna imighunda. 10 Imunu iyokunda tsisendi, tsisendi ng'atsimwenela baye, na iyokunda tsimali, hata yang'apata, tsimali ng'atsiwenela baye. Alyo nalyo bule ghendo. 11 Tsimali tsing'ongetseka awala iwakuja nawo wakongetseka. Angu yana tsimali yopata choni? Na imwenyegho yopata choni, ng'ambe kotsilolesa hela? 12 Imunu iyosang'ana tsing'onde tsa ukuhenyeka kowasa fofofo, yawe keghuta au ng'eghutile baye, lekeni imunu yana tsimali ketseketse ng'owasa baye, kwaapfila tsimali tsake tsomtenda yakale meso chilo chigima. 13 Kuya mbona chinu chimwe mna isi chiha ghendo, imunu yelundikitsila tsimali kwa kwilagha mwenyegho, 14 na tsimali atso tsagha yeye bila kumanya, naye keleka imwana aku kahela chinu chochose cha ukumlekela imwanaghe. 15 Ka apfila pfayatsile chidako mna isi kulawa muinda mwa mai wake, pfipfo pfayatsakuka, ng'atsodaha baye kusola chinu chochose mna ghamoko ghake kwa isang'ano yake iyaitendile. 16 Alino nalyo liha ghendo, imunu pfayakutsa pfipfo pfayatsakuka. Angu yabwedile choni imunu iyahenyeke kwa kuliwinga libeho? 17 Matsuwa ghose ghayakalile mgima kokala mchisi, aku koghanzika, kamtamu na kakona maya. 18 Apfo nene mbona pfinogha imunu yaje, yanwe na yadeng'elele chayopata kwa isang'ano yake iyaihenyekele muisi mna ghamatsuwa ghayeng'ighwe na Imulungu, kwaapfila acho chicho chayekilighwe. 19 Pfipfila Imulungu komwing'a chila munu tsimali na utajli, na komleka yatsihomole tsimali atso, yalonge mighede na yadeng'ele achila chayapatile kulawa mna ing'onde yake ng'omu. Apfo pfose nzawadi kulawa kwa Imulungu. 20 Apfo imunu ng'okumbuka baye chinu chachi ichimlawila mna matsuwa ghose hayokala mgima, kwaapfila Imulungu komleka yadeng'elele hayotenda tsisang'ano tsake.