1 Aghano ghagho ghayalongile Muhubili imwana wa Daudi, ayo Daudi tsa mfalume ako Yerusalemu. 2 Muhubili kolonga chila chinu bule ghendo mna ghamatsuwa aghano ghanikala mgima! 3 Angu munu yopata choni kwa isang'ano yake iyohenyeka mna isi aino? 4 Mweleko ghopfosa, mweleko ghwakutsa, lekeni isi yokala pfipfo matsuwa ghose ing'aghohupa. 5 Litsuwa lyolawa, na lyakuswa, kuya lyosumka ukughenda akula kwalilawila. 6 Libeho lyodumila kusini, na lyodumila kasikazini, lyoduma na kuduma keli, aku lyakuiyila keli ghumtsunguluko ghwake. 7 Imito yose yakwingila mna ibahali, lekeni ibahali ng'aimema baye, na ghamatsi ghakuya akula kwayanzile imito, na baho ghakuya keli mna ibahali. 8 Ipfinu pfose pfomtenda imunu yepfe, kubita pfayodaha ukulonga. Inenge ng'aikwipfa baye ukulola, wala lighutwi ng'alikwipfa baye ukuhulika. 9 Ighali bahano ghagho ighatsakuwa baho, ighatendeke ghagho ighatsotendeka keli, kuduhu chinu ichili cha sambi mna isi. 10 Pfihi hana chinu chochose iwanu chawodaha kulonga, "Lola, chinu achino cha sambi?" Baye, tsachabaho kulawa ghumwande ahala twetwe ng'ana twoneke. 11 Kuduhu munu yokumbuka gha ghumwande, na awala iwatsakoneka hambele ng'awatsoghakumbuka baye igholawila sambi na hambele.

12 Nene Muhubili tsanikala namfalume wa Isiraeli ako Yerusalemu. 13 Kwa ihekima yangu yose tsanibama nimanye chila chinu ichilawila mna isi aino na Imlungu pfayaweng'ile iwanu maghayo makulu. 14 Nighona ghose ighotendighwa mna isi, agho ghose si chinu baye, gheghala na ukuwinga libeho. 15 Ichinu ichipfeduke ng'achidahika baye ukuchigholosa, na aghala ing'aghali baho ng'aghodahika baye ukupeteka. 16 Nifikitsa nilongela mwenyegho, "Lola nyongetseka ihekima kubita iwanu wose iwanilongole kutawala ako Yerusalemu. Ghumoyo ghwangu ghumema ihekima na ukumanya." 17 Tsanibama nimanye pfayili ihekima, ukwalekwale na ubotsi, lekeni tsanitanga ka ukutenda apfo kweghala na ukuwinga libeho. 18 Kwaapfila ihekima ing'ongetseka yoghala ukwalangula, na ukumanya kung'ongetseka, usungu wakongetseka.