1 Mwanangu, uleke kughasemwa malangulitso ghangu, lekeni ugheke malaghitso ghangu mmoyo mwako. 2 Kwaapfila ghatsokongetsela matsuwa mengi na miyaka mingi ya ugima na kukala tseghamba. 3 Ukutogholighwa na libatsi pfileke kukala kutali naghwe, upfohe msingo mwako, upfandike mmoyo mwako. 4 Apfo kutsotogholighwa na kutsakuwa na taghwa linoghile, kwa Imulungu na kwa iwanu.

5 Wihuwile IMNDEWA kwa ghumoyo ghwako ghwose, na uleke kwihuwila tsimbutsi tsako ghumwenyegho. 6 Umtambule Imulungu mna chila chinu chautenda, naye katsogholosa tsinzila tsako. 7 Uleke kwibona ghumwenyegho ka kuna hekima, umpfuke IMNDEWA na ukale kutali na ighehile. 8 Apfo itsakuwa ugima kwa ilukuli lwako, na itsoitenda imipate yako iwe na ngupfu.

9 Mheshimu IMNDEWA kwa tsimali tsako, na kwa ipfijo pfako pfaulimbula. 10 Aho tsikano tsako tsitsomema ipfijo, na ghamabigha ghako ghatsomema idipfai ya sambi. 11 Mwanangu, uleke kubetsa ahala haukanyighwa na IMNDEWA, wala uleke kughudubuka ahala hayokumanila, 12 Kwaapfila yeye IMNDEWA komkanya ayula iyomkunda, ka aba pfoyomkanya imwanaghe iyomnoghela.

13 Kabweda imunu ayula iyopata ihekima, na imunu iyopata ukumanya. 14 Kwa apfila ifaida yake inogha kubita ifaida ya pfetsa, na faida ng'ulu kubita inzahabu, 15 Hekima ina bei ng'ulu kubita libwe lya lubi, kuduhu chinu chausulukila ichighala nacho. 16 Kuna ghumoko ghwake ghwa kujilo kana matsuwa mengi gha ukukala mgima, na kuna ghumoko ghwake ghwa kumoso kana tsimali na iheshima. 17 Tsinzila tsake tsonoghelesa ghendo, tsose tsoghenda kuna ukubweda. 18 Hekima yambiki ghwa ugima kwa awala iwoikindilitsa, wobweda ghendo awala wose iwoinanahila. 19 Kwa ihekima yake IMNDEWA keka imisingi ya isi, kwa tsimbutsi tsake kaumba kulanga ka pfakuli. 20 Kwa ukumanya kwake ipfilindi pftulika na pfilapfa ghamatsi, na libingu lilaghatsa litungwe. 21 Mwanangu, ihekima na ukukengela, pfileke kuka kulawa mna tsinenge tsako. 22 Agho ghatsakuwa ugima wako, na unzolingo unoghile msingo mwako. 23 Naghwe mnzila kutsoghenda tseghamba, na ghumghulu ghwako ng'witsekwala baye. 24 Haukala hasi kwahela wogha, na hauwasa, tsinongo tsako tsisakuwa tsamta. 25 Uleke kupfuka hagholawila mafwa gha ukwidukitsa, ukutowighwa ikuwalawila iwehile. 26 Kwa apfila IIMNDEWA katsakuwa lolelo lyako, naye katsoghukinga ghumghulu ghwako ghuleke konzeka. 27 Uleke kuwema ighanoghile awala iwobamighwa wapate, ka kwinawo uwetso wa ukutenda apfo. 28 Uleke kumlongela imunu iyokala habehi naghwe, "Utse hambele, nitsokwing'a ilupfi," aku kwinacho baho ichinu acho. 29 Uleke kupanga ukumtendela ghehile imunu iyokala habehi naghwe, iyokala naghwe tseghamba. 30 Uleke kwisonga hela na imunu, ka ng'akutendele ghehile baye. 31 Uleke kumwonela gele imunu mghobo, wala uleke kumwigha aghala ghayotenda. 32 Kwa apfila imunu yehile komdesa IMNDEWA, lekeni yeye kowatoghola awala wana ihaki. 33 IMNDEWA kotsilighita tsing'anda tsa Iwehile, lekeni kotsitenda tsibwede tsing'anda tsa wana ihaki. 34 Yeye kowabetsa awala iwobetsa wayao, lekeni kowatendela uluso awala iwehulumsa. 35 Wana ihekima watsohala heshima, lekeni iwabotsi watsopata chinyala.