1 Mwanangu tegheletsa ihekima yangu, uwambe lighutwi lyako utegheletse ukumanya kwangu, 2 naghwe kutsodaha kulamla ghoya, na ghumlomo ghwako ghutsolonga ukumanya. 3 Kwa apfila ghumlomo ghwa ipinga chiweghe ghwamta ka uki, na ghamalonga ghake ghotelebuka ka ghamapfuta, 4 lekeni hambele ghosungu ka nyongo, na ghotema ka mmaghe ighutema akuno na akuno, 5 Maghulu ghake ghohulumkila kuna ukufa, na ghamatsayo ghake ghoghenda kukabuli. 6 Yeye ng'olola baye inzila ya ugima, tsinzila tsake tsakwanga akuno na akuno, wala ng'omanya baye.

7 Lelo mwemwe wanangu, tegheletseni, wala mleke kwisemwa chanilonga. 8 Kala kutali naye, wala uleke kusoghela hana lilango lya ing'anda yake, 9 hela kutsoweng'a wanu wangi tsingupfu tsako, na miyaka yako yose yaukalile itsomalila kwa munu yalihela libatsi. 10 Wagheni watsosola mali tsako, na lijasho lyako litsomalila mna ing'anda ya munu yungi. 11 Mna ghamatsuwa ghako gha utsighilo kutsodomboketsa, ahala ilukuli lwako halutsosoka. 12 Baho kutsolonga, "Heule nene tsandema ukufundighwa? Na ghumoyo ghwangu tsaghulema kumanighwa. 13 Siwahulikitse baye walangulitsi wangu, wala siwambile baye lighutwi lyangu niwategheletse iwanifundile. 14 Nikala habehi ghendo na ukuhinyika, mghati mwa ghumtingano ghwa iwanu." 15 Unwe ghamatsi gha chisima chako, ghamatsi igholawa mna imbwibwi yako. 16 Heule ghamatsi gha tsimbwibwi tsako ghenele kutali, na ghamatsi gha ipfikolongo ghapwililike mnzila? 17 Ghaleke ghawe ghako ghumwenyegho uliyeka, uleke kwihangila na wanu wangi. 18 Imbwibwi yako ibalikighwe, umdeng'elele ipinga yumkwelile haung'ali msongolo. 19 Ayo kanogha ka kongoni, ka dondolo, na ghamatombo ghake ghakudeng'eletse matsuwa ghose, ughoghighwe na ukukunda kwake. 20 Mwanangu, heule ughoghighwa na pinga chiweghe? Heule ughahaghatila ghamatombo gha pinga mgheni? 21 Kwa apfila ghayotenda imunu ghamwatsi ghendo hambele ha IMNDEWA, naye kotsilolesa tsinzila tsake tsose. 22 Munu yehile kohonzighwa na ighehile ghake, imitsabi ya tsinzambi tsake itsomghogha. 23 Yeye kakufa kwa ukulema kukanyighwa, na kakwagha kwa ubotsi wake mkulu.