1 Ng'apfu munu mhingwa iyokala aku kahela matotso, kubita munu mbotsi iyolonga ughutsu 2 Ng'apfinoghile baye imunu yakale aku kahela ukumanya, na ayula iyoghenda himahima kototsa inzila. 3 Ubotsi wa imunu wohinya ugima wake imwenyegho, kuya ghumoyo ghwake ghomnunila IMNDEWA 4 Imunu yana tsimali kopata sale wengi, lekeni imunu mhingwa hata sale tsake wa habehi womleka. 5 Imunu iyolonga ughutsu kulibalatsa ng'olekeghwa baye kuhighighwa, na iyolonga ung'enye ng'atsolekelighwa hela baye. 6 Wanu wengi weghalaghala kwa iwakulu, na chila munu kakuwa sale wa ayula iloyapfa inzawadi, 7 Munu mhingwa hata ndughu tsake wose womwihila, lelo sale tsake ng'ambe watsomhepa ghendo, hata ka kowawinza aku kowadedetsa womlema, 8 Ayula iyopata ihekima kekunda imwenyegho, na iyokindilitsa ukumanya katsopata ighanoghile 9 Mkalangama wa ughutsu ng'olekeghwa baye ukuhighighwa, naye iyolonga ughutsu katsohupa ghendo. 10 Ng'apfinoghile baye munu mbotsi kukala aku kohomola, ng'ambe pfiha ghendo kwa imtumwa kuwatawala iwakulu! 11 Imunu iyakengele ng'osumka baye kughudubuka, na konoghelwa na ukughalekelela ighehile ghayatendighwe. 12 Imaya ya mfalume yeghala na ukuduma kwa simba, lekeni uluso wake weghala na litungwe mchanya mwa imitsani. 13 Imwana mbotsi koghala mafwa kwa aba wake, na ipinga mghobo keghala na madwende gha imvula ing'aimala baye. 14 Tsing'anda na tsimali imunu kolekelighwa kulawa kwa aba wake, lekeni ipinga iyakengele kolawa kwa IMNDEWA. 15 Udebwe womtenda imunu yawase nongo ndito, na imunu mkala hela inzala ng'aitsomlawa baye. 16 Iyokinda ghamalaghitso gha Imulungu katsokala mgima, na iyoleka kwalangitsa mna tsinzila tsake katsakufa. 17 Iyali mluso kwa imunu mhingwa ayo komwatsima IMNDEWA, naye IMNDEWA katsomliha kwa acho chayatendile. 18 Umfunde imwanagho kwaapfila kwa ukutenda apfo kuna lolelo, hela kutsakoneka ghweghwe yumhonzile ahala hayokomighwa. 19 Imunu iyosumka kughudubuka katsotowighwa kwa alyo lyayotenda, Ung'amkombola mala lumwe, umanye ka kutsotendagha pfipfio keli na keli. 20 Tegheletsa chawokushauli iwanu, na ubokele ghaufundighwa, na ghamatsuwa ighakutsa kutsakuwa na ihekima. 21 Mmoyo mwa imunu mna pfinu pfingi pfayobama ukutenda, lekeni chayobama IMNDEWA chicho ichitsotendeka. 22 Ukukunda kung'akumala chicho ichibamighwa na imunu, ng'apfu imunu ayula iyali mhingwa kubita ayula iyali mghutsu. 23 Ukumpfuka IMNDEWA kokulongotsa kuna ugima, kutsobwihila aku kwenela kwa chila chinu, kuduhu lihile ilitsokupata. 24 Munu mdebwe koditsa ghumoko ghwake mna isahani, lekeni ng'odaha baye kughwinula ghupfike kuna ghumlomo ghwake. 25 Umtowe munu imtalatsi na iyali mbotsi katsopata tsimbutsi Umkembele yana tsimbutsi naye katsopata ukumanya. 26 Ayula iyomtendela ughobo aba wake, na iyomuwinga mai wake, ayo ka mwana iyoghuma chinyala na kodesa ghendo. 27 Mwanangu, ung'aleka kuhulikitsa aghala ghaufundighwa, kwitsesemwa hata achila chawanzile kumanya. 28 Mkalangama yehile ayo kobetsa ihaki ya imunu yungi, na imilomo ya iwanu wehile yebwigha ighehile. 29 Ukuhighighwa kwikighwa kwa awala iwatalatsi, na ukufapulighwa mijeledi kwikighwa kwa imighongo ya iwabotsi.