1 Chayobama kutenda imunu cha mmoyo mwake, lekeni chalulonga ilulimi cholawa kwa IMNDEWA. 2 Chila nzila ya munu yakoneka inogha mnange mwake, lekeni IMNDEWA kolinga ighali mna tsiloho tsa iwanu. 3 Mlekele IMNDEWA chochose chautenda, na aghala ghaubama kutenda ghatsotendeka. 4 IMNDEWA kotenda chila chinu ka pfayobama imwenyegho, hata iwehile kawekela tsuwa alila lya ukughaya. 5 Chila munu yana ichidandali komdesa IMNDEWA, ona ghendo ng'atsohepa baye ukutowighwa. 6 Kwa uluso na ukulongesa, tsinzambi tsoleghusighwa, kwa kumpfuka IMNDEWA, imunu kohepa ighehile. 7 Tsinzila tsa imunu tsing'amnoghela IMNDEWA, Yeye komtenda hata awala iwomhila wawe sale tsake. 8 Ng'apfu ukupata tsimali chidogho kwa ihaki, kubita ukupata tsimali nyingi kwa ukubunza. 9 Ghumoyo ghwa imunu ghofikitsa inzila yake, lekeni IMNDEWA kolongotsa pfayoghenda. 10 Ghayolonga mfalume kolongotsighwa na Imulungu, na ghumlomo ghwake ng'aghutotsa baye hayohigha. 11 Minzani na pfipimo ipfilongesa pfa kwake yeye IMNDEWA, ghamabwe ghose gha ukulingila ighali mna ghumkoba kaghatenda yeye. 12 Mfalume yang'atenda ghehile, ayo kodesa ghendo, kwaapfila ichighoda chake cha ufalume chakwima ghoya kwa ukutenda ihaki. 13 Imilomo ilonga ighali gha haki yomdeng'elesa mfalume, na komkunda imunu ayula iyolongesa. 14 Imaya ya mfalume yeghala na wasenga wa lifwa, lekeni imunu yana ihekima kodaha kuihotsa. 15 Uhanga wa mfalume ung'asangalamka, umanye aho hana ugima, na uluso wake ka bingu lya mvula tsa ukuhandila. 16 Ukupata hekima kunogha kubita inzahabu, ng'apfu ghendo uwe na tsimbutsi kubita kuwa na fetsa. 17 Inzila ng'ulu ya iwanu wana ihaki ukuhepa ighehile, ayula iyakwalangitsa mna tsinzila tsake kekinga yawe mgima. 18 Ichidandali chomlongotsa imunu mna ukukomighwa, na ghamaghodo nagho ghomlongotsa imunu mna ukughwa. 19 Ng'apfu woneke kwa mdodo hamwe na awala iwaonelighwe, kubita ukwigholela ipfinu ipfibokighwe hamwe na awala wana ichidandali. 20 Imunu wowose iyotoghola kufundingwa katsobokela ighanoghile, na kobweda ghendo yeye iyomlolela IMNDEWA. 21 Imunu yana ihekima mmoyo komanyika kana mbutsi, ukulonga pfinoghile kowongetsela iwanu ukufundighwa. 22 Kuwa na tsimbutsi kweghala na imbwibwi ya ugima, lekeni iwabotsi wotowighwa na ubotsi wao wenyegho. 23 Ghumoyo ghwa hekima ghomlongotsa imunu mna ukulonga kwake, na chayolonga chowafunda iwanu. 24 Malonga gha uluso gheghala la lisegha lya uki, ghamta mmoyo na ghoitenda mipate yako iwe migima. 25 Kuna inzila yakoneka inogha kwa imunu, lekeni kwaitsighila yomlongotsa kuna ukufa. 26 Libasu lya chijo lyomwinula imunu yakasang'ane, na inzala yomtenda yaghendelele kusang'ana. 27 Munu yehile kobama kutenda ghehile, na chayolonga cholakatsa ka ghumoto. 28 Imunu yehile kowasongetsa iwanu wesonge, na ung'enye wombaghula imunu na sale yake wa habehi. 29 Imunu mghobo kombugha miyaghe, na komlongotsa mna tsinzila tsihile. 30 Iyokonyetsa inenge kana lyake lihile lyayobama kutenda, na iyobetula lilomo, ayo kobama kutenda ghehile 31 Litwi lina uhenga ka taji ilimelemetseka, ka imunu kokala kwa ukutenda ighanoghile. 32 Ayula ing'ayosumka baye kughudubuka kanogha kubita ayula yana libapfu, kwilongotsa ghumweegho kubita kukuboka ghumji. 33 Iwanu wakwasa tsisimbi wamlamle, lekeni chila chinu ichilamlighwa cholawa kwa IMNDEWA.