1 Imwana yakengele komtenda aba wake yadeng'elele, lekeni imwana mbotsi komghela usungu mai wake. 2 Imali ibamighwa kwa nzila ihile, ayo si chinu baye, lekeni haki yokombola kulawa mlifwa. 3 IMNDEWA ng'owaleka baye wanu wa ihaki wawe na nzala, lekeni kotsilema tsitamaa tsa iwehile. 4 Ghamoko ighaleghele ghomtenda imunu yawe mhingwa, lekeni ghamoko ghana ingupfu ghomwing'a tsimali. 5 Iyopfuna mna msimu ghwa ukupfuna, ayo ka mwana yakengele, lekeni ayula iyowasa mna ghumsimu ghwa ukupfuna, ayo ka mwana iyoghuma ichinyala. 6 Ukubweda kwa mwitwi mwa ayula yana ihaki, lekeni ughobo womema mna ghumlomo ghwa imunu yehile. 7 Iwanu wana ihaki watsokumbikighwa kwa ukubweda, lekeni litaghwa lya iwanu wehile litsakola ghendo. 8 Yana ghumoyo ghwa hekima kohulikitsa ghamalaghitso, lekeni imbotsi yana ichilimilimi katsohupa. 9 Iyakwang'a tsinzila tsigholoke kokala tseghamba, lekeni wowose iyowinza nzila tsihile katsomanyika. 10 Iyokonyetsa kwa inenge koghala kusing'inika, na ayula imbotsi yana ichilimilimi katsohupa. 11 Ghumlomo ghwa imunu yana ihaki ghwa mbwibwi ya ugima, lekeni ghumlomo ghwa imunu yehile ghopfisa ughobo. 12 Ukuhila koghala ukwisonga, lekeni ukukunda koghubika matotso ghose. 13 Mna ghumlomo ghwa imunu iyomanya mna hekima, lekeni walihela tsimbutsi watsofapulighwa kumghongo. 14 Wana ihekima wekagha ukumanya, lekeni ghumlomo ghwa munu mbotsi ghoghala hima ghamaghayo. 15 Tsimali tsa munu tajili ka ubanda umkinga, lekeni munu mhingwa kokomighwa na uhingwa wake. 16 Tsing'onde tsa imunu yana ihaki tsoghwekighwa ugima, lekeni imunu yehile kobokela maliho gha tsinzambi. 17 Iyotoghola ukukanyighwa, ayo koghenda kuna ugima, lekeni iyolema kukanyighwa, ayo kakwagha ghendo. 18 Iyomhila miyaghe chinyelenyele, ayo kana mlomo ghwa mghutsu, lekeni iyombangitsila myaghe ayo kambotsi. 19 Mna ghamalonga mengi, na ghamatotso ghamumo, lekeni iyoghughoma mlomo ghwake, ayo kakengela. 20 Lulimi lwa munu yana ihaki ka fesa iinoghile, lekeni ghumoyo ghwa imunu yehile si chinu ghendo baye. 21 Mlomo ghwa imunu yana ihaki ghwowaghutitsa iwanu wengi, lekeni wabotsi wakufwa kwaapfila wahela tsimbutsi. 22 Tsibalaka tsa IMNDEWA tsoghala utajili, wala ng'otsihanganya baye na ukusing'inika. 23 Kwa munu mbotsi ukutenda ghehile ka mdawalo, lekeni yana tsimbutsi kodeng'elela ihekima. 24 Chayopfuka imunu yehile chicho chitsomtsila, lekeni chayobama munu yana ihaki kakwing'ighwa chicho. 25 Inyahemu haibita, iwehile wohupa, lekeni yana ihaki kakwima ghoya matsuwa ghose. 26 Ka isiki pfaing'ang'a mna ghamatsino, na ka liyosi pfalifughuta mna tsinenge, pfipfo pfaili kwa imunu mdebwe kwa awala iwomtuma. 27 Ukumpfuka IMNDEWA kwakongetsa imiyaka ya imunu kukala mgima, lekeni miyaka ya iwehile Itsohungutsighwa. 28 Ukulolela kwa imunu yana ihaki kodeng'eletsa, lekeni ukulolela kwa imunu yehile komala hela. 29 Nzila ya IMNDEWA iyo iwotsumila iwanu wana ihaki, lekeni kwa iwotenda ghehile nzila ya ukukomighwa. 30 Iwana ihaki watsokala tseghamba matsuwa ghose, lekeni iwehile ng'awatsokala baye muisi. 31 Mlomo ghwa imunu yana ihaki ghwolonga ihekima, lekeni lulimi lwa imunu iyehile lutsoganighwa ghendo. 32 Mlomo ghwa imunu yana ihaki ghutsomanya ighotogholighwa, lekeni mlomo ghwa imunu iyehile gholonga ghehile ghaliyeka.