1 Imunu wowose iyokunda ukufundighwa ayo kokunda ukumanya, lekeni ayula iyolema kukanyighwa ayo kambotsi. 2 Imunu yanoghile kobokela uluso kulawa kwa IMNDEWA, lekeni yeye komhigha imunu iyopfikitsa ukutenda ghehile. 3 Kuduhu munu iyodaha kwima ghoya kwa ukutenda ighehile, lekeni kuduhu chinu ichidaha kubula imitsisi ya imunu yana ihaki. 4 Pinga yanoghile ka taji kwa imlume wake, lekeni ipinga iyoghuma chinyala keghala na chinu cholile mna imipate ya imlume wake. 5 Chawobama ukutenda iwanu wana ihaki chinogha, lekeni chawokushauli iwanu wehile cha ughutsu. 6 Ghamalonga gha imunu yehile ghobama ukuwakoma iwanu iwalihela totso, lekeni ghamalonga gha imunu yana ihaki ghowakombola iwanu. 7 Wanu iwehile wakwasighwa na wohupa ghendo, lekeni ikaye ya imunu yana ihaki yakwima ghoya. 8 Imunu kotunyighwa kwa ukulola ukukengela kwake, lekeni imunu iyopfikitsa pfihile kobetsighwa. 9 Ng'apfu imunu ayula iyakoneka kamdodo aku kana mtumwa yumwe yaliyeka, kubita ayula iyebona ka munu mkulu aku kahela cha ukuja. 10 Imunu yana ihaki kowadima wanyama wake, lekeni libatsi lya imunu yehile si batsi ghendo baye. 11 Imunu iyolima ghumghunda ghwake katsopfuna pfijo pfingi, lekeni ayula iyotenda mbuli tsa ubotsi ayo kahela tsimbutsi ghendo. 12 Imunu yehile kobama tsimali itsibokighwe na iwanu wehile, lekeni lisina lya imunu yana ihaki lyakweleka ghamatunda. 13 Imunu yehile koghoghighwa kwa ghehile igholawa mumlomo mwake, lekeni imunu yana ihaki katsoswekuka kulawa mna ghamaghayo. 14 Imunu katseghuta ighanoghile kwa aghala ighanoghile igholawa mna ghumlomo ghwake, na tsing'onde tsa ghamoko ghake tsitsomghweka. 15 Inzila ya imunu mbotsi yakoneka igholoka hambele hake imwenyegho, lekeni imunu iyohulikitsa chayoshaulighwa, ayo kana hekima. 16 Imunu mbotsi kakonesa himahima ukughudubuka kwake, lekeni imunu iyodudumila ghamaligho, ayo kakengela. 17 Iyolonga ghamalonga igholongesa ayo koighubula ihaki, lekeni mkalangama wa ughutsu kolonga ughutsu. 18 Imunu iyolonga bila kwalangitsa, chayolonga chohoma ka limaghe, lekeni lulimi lwa imunu iyakengele lwohonetsa. 19 Lulimi ilulongesa lokala matsuwa ghose. lekeni lulimi ilulonga ughutsu ng'alukala baye. 20 Mna ughutsu mna mimoyo ya awala iwobama ukutenda ghehile, lekeni kuna ukudeng'elela kwa awala iwowalamlitsa. 21 Kuduhu maghayo ghoghose ighowalawila iwanu wana ihaki, lekeni iwanu wehile woghanzika sideke. 22 Milomo ilonga ughutsu yomdesa IMNDEWA, lekeni yeye kowadeng'elela iwanu awala iwolongesa. 23 Imunu iyakengele kopfisa ukumanya, lekeni munu mbotsi kobwatuka ubotsi. 24 Ghamoko igheyunda ukusang'ana ghomtenda imunu yawe mtawala, lekeni imunu mdebwe katsosang'ana ng'onde tsa utumwa. 1 25 Ghumoyo ghukwalangula ghomtenda imunu yaleke kudeng'elela, lekeni longa linoghile lyomtenda yasangalamke. 26 Imunu yana ihaki kakwalangitsa pfayokala na sale tsake, lekeni nzila tsa wanu wehile tsowaghitsa iwenyegho. 27 Munu mdebwe ng'akoka baye hata achila chayawindile, loekeni awala iwosang'ana kwa ukwiyunda watsopata mali tsa bei ng'ulu. 28 Kuna inzila ya ihaki kuna ugima, wala kuduhu ukufa ung'abita mna inzila ayo.