1 Ka apfila pfaili ibalafu mna ghumsimu ghwa chiyangatsi au imvula mna ghumsimu ghwa ukupfuna, pfipfo ng'apfinoghile baye ukumwing'a heshima imunu mbotsi. 2 Imunu yang'akulighita hela, lighito lyake ng'alikupata baye, lyakuwa ka chideghe au sangalala iyoghuluka ghuluka bila kughwa mna mbiki ghoghose. 3 Ka pfayofapulighwa ifalasi kwa ghumjeledi na pfayakohighwa ichihongwe ichibang'wa, pfipfo na imunu mbotsi pfayibamighwa yafapulighwe. 4 Uleke kumwidika munu mbotsi ka pfauli ubotsi wake, hela na ghweghwe kutsakuwa ka yeye pfayali. 5 Umwidike imunu mbotsi ka apfila pfauli ubotsi wake, yaleke kwibona kana hekima hana tsinenge tsake imwenyegho. 6 Munu wowose iyomtuma munu mbotsi yaghale usenga, ayo kedumla imwenyegho ghamaghulu na kebamila ukughaya. 7 Imbuli ya mahala mna ghumlomo ghwa munu mbotsi, yeghala na maghulu ighaholole gha imunu chimbete. 8 Ukumwing'a iheshima imunu mbotsi, kweghala na ukwoha libwe mna ing'umbewe. 9 Mbuli ya mahala mna ghumlomo ghwa imunu mbotsi, yeghala na luhonga ilumuhomile mmoko imunu iyapatike. 10 Ayula iyomkema imunu mbotsi au chila mbita nzila yatse yamsang'anile, ayo keghala na munu iyakwasa imishale illaghe chila munu. 11 Imunu mbotsi iyakuyila kutenda ubotsi wake, keghala na yumbwa iyakuja keli imidesi yake. 12 Angu komwona imunu ayula iyebona kana hekima mnange mwake imwenyegho? Ng'apfu imunu iyali mbotsi kana lolelo kubita yeye. 13 Munu mdebwe kolonga, "Kunzila kuna simba, ona kuna simba ghendo kotsunguluka kunze." 14 Ka apfila ghumlango pfaghuhunduka mna tsibawaba tsake, pfipfo imunu mdebwe pfayohunduka mna ilusatsi lwake. 15 Munu mdebwe koditsa ghumoko ghwake mna isahani lekeni ng'odaha baye kughwinula ghupfike kuna ghumlomo ghwake. 16 Imunu mdebwe kebona kana hekima mna tsinenge tsake, kubita wanu saba iwodaha kwidika ghoya. 17 Imunu iyobita nzila na kwingilila na kuwonela maya ughomvi iuli si wake baye, ayo keghala na imunu iyomghogha ghamaghutwi yumbwa. 18 Ka mkalukwale iyakwasa pfiwenge pfa ghumoto, na mishale, na lifwa, 19 pfipfo pfayali munu iyombugha miyaghe na kulonga, "Ning'ali nikutendela utalatsi" 20 Ka kuduhu ngodi, ghumoto ghotsimika, na ka kuduhu usongetsi, ukwisonga komala. 21 Ka ukongetsa ghamakala mna ghamakala ighakwaka, na ukukwitsa tsingodi mna ghumoto ighukwaka, pfipfo na imunu mghobo pfayotenda ukwisonga kulawile. 22 Ghamalonga gha ung'enye gheghala na ichijo chili mta, ghohulumka mbaka munda mwa imunu. 23 Mbuli tsilimta itsilawa mna ghumoyo ghwihile, tseghala na ipfiya ipfiteleleke ipfibakighwe ilangi ya fetsa. 24 Imunu iyomwihila miyaghe kodaha kwipfisa kwa kulonga mbuli tsilimta, lekeni mna ghumoyo ghwake keka fondogholo. 1 25 Hata ka ukulonga kwake kunogha, uleke kumtogholela, kwaapfila ghumoyo ghwake ghumema ighehile mengi ighodesa. 26 Yeye kodaha ghendo kumwihila imunu kwa ukwipfisa, lekeni ighehile ghake ghatsomanyika kuna ghumtingano ghwa iwanu wose. 27 Imunu iyohimba lipondo, katsakughwila yeye mwenyegho mumo, na iyobingilisa ilibwe, litsomhonda imwenyegho. 28 Lulimi ilulonga ughutsu lowahila awala iluwalagha, ghumlomo ighwikombeketsa ghoghala ukulaghighwa.