1 Atsino tsing'ungo tsa Selemani, mwanaghe Daudi, mfalume wa Isiraeli. 2 Tsitsowapfila iwanu kuimanya ihekima na ghamahala, na kuwatenda wamanye tsimbuli tsina imaana ng'ulu. 3 Tsitsowafunda iwanu wawe na tsimbutsi, na watogholeke, na watende ghanoghile, gha haki, na ighanoghile. 4 Tsitsowatenda iwali wabotsi wakengele, na iwasongolo ukumanya, na wakale kwa kwalangitsa. 5 Iyakengele yang'atsitegheletsa, tsitsomwongetsela ukumanya, na iyotanga tsitsomlongotsa mna ighanoghile. 6 Nawo watsomanya imana ya tsing'ungo na imifano, ghamalonga na ipfitendawili pfa wanu wana ihekima.

7 Ukumpfuka Imulungu ghugho mwanduso ghwa ukumanya, lekeni iwabotsi woibetsa ihekima na ukukanyighwa. 8 Mwanangu tegheletsa ghayokulaghitsa aba wako, wala uleke kughaleka ghayokufunda mai wako. 9 Agho ghatsakuwa ka taji mwitwi mwako, na ka mkufi ghunoghile msingo mwako. 10 Mwanangu, wana inzambi wang'akusongeletsa, ghweghwe uleke kutoghola. 11 Wang'alonga, "Tughende tukampfingile imunu na tumkome, utse tumkome iyalihela totso. 12 Tuwametse aku wawagima ka pfalimetsa likabuli, wawe ka awala iwohulumka kuna lipondo ilighendese hasi. 13 Tutsopata chila chinu ichininoghile cha bei ng'ulu, na ng'anda tsetu tsitsomema pfinu pfatubokile. 14 Utse tukasang'ane wose na twitsegholela ipfinu pfatuboka." 15 Mwanangu, uleke kwilongotsa nawo, ughughome ghumghulu ghwako ghuleke kubita mna tsinzila tsawo. 16 Mana ghamaghulu ghawo ghotsumila ukutenda ghehile, nawo wosumkila ukumwagha idamu. 17 Kwa apfila iyotegha ghumtegho aku ichideghe kolola, ayo kotenda sang'ano ya hela. 18 Lekeni iwanu awo wepfisa na wobeta ukwikoma iwenyegho, wetegha na weyonza ugima wawo iwenyegho. 19 Apfi pfipfo pfaili kwa wose iwoboka, woukoma ugima wawo iwenyegho.

20 Ihekima yokemelela mna tsinzila, yokemelela mna ghamaghulilo. 21 Yokemelela hana imitingano ya iwanu, na yolonga hana ghamalango gha ukwingilila mna ghumji.

22 "Mwemwe iwabotsi! Mwounanahila ubotsi wenu mbaka tsuwachi? Namwe imbetsa, mtsoleka tsuwachi ukudeng'elela ukubetsa kwenu? Na iwabotsi kuhila ukumanya? 23 Lelo tegheletseni achi chaniwakanya, na nene nitsowamwaghila iloho yangu, na kughatenda ghamalonga ghangu ghamanyike kuna mwemwe. 24 Kwa apfila tsaniwakema, lekeni mwemwe mlema, tsanigholosa ghumoko kuwakema, lekeni mwemwe mlema ukunitegheletsa. 25 Kwa apfila tsambetsa chila chinu chaniwalongele, na mlema kutoghola chaniwakembele, 26 apfo na nene nitsowaseka ahala hamtsoghaya, nitsowabetsa ahala wogha hautsowatsila. 27 Ahala wogha hautsowatsila ka nyahemu, ahala ghamajanga haghatsowatsila ka chipfulapfumbi, ahala ukughanzika na usungu hapfitsomtsilani. 28 Watsonikema lekeni sitsowedika baye, watsonibama lekeni ng'awatsombona baye. 29 Kwaapfila tsawakwihila ukumanya, na ng'awasaghule baye ukumpfuka IMNDEWA. 30 Walema ukutegheletsa chaniwashauli, na aghala ghose ghaniwakanyile. 31 Apfo watsakuja ghamatunda gha aghala ghawatendile, watseghuta ghamatunda gha ighehile ghawatendile. 32 Kwaapfila iwalihela tsimbutsi wekoma kwa ukulema kwawo, na ukubetsa kwa wanu iwabotsi kutsowakoma, 33 lekeni chila iyonitegheletsa katsokala tseghamba, katsokala tulu, bila kupfuka ighehile."