1 Ipinga yana ihekima koitsenga ing'anda yake, lekeni ipinga mbotsi koimwagha ing'anda yake kwa ghamoko ghake imwenyegho. 2 Yeye iyakwang'a mna tsinzila tsigholoke kompfuka IMNDEWA, lekeni ayula iyakwang'a mna tsinzila tsihile kombetsa. 3 Imunu mbotsi kefapula imwenyegho kumghongo kwa ukulonga kwake pfihile, lekeni ayula iyakengele ghayolonga ghomkinga. 4 Ka kuduhu ng'ombe wa ukulimila, ichikwama chokala chinogha, lekeni ng'ombe wengi woghala pfijo pfingi. 5 Mkalangama iyolongesa ng'oghutsuka baye, lekeni mkalangama wa ughutsu koghutsuka. 6 Imunu mtalatsi kobama ihekima, na ng'oipata baye, lekeni ukumanya komtsila chibohola imunu iyakengele. 7 Kala kutali kulawa hayali imunu mbotsi, kwaapfila kahela mbuli tsa ukumanya mna ghumlomo ghwake. 8 Ihekima ya imunu iyakengele yomlongotsa yamanye cha ukutenda, lekeni kwa ubotsi wake imunu mbotsi keghutsukila imwenyegho. 9 Iwabotsi wosekelela ukutenda tsinzambi, lekeni iwanu wana ihaki wotogholighwa. 10 Ghumoyo ghomanya usungu wake ghwenyegho, wala kuduhu munu yungi iyodaha kumanya apfila pfaghudeng'elela 11 Ing'anda ya munu yehile itsomwaghighwa lekeni lihema lya imunu yanoghile litsakwima ghoya. 12 Kuna nzila ikoneka inogha hambele ha tsinenge tsa imunu, lekeni haitsigha yomlongotsa kuna ukufa. 13 Ghomoyo ghodaha kukala na usungu hata ka imunu koseka, na ukudeng'elela hakumala ukusing'inika kodaha kutsa. 14 Imunu iyohunduka mmoyo katsolihighwa ghamatunda gha tsinzila tsake, na imunu yanoghile katsolihighwa kwa nzila tsake. 15 Imunu mbotsi kotoghola chila chinu chayolongelighwa, lekeni iyakengele kakwalangitsa pfayoghenda. 16 Imunu yana ihekima kakwalangitsa na kohepa ighehile, lekeni imunu mbotsi ng'eghoma baye wala ng'akwalangitsa baye. 1 17 Ayula iyosumkila ukughudubuka kotenda pfinu pfa ubotsi, na iyotenda ighehile iwanu womhila. 18 Wanu walihela tsimbutsi wobokela ubotsi, lekeni iwakengele woghwekighwa litaji lya ukumanya. 19 Wanu wehile watsowenamila iwanu iwanoghile, na iwalihela ihaki watsenama hana ghamalango gha iwanu wana ihaki. 20 Imunu mhingwa hata iwanu wake wa habehi womhila lekeni imunu tajili kana sale wengi. 21 Ayula iyombetsa miyaghe kotenda nzambi, lekeni kobweda imunu yula iyomwonela libatsi imunu mhingwa. 22 Angu ng'awakwagha baye iwanu awala iwobama kutenda ghehile? Lekeni awala iwobama kutenda ighanoghile iwanu wangi watsowakunda na kuwatoghola. 23 Mna chila sang'ano ng'omu mna faida, lekeni ukulonga kuliyeka komtenda imunu yawe mhingwa. 24 Llitaji lya iwanu wana ihekima tsimali tsawo, Lekeni wanu wabotsi wotangika kwa ubotsi wawo. 25 Mkalangama iyolongesa kowakombola iwanu, lekeni mkalangama ing'ayolongesa baye, ayo koghutsuka. 26 Ayula iyompfuka IMNDEWA kana lolelo kulu, iwana wake watsomtsumila IMNDEWA. 27 Ukumpfuka IMNDEWA kweghala na mbwibwi ina ghamatsi gha ugima, ghomtenda imunu yahepe tsinyonzo tsa ukufa. 28 Ukutunyighwa kwa mfalume yang'awa na wanu wengi, lekeni yang'awa na wanu chidogho si chinu baye. 29 Ayula ing'ayoghudubuka hima hima baye, ayo kakengela, lekeni ayula iyosumka kughudubuka kolangusa apfila pfayali mbotsi. 30 Ghumoyo ighukala tulu ghendo gholutenda ilukuli luwe na ugima, lekeni igele yotenda imipate yole. 31 Ayula iyomonela imunu imhingwa komligha Muumba wake, lekeni ayula iyomonela libatsi imhingwa kompfuka Imulungu. 32 Imunu yehile koghwisighwa hasi kwa aghala ighehile ghayotenda, lekeni imunu yana ihaki hata mna ukufa kwake kana hanu haukutsumila. 33 Ihekima yokala mna ghumoyo ghwa imunu iyakengele, yomanyika mbaka mghati mwa imimoyo ya wanu wabotsi. 34 Haki yotenda isi inulighwe, lekeni tsinzambi tsowaghela chinyala iwanu wa isi yoyose. 35 Mfalume komdeng'elela imtumwa wake iyakengele, lekeni komwonela maya imtumwa ayula iyotenda pfinu pfa chinyala.