1 Atsino ahano natso ng'ungo tsingi tsa Selemani tsawandike keli iwanu wake Hezekia, mfalume wa Yuda. 2 Imulungu kotunyighwa kwa ukupfisa ipfinu, lekeni mfalume kotunyighwa kwa ukukaghula ghoya ipfinu. 3 Ka apfila kulanga pfakuli kutali ng'ani na isi pfaighendese hasi, pfipfo pfaili kwa imunu kumanya achila chayofikitsa mfalume mmoyo mwake. 4 Ulapfe imipfulu inanahile mna ghamabwe gha pfetsa, na baho imhunzi koponda chinu chinoghile ghendo. 5 Pfipfo uwawinge iwanu wehile iwali hambele ha mfalume na ufalume wake utsakwima ghoya mna ukutenda ihaki. 6 Uleke kwitenda kwa mkulu hambele ha mfalume, wala uleke kwima hanu ha iwanu wakulu; 7 kwa apfila ng'apfu ghendo yakulongele, "Utse akuno hambele," kubita kuhumbulighwa hambele ha imunu mkulu. Aghala ghawonile kwa tsinenge tsako, 8 uleke kusumka kughaghala kuna libalatsa kwaapfila ng'utsomanya baye choni cha ukutenda, ahala munu yungi iyonile hayakutsa na kulonga pfingi, ng'ambe kutsoumbuka! 9 Ka ghweghwe na miyagho mwisonga, mwilamlitse muwenyegho, na chila yumwe yaleke kulonga gha miyaghe kwa munu yungi, 10 hela imunu ayo iyohulika katsokuhumbula, na iwanu wose watsokulonga pfihile. 11 Imbuli ilongighwa mna ghumsimu ghwake, yeghala na unzolingo wa nzahabu mna ibakuli ya fetsa. 12 Imunu yana ihekima yang'amkembela imunu yana ghamaghutwi gha kuhulika, pfinogha ghendo ka ukupfala iheleni ya inzahabu mmaghutwi, na ukupfala pfinu pfa nzahabu. 13 Ka ghamatsi ighopfegha mna ghumsimu ghwa ukupfuna ghwa chiyangatsi, pfipfo pfaili Imsenga iyotogholeka pfayowadeng'eletsa awala iwomtuma, 14 Imunu ayula iyetunya ka katsolapfa chinu kumbe ng'olapfa baye. Keghala ghendo na libingu na libeho lilihela imvula. 15 Ukudedetsa kwa kududumila komtenda imkulu yakutogholele na lulimi ilulonga lughalugha lwodaha kubena imipate. 16 Ung'apata uki, uje chidogho uleke kuja mwingi ng'ani, kutsoudeka. 17 Uleke kumwangila mwangila imunu wa habehi naghwe, hela kutsomtenda yepfe na hambele yakuhile. 18 Imunu iyomlapfila miyaghe ukalangama wa ughutsu, ayo kolagha ghendo ka apfila chilungu, limaghe au mshale mkali. 19 Kumhuwila imunu ing'ayotogholeka baye mna ghamatsuwa gha ukughaya, kweghala ghendo na litsino libeneke au ghumghulu ighugholojoke. 20 Ukumwimbila wila imunu yana ghumoyo ighutenyuke, kweghala ghendo na imunu iyotsula ligwanda mna ghumsimu ghwa chipfeghetsi, au kweghala na imunu iyoghela munyu mna ichilonda. 21 Ka adui wako kana nzala, mwing'e ichijo yaje, yang'awa na ng'ilu, mwing'e ghamatsi yanwe 22 Kwa ukutenda apfo kutsomghela chinyala, naye IMNDEWA katsokughweka. 23 Ka apfila libeho iliduma kulawa kasikazini pfalighala imvula, pfipfo ilulimi ilulonga ung'enye pfalughala chihanga cha imaya. 24 Ng'apfu kukala hana imembe ya ichiswili, kubita kukala na pinga imghobo mna ing'anda ng'ulu. 25 Ukubokela imbuli inoghile kulawa isi ya kutali yotenda imimoyo ideng'e, ka apfila pfaghali ghamatsi ighopfegha kwa imunu yana ing'ilu. 26 Imunu yana ihaki iyowaleka wanu wehile wamlongotse, keghala ghendo na mbwibwi ina likododo au chisima ichitikuke. 27 Ng'apfinoghile ghendo baye kuja uki mwingi, pfipfila ng'apfinoghile baye imunu yetunye ng'ani imwenyegho. 28 Imunu ing'ayodaha baye kwilongotsa imwenyegho, keghala ghendo na ghumji ghuna ubanda ughwile hasi.