1 Imunu iyoghendelela kuwa msughu chila hayokanyighwa, ayo katsobeneka beneka ghendo kwa ukwidukitsa na ng'atsohona baye. 2 Wanu wana ihaki wang'atawala, iwanu wodeng'elela, lekeni iwanu wehile wang'atawala, iwanu woghula. 3 Imunu iyokunda ihekima, ayo komtenda aba wake yadeng'elele, lekeni immale iyakwanga na mapinga pfiweghe, ayo kopwililisa tsimali tsake. 4 Mfalume yang'ahigha pfinoghile koitenda isi yake ime ghoya, lekeni ayula iyobokela hongo koighwisa isi yake. 5 Imunu ayula iyomnyenga nyenga miyaghe, ayo kakwika mtegho ghutsomonza ghamaghulu ghake imwenyegho. 6 Imunu yehile keyonza na tsinzambi tsake imwenyegho, lekeni imunu yana ihaki, kakwimba na kudeng'elela. 7 Munu iyana ihaki komanya aghala ghawobama wanu iwahingwa, lekeni imunu yehile ng'omanya baye chinu ka acho. 8 Iwanu iwobetsa wayawo woghutenda ghumji ghuwe na tsogho, lekeni awala wana ihekima wohotsa imaya. 9 Imunu yana ihekima yang'amghala munu mbotsi kwibalatsa, imunu mbotsi komseka, komkembela, na ng'enyamala baye. 10 Iwanu iwokoma wayao womwihila munu yalihela matotso, hata imunu yanoghile wobama wamkome. 11 Imunu mbotsi kolangusa mwatsi apfila pfayaghudubuke, lekeni yana hekima koipfisa imaya yake. 12 Mtawala yang'ahulikitsa mbuli tsa ughutsu, watumighwa wake wose wakuwa weha. 13 Munu imhingwa na iyodununza iwanu wehangila chinu chimwe, wose weli IMNDEWA koweng'a ghumwanga mna tsinenge tsawo. 14 Mfalume yang'ahigha pfinoghile ghamaghomba gha iwanu wahingwa, ichighoda chake cha ufalume chitsokala kwa matsuwa mengi. 15 Ukumfapula na ukumkanya imwana komwing'a ihekima, lekeni imwana iyalekighwe yatende pfayobama, ayo komghuma chinyala mai wake. 16 Iwanu wehile hawakongetseka, ighehile ghakongetseka, lekeni wanu wana ihaki watsakona apfila pfawatsakughwa. 17 Umkanye imwanagho, naye katsokutenda ubwede, ona, katsoghutenda ghumoyo ghwako ghudeng'elele ghendo. 18 Ka kuduhu unabii wa Imulungu, iwanu wokala bila kuwinza ghamalaghitso, lekeni kabweda imunu ayula iyokinda ghamalaghitso. 19 Imtumighwa ng'okanyighwa kwa ukulongighwa kuliyeka baye, kwaapfila hata ka yeye komanya ichilongighwa, lekeni ng'ochitenda baye. 20 Angu komwona imunu ayula yana ilulimi limi? Ng'apfu imunu iyali mbotsi kana lolelo kubita yeye. 21 Ka imunu komdeketsa imtumwa wake kulawa udodo wake, hambele katsomghalila usungu. 22 Imunu iyoghudubuka kosongetsa ughomvi, na imunu iyosumka kwona maya kotenda nzambi nyingi. 23 Chidandali cha imunu chitsomuhulumsa, lekeni awala iwahole watsoheshimika. 24 Imunu iyomwapfila imbapfi kelagha imwenyegho ghendo, kelaha ukulonga achila chayonile, lekeni ng'ochilonga baye. 25 Ukuwapfuka iwanu kweikila ghumwenyegho ghumtegho, lekeni wowose iyomlolela IMNDEWA, ayo katsohona. 26 Wanu wengi wobama imkulu yawonele libatsi, lekeni imunu kobokela ihaki yake kulawa kwa IMNDEWA. 27 Imunu yehile kowadesa iwanu wana ihaki, na imunu yana ihaki kowadesa iwanu wehile.