1 Uleke kuwonela gele iwanu wehile, wala uleke kusulukila kuwa hamwe nawo, 2 kwaapfila imimoyo yawo yobama kutenda ughobo, na milomo yawo yolonga mbuli tsighala maghayo.

3 Ing'anda yotsengighwa kwa ihekima na yakwima ghoya kwa ukumanya. 4 Ukubitila ukumanya ipfiheleto pfake pfomema, apfila pfinu pfa bei ng'ulu ipfinoghile.

5 Imunu yana ihekima kana ngupfu nyingi, na yana ukumanya kakongetsa uwetso wake. 6 Kwaapfila kwa kulongotsighwa pfinoghile kodaha kughenda kung'ondo, na wanu wengi iwoshauli woghala ukuhuma.

7 Pfikomu ghendo kwa imunu mbotsi kuimanya ihekima, hana ghumtingano ghwa iwanu kahela cha ukulonga.

8 Imunu iyopfikitsa kutenda ghehile, iwanu watsomkema mghobo.

9 Chayofikitsa kutenda munu mbotsi nzambi ghendo, na imunu mtalatsi kodesa iwanu.

10 Ung'atsilika mna ghamatsuwa gha ukughaya, ghweghwe kwa nyonde nyonde ghendo.

11 Uwakombole awala iwosolighwa wakakomighwe, na awala iwali habehi na ukuchinjighwa. 12 Uleke kuwaleka na hambele ulonge, "Simanyile chinu chochose baye," kwaapfila Imulungu iyakona imimoyo ya iwanu kolola, yeye iyowakinga iwanu wawe wagima komanya, yeye katsomliha chila munu kwa kulola aghala ghayatendile.

13 Ghwe mwanangu, uje uki, kwaapfila wamta, uki kulawa mna lisegha wamta mumlomo. 14 Pfipfila umanye ghendo ka ihekima nayo yamta ghendo mna ghumoyo ghwako, ung'awa nayo kutsobweda ghendo mna ghamatsuwa ghako ighakutsa, na ukulolela kwako ng'akutsakuwa hela baye.

15 Ghwe munu wihile, uleke kuipfisila ing'anda ya munu yana ihaki, na uleke kuhahinya hanu hake hayowasa. 16 Kwaapfila imunu yana ihaki kakughwa mala saba, na kakwinuka keli, lekeni iwanu wehile wakughwa hasi kwa ghamaghayo.

17 Adui yako yang'aghwa hasi uleke kusekelela, na yang'ekwala, uleke kudeng'elela mmoyo mwako, 18 hela IMNDEWA iyakona agho katsoghudubuka, naye katsoleka kumwonela maya.

19 Uleke kughudubuka iwanu hawotenda ghehile, wala uleke kuwonela gele iwanu wehile, 20 kwaapfila imunu yehile kahela ichinoghile chakulolela hambele, na itala ya imunu yehile itsotsimika.

21 Mwanangu, umpfuke IMNDEWA na mfalume, wala uleke kuwa chinu chimwe na iwanu awala iwomlema yumwe wa awano weli, 22 kwaapfila ghamaghayo ghodaha kuwatsila kwa ukwidukitsa kulawa kwa iwanu awano weli, na nani iyodaha kumanya maghayo ghachi ghawatsoghala IMNDEWA na mfalume?.

23 Pfipfila iwanu wana ihekima tsawalonga mbuli atsino: ng'apfinoghile baye kulola ichihanga cha imunu hauhigha lighomba. 24 Munu wowose iyolonga kwa munu iyatendile litotso, Ghweghwe ng'utendile totso baye, iwanu watsomlighita na iwanu wa isi watsomwihila. 25 Lekeni watsobweda ghendo iwanu awala iwowahigha iwanu wehile, na watsobokela mengi ighanoghile. 26 Ukwidikighwa kwa ukulongesa, kweghala ghendo na imunu iyokunonola umlomo. 27 Tsimalitse tsing'onde tsako tsa kunze, na imighunda yako uyike ghoya, kuya utsenge ing'anda yako. 28 Uleke kumlapfila ukalangama imunu wa habehi naghwe aku ng'atendile chinu baye, wala uleke kughutsuka kwa imilomo yako 29 Uleke kulonga, "Nitsomtendela ka apfila yeye pfayanitendele, au nitsomuyitsila achila chayanitendele." 30 Tsanibita habehi na mghunda ghwa imunu mdebwe, na ghumghunda ghwa minzabibu ghwa imunu yalihela tsimbutsi. 31 nikangawala kwona mihonga pfayotile chila hanu, lidongo lyose lighubikighwa na mitsani, na ubanda wake wa ghamabwe pfaubomoke. 32 Baho ndola na nitonga mmoyo mwangu, hambele nipata chinu chakwifunda. 33 "Niwase chidogho, nidongile chidogho, nikunje ghamoko ghangu nibwihile chidogho." 34 Na baho uhingwa utsokutsila ka mbapfi pfayakutsa, na ukuhungukighwa kutsokutsila ka imbapfi pfayakutsa na isilaha.