1 Tegheletseni, ihekima yokema, ukumanya kokemelela. 2 Mna ichidanando habehi na inzila, na mpfidatu, baho hayakwima. 3 Habehi na ghamalango gha ukwingilila mna ghumji, hanu hawakwingila iwanu kokemelela, 4 Nowakemani, mwemwe muwanu wose! Lukemo lwangu lowakema iwanu wose. 5 Mwemwe mli hela tsimbutsi, mdahe ukungela, mwemwe muwabotsi, mdahe ukutanga. 6 Tegheletseni, kwa apfila chanilonga chinogha, igholawa umlomo mwangu gholongesa. 7 Mlomo ghwangu gholonga ukulongesa kuliyeka, ighehile ghachinu cha kudesa mna ilulimi lwangu. 8 Ghose igholongighwa na ghumlomo ghwangu ghanogha, kuduhu ukughutsuka mna ilulimi lwangu. 9 Ghose ghomghendela ayula iyotambula, na ghanogha kwa ayula iyomanya. 10 Saghula ghanikufunda, uleke kusaghula ipfesa, na saghula ukumanya, uleke kusaghula inzahabu. 11 Kwaapfila ihekima inogha kubita libwe lya lubi, na pfose pfausulukila ng'apfighala nayo baye. 12 Nene hekima ninatso tsimbutsi, nina mahala na ukumanya. 13 Ukumpfuka IMNDEWA kuko ukuhila ighehile. Nochihila ichidandali, ukwitunya na ukutenda ighehile, na nokuhila ukulonga pfihile. 14 Ukushauli na ihekima pfose pfolawa kuna nene, 1 Ukumanya na ngupfu apfo pfose pfangu nene. 15 Nene nowatenda wafalume watawale, na pfilongotsi wahighe ghoya ghamaghomba. 16 Nene nowapfila pfilongotsi, iwakulu na iwafalume watawale isi. 17 Nowakunda awala iwonikunda, na awala iweyunda ukunibama watsombona ghendo. 18 Tsimali na heshima ninapfo nene, tsimali itsikalagha na ukubweda pfose pfangu nene. 19 Chaniweng'a iwanu chinogha ghendo kubita inzahabu, ona, chinogha ghendo kubita fetsa inoghile. 20 Nene nakwang'a mna tsinzila tsa haki nowinza tsinzila itsilamla ghoya. 21 Noweng'a tsimali awala iwonikunda, notsimemetsa tsikano tsawo kwa pfinu ipfinoghile.

22 IMNDEWA kaniumba nene ahala hayanzile tsing'onde tsake, aho ghumwande ng'ana chinu chochose chiumbighwe baye. 23 Nyighwa aho mwanduso ghumwande ghendo, tsanabaho ng'ana isi iumbighwe baye. 24 Tsanyoneka ahala ng'ana ibahali iumbighwe baye, ng'ana tsimbwibwi itsilapfa ghamatsi tsiumbighwe baye. 25 Ng'ana ipfiidunda pfiumbighwe baye, na ng'ana ipfidando pfikighwe baye hanu hake, nene tsanabaho 26 Ng'ana Imulungu yaumbe baye isi na imighunda yake, wala litimbwisi lya isi. 27 Nene tsanabaho hayaumbile kulanga, hayacholile liduwala mchanya mwa ibahali 28 hayekile ghamabingu mlanga, hayatsikile ghoya tsimbwibwi mna ibahali ighendese. 29 Tsanabaho hayekile imibaka ya ibahali, ghamatsi ghaleke kuloka imibaka yake ka pfayaghalaghitse, hayekile imisingi ya isi. 30 Nene tsanahamwe naye ka fundi iyadahile wa ing'onde, niwa ndeng'elo yake chila tsuwa, na ning'ali nideng'elagha hambele hake, 31 Ning'ali niideng'elagha isi yake yose, na ukudeng'elela kwangu kukala hamwe na iwanu.

32 "Lelo wanangu, nitegheletseni, wabweda ghendo awala iwowinza tsinzila tsangu. 33 Tegheletseni ghaniwafunda namwe mtsokengela, wala mleke kughabetsa. 34 Kabweda imunu ayula iyonitegheletsa, iyobetetsa matsuwa ghose hana lilango lyangu, iyokalitsa matsuwa ghose hana ipfitsingiti pfangu. 35 Kwa apfila chila munu iyonipata nene kopata ugima, naye kotogholighwa na IMNDEWA. 36 Lekeni ayula ing'ayonipata nene, ayo kelagha imweyegho, na wose iwonihila nene. wokunda ukufa."