1 Aghano ghagho ghamalonga gha mfalume Lamueli ghayafundighwe na mai wake. 2 "Ghwe mwanangu, mwanangu yanikweleke. Ghwe mwanangu yanikulombile kwa Imulungu. 3 Uleke kwaghitsa tsingupfu tsako kwa wamapinga, wapinga awala iwowahinya iwafalume. 4 Ghwe Lamueli, ngapfinoghile baye wafalume wanwe imbwali, wala pfilongotsi kuwa na libasu na imbwali. 5 Hela watsesemwa ghamalaghitso pfaghobama, na kuhigha pfihile ghamaghomba gha iwanu iwabunzighwe. 6 Weng'e imbwali awala iwali habehi na ukuhupa, weng'e idipfai awala wana usungu mkulu. 7 Waleke wanwe, wesemwe uhingwa wawo, waleke ukukumbuka keli ukughaya kwawo. 8 Walongelele awala ing'awodaha baye ukulonga wenyegho, walongelele awala iwalekighwe waliyeka. 9 Walongelele na ulamle ghoya, uwamile iwanu wahingwa na iwali mna ghamaghayo wapate ghawobama."

10 Ipinga iyanoghile, yuhi yodaha kumwona? Samani yake ng'ulu kubita libwe lya lubi. 11 Mlume wake komtoghola kwa ghumoyo ghwake ghose, na ng'ohungikighwa na chinu chochose baye. 12 Komtendela mlume wake ighanoghile na si ghehile baye, mna ghamatsuwa ghose gha ugima wake. 13 Kobama isufu na maghwanda matselu, kuya kofuma ghamagwanda kwa ghamoko ghake. 14 Yeye keghala na imeli ya uchulutsi, koghala ichijo chake kulawa kutali. 15 Kolamka lupfili pfili kakwambika ichijo cha ikaye yake, kowagholela iwatumwa wake mapinga tsisang'ano tsa ukutenda. 16 Kokaghula ghumghunda na koghughula, na kohanda nzabibu kwa tobole lyake. 17 Yeye kosang'ana kwa ngupfu tsake tsose, na ghamoko ghake ghana ingupfu kwa kusang'ana ng'onde tsake. 18 Komanya ghendo litobole lyayopata mna chila chinu chayotenda, kosang'ana mbaka nechilo. 19 Kofoghosa tsinyutsi kwa ghamoko ghake imwenyegho, na kofuma ghamagwanda kwa pfidole pfake. 20 Kogholosa ghumoko ghwake koweng'a iwahingwa, na awala iwoghaya. 21 Chipfeghetsi hachipfika mna ikaye yake, yeye ng'opfuka baye kwaapfila chila munu kana magwanda gha ukupfala. 22 Kefumila magholole ghake imwenyegho, kopfala ghamagwanda matselu, na gha nzambalau. 23 Imlume wake komanyika hana lilango lya ghumji, hayokala na iwalamtsi wa ghumji. 24 Kofuma ghamagwanda matselu kuya koghautsa, kowautsila imisipi iwachulutsi. 25 Ingupfu na ukutogholighwa ghagho ghamagwanda ghake, kosekelela mna achila ichilawila mna ghamatsuwa ighakutsa. 26 Chayolonga mna ghumlomo ghwake chikengela, kolapfa ghamalaghitso ighanoghile mna ghumlomo ghwake. 27 Kokaghula chila chinu ichitendeka mna ikaye yake, wala ng'akuja baye ichijo ing'achisang'anile. 28 Iwanaghe hawolamka womtunya, na immale wake komtunya kolonga, 29 "Kuna mapinga wengi iwatendile ighanoghile, lekeni ghweghwe kuwabita wose." 30 Ukusangalamka kwa ipinga kodaha kubugha, na ukunogha kwake ipinga kumalagha, lekeni ipinga iyompfuka IMNDEWA katsotunyighwa. 31 Mghwekeni ipinga ayo kwa agho ghayotenda kwa ghamoko ghake, mtunyeni hana lilango lya ghumji kwa tsing'onde tsake tsayotenda.