1 Iwanu wehile wotsuma hata ka kuduhu munu iyowawinga, lekeni iwanu wana ihaki ka apfila pfayali isimba, ng'awopfuka baye. 2 Iwanu wang'atenda ghehile mna isi, iwakulu wa isi wakuwa wengi, lekeni iwanu wake wang'akengela na wang'awa na tsimbutsi isi itsakwima kwa matsuwa mengi. 3 Imunu mhingwa iyowabunza iwanu wahingwa, ayo keghala na mvula ng'ulu ya ghamabwe inanga ipfijo pfose pfa kumghunda. 4 Awala iwoleka kukinda ghamalaghitso wowatunya iwanu wehile, lekeni awala iwokinda ghamaghitso wehisanya nawo. 5 Iwanu wehile ng'awomanya ghendo baye ukutenda gha ihaki, lekeni awala iwompfuka IMNDEWA womanya chila chinu. 6 Ng'apfu munu mhingwa iyokala kwa kuwinza tsinzila tsinoghile, kubita imunu yana tsimali iyowinza tsinzila tsihile. 7 Ayula iyokinda ghamalaghitso kamwana iyakengele, lekeni imwana ayula iyakwanga na sale watsodo, ayo komghuma chinyala aba wake. 8 Ayula iyopata utajili kwa kwika inyongetsa na kubunza iwanu, tsimali tsake tsitsoghenda kwa imunu yungi iyowonela libatsi iwahingwa. 9 Imunu iyodiwa ghamaghutwi ghake yaleke kuhulikitsa ghamalaghitso, hata ukulomba kwake kodesa. 10 Ayula iyowalongotsa iwanu wana ihaki mna tsinzila tsihile, ayo katsakonzeka imwenyegho mna ghumtegho ghwake, lekeni iwanu iwalihela matotso watsohala ighanoghile. 11 Imunu tajili kebona kana hekima mna tsinenge tsake imwenyegho, lekeni munu mhingwa yana tsimbutsi katsomtanga apfila pfayali. 12 Iwanu wana ihaki hawodenge'elela ukuhuma, iwanu wosekelela, lekeni iwanu wehile hawotawala, iwanu woghenda kwipfisa. 13 Imunu iyopfisa tsinzambi tsake ng'atsomota baye, lekeni ayula iyotsiungama na kutsileka, ayo katsobokela libatsi. 14 Kabweda imunu ayula iyompfuka IMNDEWA matsuwa ghose, lekeni ayula iyali msughu mmoyo, katsakughwila mna ghamaghayo. 15 Imunu mkulu yehile iyowatawala iwanu wahingwa, keghala na simba iyoduma, na dubu iyowinga. 16 Mtawala iyalihela tsimbutsi kowadununza iwanu wake, lekeni ayula iyolema kupata tsimali kwa kubunza, katsotawala kwa matsuwa mengi. 17 Munu iyoweluka weluka kwa ukukoma imunu, ayo katsotsuma tsuma mbaka hayatsakufa, na munu wowose yaleke kumwapfila. 18 Ayula iyakwanga mna tsinzila tsinoghile katsokombolighwa, lekeni ayula iyakwang'a mna tsinzila tsihile, katsakughwa. 19 Iyolima mghunda ghwake katsakuwa na pfijo bwelele, lekeni iyowinza pfinu pfa ubotsi katsakuwa mhingwa sideke. 20 Imunu iyotogholeka katsobweda ng'ani, lekeni ayula iyobama kupata tsimali himahima ng'atsohepa baye ukutowighwa. 21 Ukulamla kwa kulola ichihanga cha imunu ng'apfinoghile baye, hata apfo munu kodaha kutenda ghehile hata kwa kuhongighwa chihande cha chighate. 22 Munu bahili kosumkila ukupata tsimali, lekeni ng'otanga baye ka katsakuwa mhingwa. 23 Ayula iyomkembela imunu, hambele katsotogholighwa, kubita ayula iyomdeketsa imunu kwa kumlongela mbuli tsilimta. 24 Munu wowose iyomwibila aba wake na mame wake aku kolonga, "Mbona achino ng'achihile baye," imwana ayo keha ghendo na kasale wa imunu iyohinya 25 Munu yana ichidandali koghala ukwisonga, lekeni ayula iyehuwila IMNDEWA katsobweda. 26 Imunu iyehuwila ghumoyo ghwake imwenyegho, ayo kambotsi ghendo, lekeni ayula iyakwanga kwa ukulongotsighwa na ihekima ayo katsokombolighwa. 27 Ayula iyoweng'a ipfinu iwahingwa ng'atsohungukighwa na chinu baye, lekeni ayula iyofing'ilitsa tsinenge tsake yaleke kuwona, ayo katsolighitighwa sideke. 28 lwanu wehile hawotawala, iwanu woghenda kwipfisa, lekeni hawohinyika, iwanu wana ihaki wakongetseka.