1 Ukwidika kwa uhole komalitsa imaya, lekeni ukwidika kwa ukukembela kwakongetsa imaya. 2 Ilulimi lwa imunu yana ihekima lwakwenetsa ukumanya, lekeni iwanu wabotsi wobwatuka ubotsi. 3 Tsinenge tsa IMNDEWA tsolola chila hanu, tsomlola imunu iyehile na iyanoghile. 4 Ilulimi ilughala ukuhona lweghala na ghumbiki ghuna ugima, lekeni lulimi ilughutsuka lwotenyula ghumoyo. 5 Imunu mbotsi koghabetsa aghala ghayomfunda aba wake, lekeni ayula iyotoghola ukukanyighwa ayo kakengela. 6 Mng'anda mwa imunu yana ihaki mna mali nyingi, lekeni ghawopata wanu iwehile ghowaghalila maghayo. 7 Imilomo ya wanu wana ihekima yakwenetsa ukumanya, lekeni ng'aili pfipfo baye kwa imimoyo ya iwanu wabotsi. 8 Chawolapfa iwanu wehile chiwe nambiko chomwihila IMNDEWA, lekeni ukulomba kwa imunu yana ihaki komnoghela IMNDEWA. 9 Nzila ya imunu yehile yomwihila IMNDEWA, lekeni IMNDEWA komkunda ayula iyowinza ihaki. 10 Ukutowighwa kombeta imunu ayula iyolema kuwinza inzila inoghile, na wowose iyolema ukukanyighwa katsakufa. 11 Kutsimu na ukuhupa kwa mwatsi hambele ha IMNDEWA, lelo pfihi na imimoyo ya iwanu ng'oimanya baye? 12 Imunu mtalatsi ng'obama baye ukukanyighwa, wala ng'obama baye kuwautsa iwanu wana ihekima. 13 Ghumoyo ighudeng'elela ghotenda chihanga chisangalamke, lekeni ghumoyo ighutama ghotenda iloho itenyuke. 14 Ghumoyo ghwa imunu iyakengele ghobama ukumanya, lekeni imilomo ya iwanu wabotsi yakuja ubotsi. 15 Matsuwa ghose gha imunu iyodununzika gheha, lekeni yana ghumoyo ighusangalale kodeng'elela lusona matsuwa ghose. 16 Ukuwa na tsimali chidogho hamwe na ukumpfuka IMNDEWA, kunogha kubita kuwa na tsimali nyingi aku kwamna ghamaghayo. 17 Ng'apfu ukuja ichijo cha mboghambogha aku iwanu wekunda, kubita ukuja nyama ya ing'ombe iyanonile aku weyihila. 18 Imunu iyosumkila ukughudubuka kosongetsa ughomvi ulawile, lekeni ayula ing'ayosumkila baye ukughudubuka kohotsa ughomvi. 19 Inzila ya munu mdebwe idiwighwa mihonga, lekeni inzila ya munu yana ihaki ya mwatsi ka libalabala. 20 Imwana iyakengele komtenda aba wake yadeng'elele, lekeni imwana mbotsi kombetsa wenye wake. 21 Ubotsi womdeng'elesa imunu yalihela tsimbutsi, lekeni iyakengele kotenda achila ichinoghile. 22 Ighobamighwa kutendeka ghohinyika ka haduhu iwanu iwoshauli, lekeni ghotendeka ka kuna washauli wengi. 23 Imunu kodeng'elela hayakwidika ghoya, ng'ambe pfinogha ghendo ichinu ching'alongighwa mna ghumsimu ghwake. 24 Inzila ya ugima ya imunu iyakengele yogheluka kudando, yomtenda yahepe yaleke kughenda kuhisi kutsimu. 25 IMNDEWA kotsimwagha tsing'anda tsa iwanu wana ichidandali, lekeni koikinga mibaka ya ipinga chitsuka. 26 Chayopfikitsa ukutenda imunu iyehile chomdesa IMNDEWA, lekeni ghamalonga ighanoghile ghomdeng'elesa. 27 Imunu iyopata tsimali kwa ukubunza katsowatenda iwanu wa ikaye yake waghaye, lekeni ayula iyolema kubokela hongo katsokala mgima. 28 Ghumoyo ghwa imunu yana ihaki ghwakwalangitsa ichinu cha ukwidika. lekeni ghumlomo ghwa imunu yehile gholonga ighehile. 29 IMNDEWA kokala kutali na iwanu wehile, lekeni kohulika chawolomba iwanu wana ihaki. 30 Chihanga ichimunya munya choghutenda ghomoyo ghudeng'elele, na imbuli inoghile yoitenda imipate iwe na ngupfu. 31 Imunu wowose iyoteghaletsa ahala hayokanyighwa, ayo katsokala hamwe na awala wana ihekima. 32 Imunu wowose iyolema kufundighwa ayo kelema imwenyegho, lekeni ayula iyotoghola ukukanyighwa katsomanya. 1 33 Ukumpfuka IMNDEWA komfunda imunu yawe na hekima, na ung'abama ukuheshimika tanu wanze ukwihulumsa.