1 Ng'apfu kuwa na taghwa linoghile kubita kuwa na mali nyingi, na ukutogholighwa kunogha kubita kuwa na fetsa na inzaabu. 2 Iwanu wana tsimali nyingi na iwanu wahingwa wehangila chinu chimwe, IMNDEWA yuyo iyawaumbile awo wose. 3 Imunu iyakengele koghona ighehile na kepfisa, lekeni iwali wabotsi woghaghendela na hambele wolaghighwa. 4 Ukwihulumsa na ukumpfuka IMNDEWA, komwing'a imunu tsimali, iheshima na ugima. 5 Nzila tsa wanu wehile tsimema mihonga na mitegho, lekeni ayula iyoghenda aku kakwalangitsa katsoihepa. 6 Umfunde imwana apfila pfaibamighwa yalelighwe, naye ng'atsesemwa baye hata yang'awa kalala. 7 Imunu tajili komtawala imunu mhingwa, na imunu iyokopa kamtumwa wa imunu ayula iyokopesha. 8 Ayula iyohanda ghehile katsopfuna ukughaya, na ing'weku yake iyowalaghila wayaghe itsobenighwa. 9 Imunu yana inenge ya uluso katsobweda, kwaapfila ichijo chake kowagholela iwahingwa. 10 Muwinge imunu mtalatsi, na hengele litsomala, ukwisonga na ichinyala pfose pfomala. 11 Imunu ayula iyokunda kuwa na ghumoyo ghwelile na iyolonga ighanoghile, ayo katsakuwa sale wa imfalume. 12 Tsinenge tsa IMNDEWA tsomkinga munu yana itsimbutsi tsa ukumanya lekeni ghamalonga gha iwanu waghutsu koghapfulugha. 13 Munu mdebwe kolonga, "Kuna simba kunze silawa baye katsong'oma!" 14 Mlomo ghwa pinga chiweghe ka pondo ilighendese hasi, na ayula IMNDEWA iyomwihila katsakwingila amwo. 15 Ubotsi wa mghati mwa ghumoyo ghwa imwana, lekeni ukumfapula koulapfa ubotsi awo. 16 Ayula iyakongetsa mali tsake kwa kuwabunza iwahingwa, na ayula iyoweng'a tsinzawadi iwanu matajili, wose watsakuwa wahingwa.

17 Uwambe lighutwi na utegheletse chawolonga iwanu wana ihekima, na ghumoyo ghwako ghuwe hamwe na ichinu achino chanikufunda. 18 Kwaapfila ghweghwe kutsodeng'a ka kogheka mmoyo mwako na ka koghalonga longa kwa ghumlomo ghwako. 19 Nobama ghweghwe umhuwile IMNDEWA, leloli nokulongela ghweghwe, ona ghweghwe ghendo. 20 Angu sikwandikile baye Ng'ungo salasini Mna ukushauli na mna ukumanya, 21 Ghakufunde ghweghwe ukulongesa na ghamalonga ighotogholeka, udahe kumwidika ghoya imunu ayula iyakutumile?

22 Uleke kumboka imunu mhingwa kwaapfila yeye kamhingwa, wala kumbunza imunu mhingwa kuna libalatsa, 23 Kwaapfila IMNDEWA katsolisola lighomba lyao na kuwamila, naye katsowaboka awala iwawabokile iwanu awo.

24 Uleke kuwa sale wa munu iyoghudubuka ghudubuka, wala uleke kwilongotsa na munu iyakwona maya himahima, 25 hela kwitsefunda tsinzila tsake, na kwitsetegha ghumwenygho.

26 Uleke kuwa yumwe mna awala iwakwika poni, iwakwika poni ipfinu pfawo kwa ghamadeni gha iwanu wangi. 27 Ka kwahela chinu cha kuliha, ng'ambe ilusatsi lwauwasila lutsosolighwa?

28 Uleke kusoghetsa libwe lya ghumbaka ghwa ghumwande, ighwikighwe na iwahenga wako.

29 Angu komwona imunu iyosang'ana ghoya mna tsing'onde tsake? Ayo katsosang'ana tsing'onde tsa wafalume, na ng'atsosang'ana baye tsing'onde tsa iwanu mbughila mbughila.