1 Imunu iyebaghula na wayaghe, ayo kobama ighali ghake imwenyegho, kobetsa chochose ichinoghile iwanu chawomlongela. 2 Imunu mbotsi ng'onoghelwa baye na ukumanya, chayobama yeye ukulonga achila ichili chake. 3 Ighehile haghatsakutsa na ukubetsighwa nako kwakutsa, ichinyala hachilawila na ukuumbuka kwakutsa, 4 Malonga igholawa mna ghumlomo ghwa imunu ka ghamatsi ighaghendese hasi, na ka ihekima inogha ka ghamatsi igholawa mna ichikolongo. 5 Ng'apfinoghile baye kumwing'a ihaki imunu yana ghamatotso, na kumwima ihaki imunu iyalihela matotso. 6 Malonga gha imunu mbotsi ghoghala ukwisonga, chila chayolonga chokema ukutowighwa. 7 Ghumlomo ghwa munu mbotsi ghomlagha imwenyegho, na ichilawa mna imilomo yake chomwonza imwenyegho. 8 Ghamalonga gha ung'enye hagholongighwa gheghala na ichijo chili mta, ghohulumka mbaka munda mwa imunu. 9 Imunu mdebwe mna ing'onde yake, kandughu na ayula iyohinya ipfinu. 10 Taghwa lya IMNDEWA ingome ina ingupfu, Imunu yana ihaki koitsumila na kakuwa mgima. 11 Wanu matajili tsimali tsawo ka ghumji ghuna ingome, wetsagha ka ubanda mtali iuwakinga. 12 Ng'ana ukughwa kulawile baye ghumoyo ghwa imunu ghweghoda, na iheshima yomtsila imunu iyehulumsa. 13 Ayula iyakwidika aku ng'ana yategheletse baye, ayo kambotsi na koghuma chinyala. 14 Iloho ya imunu yodaha ukududumila ughonzwa wake, lekeni ghumoyo ighutenyuke nani yodaha kughududumila? 15 Imunu yana tsimbutsi kopata ukumanya, na maghutwi gha imunu yana ihekima ghobama ukumanya. 16 Inzawadi yompfughulila inzila ayula iyoilapfa, yodaha kumghala hambele ha iwanu wakulu. 17 Iyolongola kughala lighomba kakoneka kana haki, lekeni katsakoneka katotsa ahala munu wa habehi hayolawila na kumghutsa. 18 Ukwasa tsisimbi tsilamle komalitsa ghamaghomba, kowalamlitsa iwakulu iwesonga. 19 Pfikomu ghendo kwilamlitsa na indughu yumdesile kubita kwingila mna ghumji ghutsungulusighwe ubanda, na ukwisonga kweghala na ghamalango gha ingome ghana ghamakufuli. 20 Lida lya imunu litsomema ghamatunda gha ghumlomo ghwake, katseghuta ghendo na aghala igholawa mna ghumlomo ghwake. 21 Lulimi lodaha ukughala ugima na ukukoma na awala iwoukunda watsakuja ghamatunda ghake. 22 Iyopata imwehe ayo kopata chinu chinoghile, naye kotogholighwa na IMNDEWA. 23 Imunu mhingwa kolomba kwa ukudedetsa, lekeni itajili kakwidika kwa kukembela. 24 Imunu iyebamila sale wengi ayo kebamila imwenyegho ukwilagha, lekeni kuna isale iyakuwa habehi na imunu kubita indughu.