1 Mwanangu, ghakinde aghano ghanilonga, ugheke ghamalaghitso ghangu. 2 Ghakinde, naghwe kwakuwa mgima, ghatunze ka chiluli cha inenge yako 3 ughohe mna ipfidole pfako, ghandike mmoyo mwako. 4 Ilongele ihekima, "Gweghwe kwa lumbu wangu," na tsilongele tsimbutsi, "Ghweghwe kwa sale yangu wa habehi." 5 Aghano ghatsokwika kutali na ipinga chiweghe, ghatsokwika kutali na ghamalonga ighali mta gha ipinga mgheni.

6 Tsuwa limwe nyima hana lidilisha lya ing'anda yangu, nipfughula chidogho ndole kunze, 7 niwona wasongolo wengi iwali wabotsi, lekeni yumwe wao kahela tsimbutsi ghendo. 8 Yeye yang'ali yobita mna inzila aila, habehi na ng'anda iyang'ali yokala pinga yumwe. Apfo kawinza inzila ighenda kwa ipinga ayo. 9 Ikala nemihe, litsuwa halitsamile ichisi cha chilo haching'ali chakwingila. 10 Baho ipinga ketingana naye kapfala ka pinga chiweghe, kana ghuumoyo ghwa ukubugha. 11 Tsakana lulimilimi na chidandali, ng'akalagha ukaye baye, yeye chighulu na nzila, 12 ma kamnzila, ma kakwisoko, chila hana imembe ya inzila, yeye komembela. 13 Kamhaghatila imsongolo ayo na kamnonela, kamlongela bila kwona chinyala mchihanga. 14 "Tukaje ipfijo ipfilapfighwe nambiko tsa kukala tseghamba pfanyikile lilaghano nipfije. 15 Apfo nitsa kukubokela, nikubama sideke na sambi nikwona. 16 Nitandika ichinanda changu pfinoghile, nitandika magholole ighalawile Misiri. 17 Nichimitsila ghamapfuta ighonung'ila ghoya gha manemane, udi na mdalasini. 18 Utse tukawase wose mbaka nemitondo, twibwedeletse wenyegho, 19 kwaapfila immale wangu ng'alibaho baye hakaye, koka mwanza ghwa kutali. 20 Kasola mkoba umemile sendi, yeye kakuya ghumwetsi haghukomala." 21 Kambugha kwa ghamalonga ighali mta, nagho ghamkolela imsongolo ayo. 22 Baho kamuwinza ipinga ayo, ka ing'ombe iyoghenda kuchinjighwa, ka ndondolo iyoghenda konzeka, 23 mbaka mshale ghumuhome kuna likini, ka chideghe iyoghenda konzeka kuna ghumtegho, ng'otanga baye ka kakwaghitsa ugima wake. 24 Tegheletseni mwemwe wanangu, muwambe ghamaghutwi muhulike chanilonga, 25 Uleke kutoghola ghumoyo ghwako ghulongotsighwe na yeye, wala uleke kubita mna tsinzila tsake. 26 Kwaapfila kawaghwisa wamale wengi, wawengi ghendo iyawakomile. 27 Ing'anda yake iwa nzila ya kughenda kutsimu, na hanu ha kuhulumkila kuna lifwa.