1 Haukala hasi uje na munu mkulu, walangitse ghendo choni ichikighwe hambele hako. 2 Ulipfise libasu lyako, ka ghweghwe kwa munu mtsodo. 3 Uleke kupfonela basu ipfijo pfilimta pfayokwikila imkulu, kwaapfila ipfijo apfo pfokubugha.

4 Uleke kwisupfa kwa ukubama utajili, uleke kuhuwila tsimbutsi tsako ghumwenyegho. 5 Haubenza tsinenge ulole, baho tsimali tsoghuluka, tsakota mabawa, tsoghuluka ka magengele pfayoghuluka mlanga.

6 Uleke kuja ichijo cha munu yana imisi, wala kupfonela basu ipfijo pfake pfinonile. 7 Kwaapfila yeye kopeta achila chaukuja, kokulongela, "Uje na unwe," lekeni ghumoyo ghwake ng'aghuli hamwe na ghweghwe baye. 8 Kutsodeka ghendo litonge alila lyaujile, na ghamalonga ghako ghalimta ghatsakwagha.

9 Uleke kulonga aku imunu mbotsi kabaho, kwaapfila katsobetsa ghamalaonga ghako ghana ihekima.

10 Uleke kusoghetsa libwe lya ghumbaka ghwa ghumwande, wala kwingila mna imighunda ya iwana wafilighwe na iwaweleke. 11 Kwaapfila iyowamila kana ngupfu, naye katsosola lighomba lyao na katsakwima na ghweghwe kuna libalatsa.

12 Ughwike ghumoyo ghwako ghukale ghoya kwa ukufundighwa, na ghamaghutwi ghako ghahulikitse ghamalonga gha ukumanya.

13 Uleke kuleka ukumkanya imwana, kwaapfila ung'amfapula na ifimbo ng'atsakufa baye. 14 Mpfapule na ifimbo naghwe kutsoukombola ugima wake na kutsimu.

15 Mwanangu, ghumoyo ghwako ghung'awa na hekima ghumoyo ghwangu, ona, ghumoyo ghwangu ghendo, nagho ghutsodeng'elela. 16 Mghati ghendo mwa ghumoyo ghwangu nitsodeng'elela, ka ghumlomo ghwako ghutsolonga ighanoghile.

17 Ghumoyo ghwako ghuleke kuwonela gele iwanu wana tsinzambi, lekeni ghweghwe ughendelele ukumpfuka IMNDEWA mna ghamatsuwa ghako ghose. 18 Kwaapfila mna ghamatsuwa ighakutsa kutsobweda kwa ukutenda apfo, na ukulolela kwako ng'akutsakwagha hela baye.

19 Ghwe mwanangu, nitegheletse, na uwe na ihekima, ughwike ghumoyo ghwako ghukale mna inzila igholoke. 20 Uleke kuwa yumwe wa iwanu iwopatika mbwali, na awala wana libasu lya ukuja inyama, 21 kwaapfila iyopatika na yana libasu wose watsakuwa wahingwa, na ukudongila komtenda imunu yapfale misodo.

22 Mtegheletse aba wako iyakweleke, na uleke kumbetsa wenye wako ahala hayakuwa kalala. 23 Ughule ukulongesa na uleke kuuutsa, upate ihekima, ukufundighwa, na ukumanya. 24 Aba wa imwana yana ihaki katsodeng'elela ghendo, na ayula iyakweleka imwana yana ihekima katsomdeng'elela. 25 Waleke aba wako na mame wako wakudeng'ele, na yadeng'ele ghendo mame wako iyakweleke.

26 Ghwe mwanangu, unitegheletse kwa ghumoyo ghwako ghose, na tsinenge tsako tsinoghelwe na tsinzila tsangu na kutsilolesa, 27 kwaapfila ipinga chiweghe pondo ilighendese hasi, na pinga mgheni keghala ghendo na chisima chisisili. 28 Wawo wopfisila ka wabapfi, wotenda iwamale ing'awotogholeka wongetseke.

29 Angu nani iyokemelela? Nani iyolila? Apfi nani iyesonga na wayaghe? Nani iyosing'inika? Angu nani yana ipfilonda pfiyapatile hela? Nani yana tsinenge ndung'u? 30 Ng'ambe awala iwosinda mna tsimbwali, iwakunwa tsimbwali itsihanganyike. 31 Tsinenge tsako tsileke kukodolela imbwali hata ka yakoneka ndung'u, apfila pfaimeletseka na kusala mna ichikombe, apfila pfaihulumka lughalugha halumelo. 32 Kwaapfila nemitondo haulamka, ilukuli lotama ka apfila kulumighwa na nzoka yana isumu. 33 Tsinenge tsako tsitsakona maluweluwe, naghwo ghumoyo ghwako ghutsolapfa mbuli tsa ubotsi. 34 Kweghala ghendo na imunu iyowasa haghati ghati ha ibahali, ka apfila imunu iyowasa mchanya mwa ghumlingoti ghwa imeli. 35 Kutsolonga, "Wanifapula, lekeni ng'awandaghile baye, wanitowa, lekeni sitangile baye, Nitsolamka tsuwachi, ng'ende nikatsime?"