1 Uleke kwighodela ilupfi, kwaapfila ng'umanya baye choni ichidaha kulawila mna litsuwa limwe. 2 Leka munu yungi yakutunye, wala uleke kwitunya ghumwenyegho, imgheni yakutunye, na si imilomo yako baye. 3 Libwe tsito na msanga naghwo mtsito, lekeni ukudesighwa na munu mbotsi kutsito kubita apfo pfili. 4 Imaya yolangusa ukali, na ukughudubuka kopfukighwa, lekeni nani yodaha kwima hambele ha imunu yana ichepfu. 5 Ng'apfu ukumkembela imunu mwatsimwatsi, kubita ukumkunda imunu kwa chipfiso. 6 Ng'apfu upate pfilonda kulawa kwa sale yako iyokukunda, kubita kunonolighwa na imunu iyokuhila, ayo kokubugha. 7 Imunu iyeghutile kolema ukuja hata ung'amwing'a uki, lekeni kwa ayula yana inzala hata ipfijo pfili usungu yeye kopfona pfamta. 8 Imunu iyakwanga kwanga kutali na ikaye yake, ayo keghala na ichideghe iyoghuluka ghuluka kutali na ichibali chake. 9 Ghamapfuta ighonung'ila ghoya na upfumba ghotenda ghumoyo ghudeng'e, lekeni kodeng'elela ghendo imunu iyobokela chayolonga sale yake iyomtoghola. 10 Uleke kumleka sale yako wala sale wa aba wako, ung'atingwa uleke kutsumila kwa ndughu yako, ng'apfu imunu iyali habehi naghwe kubita indughu yako iyokala kutali. 11 Mwanangu, uwe na hekima, na ughutende ghumoyo ghwangu ghudeng'e, apfo nitsodaha kumwidika imunu wowose iyonibetsa. 12 Imunu iyakengele koghona ighehile na kepfisa, lekeni iwali wabotsi woghaghendela na hambele welagha. 13 Sola ligwanda lya ayula iyomwikila poni imgheni, ulikindilise ghoya ka komwikila poni pinga mgheni. 14 Iyombaliki miyaghe nemitondo tondo na kumlamsa kwa kukemelela, ukumbaliki ako kutsakoneka ka komlighita miyaghe. 15 Pinga mghobo keghala na madonondo gha imvula itowa misi ngima, 16 ukumlongela yenyamale yakuwa ka kolilongela libeho lileke ukuduma, au ka imunu iyokinda ghamapfuta ighotelebuka. 17 Ichuma chonola chuma chiyaghe, pfipfo na imunu na sale yake pfawenola. 18 Ayula iyotunza ghumbiki katsakuja ghamatunda ghake, na ayula iyomsang'anila imkulu wake, ayo katsoheshimighwa. 19 Ka apfila chihanga cha imunu pfachikoneka mmatsi, pfipfo imunu pfayodaha koneka kubitila ghumoyo ghwake. 20 Kutsimu na lifwa ng'apfighuta baye, pfipfila na tsinenge tsa wanu ng'atsighuta ukwona baye. 21 Inzahabu na ifetsa yoghetsighwa inoghe kwa kulakatsighwa mna litanuli lya ghumoto, lekeni imunu koghetsighwa na apfila iwanu pfawomtunya. 22 Hata ung'amdugha imunu mbotsi kwa msi mna lituli, hamwe na ingano, ubotsi wake ng'aumlawa baye. 23 Idime ghoya imipfigho yako, na walolese pfinoghile wanyama wako, 24 kwaapfila tsimali ng'atsikalagha baye matsuwa ghose, wala litaji nalyo ng'alikalagha baye mna pfeleko pfose. 25 Hautsogana mitsani na mitsani ingi haitsotsuka, uilundike hamwe imitsani ilawile kuchidunda, 26 hambele kutsogheta imighala ya wang'olo utende tsinguwo, na wamene kutsowautsa ughule imighunda. 27 Nawo wamene watsokwing'a ghamatsiwa, kutsakunwa ghweghwe ghumwenyegho, watsakunwa iwanu wa ikaye yako, na watsakunwa iwatumwa wako mapinga.