1 Aghano ghagho malonga gha Aguri mwana wa Yake, ghayawalongele Itieli na Ukali. 2 Nene nambotsi ghendo kubita iwanu wose, na imunu yalihela tsimbutsi tsayobamighwa imunu yawe natso. 3 Tsasifundile baye nimwenyegho ihekima, wala simmanyile baye Imulungu yenzeluke. 4 Angu nani yadinile kulanga kuya kahulumka hasi? Apfi nani iyaghoghile libeho mna ghamoko ghake? Angu nani iyohile ghamatsi mna libeme? Apfi nani iyekile imibaka ya isi yose? Taghwa lyake nani, na taghwa lya imwanaghe mmale nani? Ka komanya nongele. 5 Chila longa lya Imulungu lyolongesa. Yeye ka ngawo kwa awala wose iwomtsumila. 6 Uleke kwongetsa chinu mna ghamalonga ghake, hela katsokukembela, naghwe kutsakoneka kwa mghutsu.

7 Ghwe Imulungu, nokulomba pfinu pfili, uleke kunyima hanili sina nife baye. 8 Ukulonga ughutsu na ukubugha iwanu, apfi pfili upfike kutali na nene ghendo, uleke kunenda nene niwe mhingwa au niwe na mali nyingi, lekeni ungaye ichijo chanibama, 9 ning'awa tajili, nitseghuta na kukulema, na kulonga, "Angu IMNDEWA nani?" Ning'awa mhingwa, nitsakwiba, na nitsolighela chinyala taghwa lyako ghwe Imulungu wangu. 10 Uleke kumlongeletsa imtumwa kwa imkulu wake, hela katsokulighita na kutsakoneka kutotsa. 11 Hana lweleko lwa iwanu iwolighita aba tsawo, wala ng'awowabaliki baye mame tsawo. 12 Hana lweleko lwa iwanu iwebona wela mna tsinenge tsawo iwenyegho, kumbe ukwiha kwawo ng'ana kuhopfughighwe baye, 13 Hana lweleko lwa iwanu wana tsinenge tsa chidandali, iwowalola wayao kwa kuwabetsa. 14 Hana lweleko lwa iwanu wana matsino ka mapanga, na maghegho ghawo ka mimaghe. Wawo wowaghegheda iwahingwa, na iwanu iwalihela chinu muisi. 15 Img'onyo iyokemighwa luba kana wana mapimga weli, iwolila, "Ngaya ghwe! Ngaya ghwe!" Kuna pfinu pfidatu apfo ng'apfighuta baye, na kuna pfinu pfine napfo ng'apfilonga baye, "Nighuta", 16 kutsimu, inda ya pinga ing'aikweleka imwana baye, lidongo ing'alighuta ghamatsi baye, na ghumoto ing'aghulonga, "Basi!" 17 Inenge ya munu imbetsa aba wake, na aila ileka kumhulikitsa mai wake, wabondwa wa kuchiwala watsoing'ola, na pfitsiya wa magengele watsoija. 18 Kuna pfinu pfidatu pfonikangawatsa nene, na pfine sipfitanga baye, 19 inzila ya chimanga pfayoghuluka mlanga, inzila ya inzoka mna libambalawe, inzila ya imeli mna ibahali, na achila ichiwakwegha immale na ipinga. 20 Apfi pfipfo pinga mghoni pfayali, kakuja, kobaghusa ghumlomo, kuya kolonga, "Sitendile chochose baye chihile!" 21 Hana pfinu pfidatu pfoitenda isi ighudeme, na hana pfinu pfine isi ng'aidaha baye ukupfidudumila. 22 Imtumwa hayakuwa mfalume, na imbotsi hayeghuta ichijo, 23 ipinga ing'ayokundighwa baye hayokwelighwa, na ipinga mtumwa hayosola immale wa ipinga iyomsang'anila. 24 Kuna pfiumbe pfine muisi pfidogho dogho, lekeni pfikengela ng'an, 25 mswa pfiumbe pfilihela ngupfu, lekeni weikila ichijo mna ghumsimu ghwa chiyangatsi. 26 Balaghaja wanyama iwalihela ngupfu ghendo, lekeni wokala mna ghamabambalawe; 27 wanzighe wahela mfalume, lekeni welongotsa mna misululo. 28 Chimbulumbulu, kodaha kumkinda mna ghumoko, lekeni kokala mna tsing'anda tsa wafalume. 29 Kuna pfiumbe pfidatu hapfighenda pfonogheletsa, ona kuna pfiumbe pfine hapfighenda pfoghenda kwa kwighoda; 30 Simba, imnyama yana ingupfu kubita wose, ng'akuya kuchughu baye kwa kupfuka chinu chochose. 31 Ijogholo iyoghenda kwa kwighoda, kuya imvulati, na mfalume iyoghenda hambele ha iwanu wake. 32 Ka kutenda chinu cha ubotsi, na kwitunya ghumwenyegho, au kufikitsa kutenda ghehile, udiwe ghumlomo ghwako, winyamale tulu ghendo. 33 Ka apfila ukuhighisa ghamatsiwa pfakulapfa isiagi, na ka apfila pfaumtowa imunu mmula mwolawa funung'ula, pfipfo na ukuiswangitsa imaya pfakughala ukwisonga.